រំលងទៅមាតិកា

អត្ថន័យសុបិន៖ វចនានុក្រមសុបិនខ្មែរ

ខ្មែរយើងជឿតាំងពីបុរាណមកថា សុបិនតែងនាំសារអ្វីមួយមកប្រាប់។ ចាស់ទុំយល់ថាសុបិនខ្លះជាសញ្ញានៃលាភសំណាង ការជួបគូ ឬការមានកូន ហើយសុបិនខ្លះទៀតជាការដាស់តឿនពីគ្រោះថ្នាក់ដែលនឹងមកដល់។ ការទស្សន៍ទាយខ្លះស្រដៀងនឹងជំនឿរបស់ប្រទេសជិតខាងដូចជាថៃ និងឡាវ ចំណែកខ្លះទៀតជាការបកស្រាយបែបសម័យថ្មី អំពីអារម្មណ៍ដែលសុបិនឆ្លុះបញ្ចាំង។

ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។

សុបិន្តថាមានកូន

បញ្ជាក់ន័យថា: បើអ្នកមានគ្រួសារហើយខ្លួនអ្នកចង់មានកូននឹងគេដែរ ប៉ុន្តែបើអ្នកនៅលីវនៅឡើយ គឺវាបញ្ជាក់ន័យថា អ្នកកំពុងត្រូវការស្នេហាជាគ្រួសារចង់មានប្តីមានប្រពន្ធ និងចង់មានកូនផង។ អ្នកសាកល្បងគិតក្នុងចិត្តខ្លួនឯងមើល មានស្រមើស្រមៃចង់បានអ្វីខ្លះ? អ្នកមានដេកស្រមៃចង់បានវាមកឱបក្រសោបទេ? ទាំងអស់នេះហើយទើបជំរុញឱ្យអ្នកសុបិនឃើញដូច្នេះ។

សុបិន្តឃើញឃ្មុំ

បញ្ជាក់ន័យថា: មានសញ្ញាដាស់តឿនគ្រោះភ័យអាសន្នបង្កប់នៅក្នុងខ្លួន។ បើសុបិនថា ត្រូវឃ្មុំទិច បញ្ជាក់ថា អ្នកកំពុងមានបញ្ហាចោមរោមស្ទើរគ្រប់ទិសទីក្នុងពេលនេះអ្នកគួររក វិធីទប់ទល់ ឬការពារទុកជា មុនបានហើយ។

សុបិន្តឃើញរថយន្ត

បញ្ជាក់ន័យថា: អ្នកកំពុងស្វះស្វែងរកភាពជឿនលឿនក្នុងជីវិត ប៉ុន្តែបើសុបិនឃើញថា យានជំនិះ របស់អ្នកត្រូវចោរលួច បញ្ជាក់ន័យថា អ្នកំពុងមានអារម្មណ៍ត្រូវគេបោកប្រាស់ ឬដើរខ្សែលើខ្លួនដោយនរណា ម្នាក់តែមិនទាន់ដឹងជាក់លាក់នៅឡើយ។

សុបិន្តឃើញសង្សារចាស់

បញ្ជាក់ន័យថា: អ្នកអាចមានអ្វីនៅសេសសល់ជំពាក់វាក់វិនខាងផ្លូវចិត្តទៅលើខ្លួន គេខ្លះនៅឡើយ។ ស្ត្រី ឬបុរសនោះធ្លាប់មានភាពផ្អែមល្ហែមជាមួយអ្នក។ វាបានជំរុញឱ្យវិញ្ញាណមួយផ្នែកខ្លះត្រូវការរូបគេ ហើយចិត្តរបស់អ្នកមិនទាន់ដាច់អាល័យអស់នៅឡើយដែរ។

