Skip to content

កតិកាសញ្ញាវ៉ាសូវី

  1. វិទ្យាសាស្ត្រនយោបាយ សន្ធិសញ្ញាមិត្តភាព សហប្រតិបត្តិការ និងការជួយគ្នាទៅវិញទៅមក ដែលចុះហត្ថលេខានាថ្ងៃទី១៤ ខែឧសភា ឆ្នាំ១៩៥៥ នៅទីក្រុងវ៉ាសូវី ប្រទេសប៉ូឡូញ ដោយបណ្ដាប្រទេសសង្គមនិយមនៅទ្វីបអ៊ឺរ៉ុប រួមមានប្រទេសអាល់បានី(បានដកខ្លួនចេញពីកតិកាសញ្ញានាឆ្នាំ១៩៦៨) ប៊ុលហ្ការី ហុងគ្រី អាល្លឺម៉ង់ខាងកើត រូម៉ានី ឆេកូស្លូវ៉ាគី ប៉ូឡូញ និងសហភាពសូវៀត លើកលែងតែប្រទេសយូហ្គោស្លាវី។ តាមរយៈកតិកាសញ្ញានេះ រដ្ឋជាសមាជិកបានព្រមព្រៀងគ្នាក្នុងការស្វែងរកដំណោះស្រាយដោយសន្តិវិធីចំពោះជម្លោះអន្តរជាតិ(មាត្រា១) និងសហការជាមួយរដ្ឋផ្សេងទៀតក្នុងការគ្រប់គ្រងសកម្មភាពអន្តរជាតិ(មាត្រា១និង២) ពិគ្រោះយោបល់គ្នាទៅវិញទៅមកលើបញ្ហាអន្តរជាតិទាំងអស់ដែលប៉ះពាល់ដល់ផលប្រយោជន៍រួមរបស់ពួកគេ និងការពារគ្នាទៅវិញទៅមក ប្រសិនបើរដ្ឋសមាជិកមួយឬច្រើនត្រូវបានវាយប្រហារ(មាត្រា៣និង៤) បង្កើតបញ្ជាការរួមនិងគណៈកម្មាធិការពិគ្រោះយោបល់នយោបាយ(មាត្រា៥និង៦)។ ជាងនេះទៅទៀត រដ្ឋជាសមាជិកបានសន្យាថានឹងបដិសេធមិនចូលរួមក្នុងសម្ព័ន្ធភាពនិងកិច្ចព្រមព្រៀងណាដែលមានគោលបំណងផ្ទុយទៅនឹងកតិកាសញ្ញានេះ(មាត្រា៧) និងអនុញ្ញាតឱ្យរដ្ឋផ្សេងទៀតអាចចូលជាសមាជិកផងដែរដោយមិនគិតពីប្រព័ន្ធសង្គម និងនយោបាយរបស់ពួកគេ(មាត្រា៩)។ តាមរយៈកតិកាសញ្ញានេះ អង្គការកតិកាសញ្ញាវ៉ាសូវីត្រូវបានបង្កើតឡើងដើម្បីប្រឈមមុខនឹងបក្សសម្ព័ន្ធណាតូដែលគេយល់ថាជាការគំរាមកំហែងដល់សន្តិសុខនៃបណ្ដាប្រទេសសង្គមនិយម។ សកម្មភាពរបស់ប្រទេសសមាជិកកតិកាសញ្ញាវ៉ាសូវីមានទិសដៅបញ្ឈប់ការរត់ប្រណាំងសព្វាវុធ ទាមទារឱ្យបញ្ឈប់ជាស្ថាពរនិងជាសាកលរាល់ការសាកល្បងអាវុធនុយក្លេអ៊ែរ ដាក់កម្រិតនិងបំផ្លាញចោលនូវអាវុធទាំងនោះ ហាមឃាត់និងបំផ្លាញចោលនូវអាវុធគីមី និងហាមឃាត់រាល់ការបង្កើតប្រភេទនិងប្រព័ន្ធអាវុធប្រល័យលោកថ្មីៗទៀត។ បណ្ដាប្រទេសជាសមាជិកកតិកាសញ្ញាវ៉ាសូវីបានអះអាងថា នឹងរំលាយអង្គការរបស់ខ្លួនចោលក្នុងលក្ខខណ្ឌដោយបក្សសម្ព័ន្ធណាតូត្រូវបានរំលាយផងដែរ។ ក៏ប៉ុន្តែ ដរាបណាបក្សសម្ព័ន្ធណាតូនៅតែមានតទៅទៀតនិងបង្កើនសក្ដានុពលយោធារបស់ខ្លួន នោះបណ្ដាប្រទេសជាសមាជិកកតិកាសញ្ញាវ៉ាសូវីនឹងចាត់វិធានការគ្រប់យ៉ាងដែលចាំបាច់ដើម្បីធានាសន្តិសុខគ្រប់យ៉ាងជូនប្រជាជាតិខ្លួន។ ក្នុងករណីមានការឈ្លានពានប្រឆាំងប្រទេសណាមួយនៃប្រទេសកតិកាសញ្ញាវ៉ាសូវី បណ្ដាសមាជិកដទៃទៀតនឹងផ្ដល់ជំនួយយោធាដល់រដ្ឋរងគ្រោះនោះ។ បណ្ដារដ្ឋនៃកតិកាសញ្ញាវ៉ាសូវីត្រៀមខ្លួនមិនស្វះស្វែងរកសមាជិកថ្មីទៀតទេ ដរាបណាបណ្ដាប្រទេសក្នុងបក្សសម្ព័ន្ធណាតូសន្យាថានឹងបោះបង់ការស្វែងរកសមាជិកថ្មីដែរ។ ប៉ុន្តែនៅទីបំផុត ក្រោយពេលដួលរលំសហភាពសូវៀត អង្គការកតិកាសញ្ញាវ៉ាសូវីត្រូវបានរំលាយជាផ្លូវការនៅក្នុងកិច្ចប្រជុំនៅទីក្រុងប្រាក សាធារណរដ្ឋឆែក ក្នុងខែកក្កដា ឆ្នាំ១៩៩១។ អតីតសមាជិកអង្គការកតិកាសញ្ញាវ៉ាសូវី រួមមាន ប៉ូឡូញ ហុងគ្រី និងសាធារណរដ្ឋឆែកបានចូលរួមជាមួយអង្គការណាតូនៅឆ្នាំ១៩៩១ បន្ទាប់មក ប៊ុលហ្គារី អេស្តូនី ឡេតូនី លីទុយអានី រូម៉ានី ស្លូវ៉ាគី និងស្លូវេនី ក៏បានចូលជាសមាជិកអង្គការណាតូនៅឆ្នាំ២០០៤។
    វិទ្យាសាស្ត្រនយោបាយ

Look up another word in the Khmer Dictionary

More words

គីស្ត ដុំពក មីក្រុប កម្មវិធីសិក្សា ជុះ ធ្មួល ចំនួនគត់ ភាពរបឹង កំហូចទ្រង់ទ្រាយ តង់ឌ័រ ការបង្ការ កណ្ដក់ ក្រុមប្រឹក្សាសហគមន៍អាស៊ាន អគ្គលេខាធិការអាស៊ាន ស្នាក់ការកណ្ដាល សង្គ្រាមត្រជាក់ ត្លែ ប្រព័ន្ធបោះឆ្នោត ពីតជីន ព្យញ្ជនៈក្រអូម រអ៊ូរទាំ បំណះ បចិ ឡោម

Source: Samdech Chuon Nath Khmer dictionary and Khmer lexicons.