សុបិន្តឃើញផ្កា

បញ្ជាក់ន័យថា: បើសិនផ្កាក្នុងសុបិនរបស់អ្នកជាផ្កាស្រស់ បញ្ជាក់ន័យថា អ្នកកំពុងមានសេចក្តីសុខ និងពេញ្ញចិត្តក្នុងជីវិត ប៉ុន្តែបើសុបិនឃើញផ្ការុះរោយ មានន័យថា អ្នកំពុងជួបប្រទះភាពនឿយណាយនៅក្នុងចិត្ត។

សុបិន្តឃើញកង្កែប

បញ្ជាក់ន័យថា: ក្តីសង្ឃឹមអ្វីៗដែលអ្នកបានគិតទុកទាំងប៉ុន្មាននោះ អាចមានកំហុសឆ្គងឬកំពុង រលំរលាយ។

សុបិន្តធ្លាក់ពីទីខ្ពស់

បញ្ជាក់ន័យថា: អ្នកកំពុងមានអារម្មណ៍ថា ខ្លួនត្រូវគេបោះបង់ចោលពីអ្នករបស់នៅជុំវិញខ្លួន។

សុបិន្តឃើញថាស្លាប់

បញ្ជាក់ន័យថា: អ្នកកំពុងត្រូវការកម្លាំងចិត្តដើម្បីតស៊ូជម្នះពីដំណើរជីវិត បន្តទៀត ប៉ុន្តែពេលខ្លះ ការសុបិនបែបនេះ ក៏កំពុងបញ្ជាក់ន័យថា អ្នកកំពុងឈានឡើងខ្ពស់ ឬមានតួនាទីថ្មីក្នុងជីវិតដែរ។

សុបិន្តឃើញសត្វចិញ្ចឹម

បញ្ជាក់ន័យថា: កំពុងទទួលខុសត្រូវការងារខ្ពស់ ប៉ុន្តែសុបិនឃើញសត្វ ចិញ្ចឹមឈឺបញ្ជាក់ន័យថា អ្នកកំពុងធ្វេសប្រហែស ឬបោះបង់ចោលការទទួលខុសត្រូវរបស់អ្នកចំណែកណាខ្លះហើយ។ អ្នកអាចទទួល ផលប៉ះទង្គិចពីក្រុមមនុស្សធ្វើការជាមួយគ្នា ឬអ្នកជិតខាង បើអ្នកមិនប្រញាប់កែប្រែចំណុចខ្វះខាតនេះទេនោះ។

សុបិន្តឃើញផ្ទះ

បញ្ជាក់ន័យថា: ការសុបិនឃើញដល់ផ្ទះ គឺវាបញ្ជាក់ន័យប្រាប់ដល់ស្ថានការណ៍បច្ចុប្បន្នក្នុងជីវិត របស់អ្នក។ បើអ្នកសុបិនឃើញនៅក្រោមសំយាបផ្ទះ ឬបន្ទប់ក្រោមដីបញ្ជាក់ន័យថា អ្នកកំពុងភ្ញាក់រឭកពី រឿងអ្វីមួយដែលធ្លាប់មានកំហុសឆ្គង ប៉ុន្តែបើសុបិនឃើញដល់បន្ទប់ជាន់លើ ឬលើដំបូល បញ្ជាក់ន័យថា អ្នក កំពុងជួបផលសម្រេចអ្វីមួយនិងបើសុបនិឃើញផ្នែកណាមួយនៅត្រង់ ពាក់កណ្តាលផ្ទះមានន័យថា អ្នកកំពុង ជួបប្រទះភាពខ្វល់ខ្វាយក្នុងចិត្តហើយ។

សុបិន្តឃើញកូនសោ

បញ្ជាក់ន័យថា: អ្នកកំពុងមានអំណាចក្នុងខ្លួន ប៉ុន្តែបើសុបិនឃើញថា បាត់កូនសោ គឺមានន័យថា អ្នកកំពុងបាត់បង់អំណាច។

សុបិន្តឃើញទូរស័ព្ទ

បញ្ជាក់ន័យថា: អ្នកកំពុងត្រូវការជិតដិតជាមួយនរណាម្នាក់ទាំងសេចក្តីស្នេហា និងការងារ។ សុបិនបែបនេះពេលខ្លះក៏បញ្ជាក់ន័យថា អ្នកត្រូវការអង្វរករនរណាម្នាក់ឱ្យជួយដោះស្រាយបញ្ហា ជីវិតរបស់អ្នកដែរ។

សុបិន្តឃើញកាបូបប្រាក់

បញ្ជាក់ន័យថា: អ្នកមានការទទួលខុសត្រូវខ្ពស់ផ្នែករឿងប្រាក់កាសផ្ទាល់ខ្លួន។ បើសុបិនឃើញថា បាត់កាបូបប្រាក់អ្នកគួរតែប្រយ័ត្នប្រយែងរឿងបញ្ហាប្រាក់កាសបន្តិច ប៉ុន្តែបើសុបិនឃើញថា កាបូបប្រាក់ត្រូវ ចោរលួចបញ្ជាក់ថា អ្នកកំពុងថ្នាំងថ្នាក់ចិត្តនរណាម្នាក់បោកប្រាស់ឬកេងប្រវ័ញ្ចោហីយ។

សុបិន្តឃើញទន្សាយ

បញ្ជាក់ន័យថា: អ្នកកំពុងគេចវះពីបញ្ហាដែលកំពុងជួបប្រទះនៅចំពោះមុខហើយ។

សុបិន្តឃើញឧប្បត្តិហេតុ

ការសុបិនឃើញឧប្បត្តិហេតុបញ្ជាក់ពីការខ្វល់ខ្វាយធំធេងដល់រឿង អ្វីមួយ ជាការប្រាប់ថានៅក្នុង ក្តីកង្វល់នេះអ្នកបានមើលរំលងបញ្ហាដទៃទៀត ដែលអ្នកតែងផ្តោតការយកចិត្តទុកដាក់ជាងនេះ។ បើសុបិន ឃើញអ្នករងនូវគ្រោះថ្នាក់នោះបញ្ជាក់ថា អ្នកបារម្ភខ្លាំងពីភាពមិនប្រក្រតីលើរាងកាយ ដូច្នេះគួរទៅពិនិត្យ សុខភាពរាងកាយឱ្យបានល្អ។

សុបិន្តឃើញក្បត់ចិត្តគូស្នេហ៍

ប្រសិនសុបិនថា មិនស្មោះត្រង់នឹងគូគ្រងរបស់អ្នកបញ្ជាក់ថា អ្នកត្រូវប្រុងប្រយ័ត្នក្នុងការចិត្ត មនុស្សណាម្នាក់ ពិសេសប្រយ័ត្នមិនថ្មីៗ ព្រោះគេអាចប្រទូសរ៉ាយ ឬរំលោភលើការទុកចិត្តរបស់អ្នក។ បើសុបិនថា មានគេអូសទាញឱ្យអ្នកក្បត់ចិត្តគូស្នេហ៍ ប៉ុន្តែអ្នកទប់ចិត្តខ្លួនឯងបានបញ្ជាក់ថា អ្នកនឹងបណ្តោយ ឱ្យឱកាសក្នុងជីវិតកន្ទងទៅដោយឯកឯង។

សុបិន្តឃើញយន្តហោះ

បញ្ជាក់ថា អ្នកកំពុងមានគំនិតបង្កើតថ្មីយ៉ាងឈ្លាសវៃ។ បើយល់សប្តិថាអ្នកជាអាកាសយានិកមាន ន័យថា អ្នកកំពុងត្រួតត្រាស្ថានភាពដែលកំពុងកើតឡើងប្រកបដោយសេរីភាពនិង សមត្ថភាពដូចដែលអ្នកត្រូវ ការនេះជាសុបិនល្អ។ បើសុបិនឃើញថាអ្នកជាអ្នកដំណើរគឺប្រាប់ថា មានដំណឹងសំខាន់ដែលនឹងកែប្រែគំនិត អ្នកចំពោះអ្នកណាម្នាក់។

សុបិន្តឃើញសត្វ

បញ្ជាក់ពីដំណឹងល្អ សម្រាប់ការធ្វើជំនួញរបស់អ្នក។ សត្វដែលនៅស្ងៀមចាត់ទុកថា ជាប្រផ្នូលល្អ តែបើសិនជាសត្វក្នុងសុបិននោះគំរាម ឬខាំគ្នាឯងនោះបញ្ជាក់ថា មានការយល់ច្រឡំកើតឡើងនៅកន្លែងធ្វើ ការ។ ការយល់សប្តិឃើញសត្វចិញ្ចឹមផ្ទាល់ខ្លួន មិនសូវមានអត្ថន័យអ្វីប្លែកទេ ប្រសិនបើសុបិនឃើញហ្វូងសេះ កំពុងរត់នោះអ្នកអាចក្លាយជាមនុស្សលេខ២ក្នុងការប្រកួត។

សុបិន្តឃើញការបារម្ភខ្វល់ខ្វាយ

សុបិនថា មានទុក្ខកង្វល់ ឬមានបញ្ហាលំបាកចាក់ស្រេះនៅក្នុងចិត្តអ្នកអាចប្រាប់ថារាល់បញ្ហា នឹង ត្រូវធូរស្រាលក្នុងពេលឆាប់ៗនេះជាសុបិនល្អ។ ជាទូទៅសុបិនបែបនេះមិនសូវបង្កប់ន័យប្លែកទេ។

សុបិន្តឃើញសត្វស្លាប

សុបិនបែបនេះអាចមានការព្យាករណ៍ច្រើនយ៉ាងដែលភាគច្រើនជារឿងល្អ ហើយលាភសំណាងតិច ឬច្រើនអាស្រ័យលើពូជសត្វស្លាបក្នុងសុបិននោះ។ ជាធម្មតាប្រសិនសត្វស្លាបនោះស្អាត ហើយជាសត្វដ៏កម្រ នោះ រឹងតែបញ្ជាក់ពីប្រផ្នូលល្អទៅទៀត។

សុបិន្តឃើញឈាម

-សុបិនឃើញថាសម្លាប់គ្នា រហូតហូរឈាម ឬឈាមសត្វដែលត្រូវគេសម្លាប់ដក់ពេញផ្លូវថ្នល់។

*ទំនាយបញ្ជាក់ថា នឹងបានទទួលជោគលាភឬមានសំណាងក្នុងផ្នែកការផ្សងព្រេងអ្វីមួយ។

-សុបិនឃើញមានឈាមហូរឬឈាមហូរចេញតាមរាងកាយខ្លួនឯង។

*ទំនាយបញ្ជាក់ថា នឹងអស់គ្រោះឬបានទទួលដំណឹងល្អពីចម្ងាយ។

-សុបិនឃើញថាបានបរិភោគឈាមសត្វ។

*ទំនាយបញ្ជាក់ថា នឹងបានទទួលជោគលាភពីការផ្សងសំណាងឬលេងល្បែង។

សុបិន្តឃើញខ្មោច ប្រេត ឬបិសាចមកលងក្នុងសុបិន

*ទំនាយបញ្ជាក់ថានឹងអស់គ្រោះ ហើយមានជោគសំណាងពីការផ្សងសំណាងឬមានលាភសំណាងអ្វីមួយឈានចូលមក។

សុបិន្តឃើញមនុស្សស្លាប់

* ទំនាយបញ្ជាក់ថានឹងបានជោគលាភពីការផ្សងសំណាងឬជោគលាភពីការជួញដូរឬតួនាទីការងារអ្វីមួយ។បើសិនក្នុងសុបិនឃើញថាមនុស្សស្លាប់មានទឹកលឿងៗនិងដង្កូវចោះផងសុបិននោះនឹងមានជោគសំណាងខ្ពស់ទ្វេដងឡើងថែមទៀត។

សុបិន្តឃើញក្មេង

*ទំនាយបញ្ជាក់ថា អ្នកអាចនឹងកំពុងរង់ចាំការសម្រេចចិត្តពីនរណាម្នាក់ ហើយការសម្រេចចិត្តនោះតែងផ្តល់ផលល្អដល់អ្នកផង។

សុបិន្តឃើញបីក្មេង

*ទំនាយបញ្ជាក់ថាបើសុបិនឃើញបីក្មេងតាមចាស់បុរាណថា អ្នកនឹងបានទទួលលាភឬអាចបានបុត្រក្នុងពេលឆាប់ៗនេះផង(បើមានគូគ្រង)។

សុបិនឃើញកាំភ្លើង ឬសុបិនថាបាញ់កាំភ្លើងឬបានឮសំឡេងគួរឱ្យភ័យខ្លាច

*ទំនាយបញ្ជាក់ថាស្ត្រីនឹងបានជួបគូព្រេង ប៉ុន្តែបើបុរសនឹងមានវាសនាប្រសើរឡើង។

សុបិន្តឃើញអណ្តើកឬបានចាប់អណ្តើកឬកន្ធាយទឹក

* ទំនាយបញ្ជាក់ថា នឹងបានជោគលាភពីសត្វជើង៤ឬជើង២ក្នុងរយ:ពេលមិនយូរទៀត។

សុបិន្តឃើញត្រី សុបិនថាបានចាប់ត្រី ចិញ្ចឹមត្រី និងឃើញត្រីកំពុងហែល

*ទំនាយបញ្ជាក់ថានឹងបានទទួលជោគលាភឬទទួលអំណោយជារបស់របរ។ក្រៅពី នេះនឹងបានទទួលការងារប្រសើរឡើងថែមទៀត។

សុបិន្តឃើញតុកកែ

*ទំនាយបញ្ជាក់ថានឹងបានទទួលដំណឹងល្អពីការងារឬលាភពីការផ្សងសំណាងបន្តិចបន្តួចណាមួយ។

សុបិន្តឃើញសត្វពស់

-សុបិនឃើញពស់រឹតឬវារមកតោងរុំរាងកាយ

*ទំនាយបញ្ជាក់ថាបើជាស្ត្រីនៅលីវនឹងបានជួបគូ។ទោះបីយ៉ាងណាពេលសុបិនត្រូវសង្កេតមើលថាបើពស់រឹតចំណែកខាងលើរាងកាយដូចជារឹតក រឹតចង្កេះ តាមទំនាយបញ្ជាក់ថានឹងបានគូព្រេងឋានៈល្អ ឬមានយសស័ក្តិ។ប៉ុន្តែបើករណីក្នុងសុបិននោះពស់រឹតទាបចុះមកដល់ត្រឹមជើងតាមទំនាយបញ្ជាក់ថានឹងបានគូព្រេងយសស័ក្តិទាប ប៉ុន្តែសម្រាប់អ្នកដែលមានគូហើយបើក្នុងសុបិននោះបានប្រើដៃចាប់ខ្លួនពស់បញ្ជាក់ថានឹងបានលាភជាបុត្រឬជោគលាភពីការផ្សងសំណាងអ្វីមួយ។

-សុបិនថាពស់ចឹក

*ទំនាយបញ្ជាក់ថាសត្រូវភេទផ្ទុយគ្នានឹងប៉ងអាក្រក់ឬបានទទួលគ្រោះពីអ្នកជិតខាង។បើពស់ចឹកចំណែកទាបចាប់ពីចង្កេះចុះមកក្រោមនោះអាចកើតមានគ្រោះបន្តិចបន្តួច។ប៉ុន្តែបើពស់ចឹកចាប់ពីចង្កេះឡើងលើនឹងបានទទួលគ្រោះធំ ឬមិនដូច្នេះទេនឹងមានគ្រោះរោគជំងឺឬឧប្បត្តិហេតុកើតឡើងផង។

-សុបិនថាព្យាយាមរត់គេចពីពស់ប៉ុន្តែគេចមិនរួច

*ទំនាយបញ្ជាក់ថា អ្នកនឹងបានគេ(បុរសឬស្ត្រីដែលអ្នកស្រឡាញ់ពេញចិត្ត) ជាគូប្តីប្រពន្ធជាក់ជាពុំខាន។

-សុបិនថាជួបពស់ហើយប្រយុទ្ធជាមួយដូចជាកាប់ពស់ដាច់ជាកំណាត់ៗ ឬទាត់ធាក់ទាល់តែពស់ងាប់។

* ទំនាយបញ្ជាក់ថាអ្នកនឹងជួបមនុស្សដែលជាទីពេញចិត្ត ប៉ុន្តែគេតែងដើររំលងអ្នកបាត់ទៅវិញ។

-សុបិនឃើញថាជួបពស់ហើយរត់គេចរកប្រាសអាយូសប៉ុន្តែពស់នៅតែដេញជាប់រហូតទាល់តែស្ទុះភ្ញាក់ឡើង។

*ទំនាយបញ្ជាក់ថាអ្នកកំពុងជួបមនុស្សដែលត្រូវចិត្ត ប៉ុន្តែអ្នកមិនទាន់បានត្រៀមចិត្ត។ចំណែកគេម្នាក់នោះក៏នៅតាមអ្នកបន្តទៅទៀតដែរ។

-សុបិនឃើញថាសត្វពស់កំពុងរឹតយ៉ាងស្ងៀមស្ងាត់។

* ទំនាយបញ្ជាក់ថាអ្នកកំពុងជួបគូព្រេងហើយកំពុងកសាងទំនាក់ទំនងជាមួយគេផង។

សុបិន្តឃើញដង្កូវ ឬមានដង្កូវវាររងើមក្បែរខ្លួនយើងឬឃើញដង្កូវក្នុងសាកសពស្អុយរលួយ

*ទំនាយបញ្ជាក់ថានឹងបានទទួលលាភពីការផ្សងសំណាងឬការជួញដូរប្រសើរឡើង។

សុបិន្តឃើញក្អែប

*ទំនាយបញ្ជាក់ថានឹងបានជួបមនុស្សភេទផ្ទុយគ្នាដែលជាព្រាននារីផង។

សុបិន្តឃើញស្តេចនាគ

*ទំនាយបញ្ជាក់ថាអ្នកនឹងបានទទួលការរិះគន់ឬត្រូវបានប្រកបការងារច្រើនឬបានទទួលភាពអយុត្តិធម៌ណាមួយកើតឡើង។

សុបិន្តឃើញថាបាក់ធ្មេញ

-សុបិនឃើញថាបាក់ធ្មេញលើ

* ទំនាយបញ្ជាក់ថានឹងមានសាច់ញាត់មនុស្សចាស់ខាងឪពុកអាចបាត់បង់ជីវិត។

-សុបិនឃើញបាក់ធ្មេញក្រោម

* ទំនាយបញ្ជាក់ថានឹងមានមនុស្សចាស់ខាងម្តាយអាចបាត់បង់ជីវិត។

-សុបិនឃើញមានធ្មេញដុះឡើងថ្មី

* ទំនាយបញ្ជាក់ថានឹងមានមនុស្សមកសុំស្នាក់នៅដែលជាប្រផ្នូលមិនសូវល្អទេ។

សុបិន្តឃើញជួបក្រពើនិងក្រពើចូលមកវាយប្រហារ

*ទំនាយបញ្ជាក់ថានឹងជួបគ្រោះពីសត្រូវ ឬអ្នកដែលប៉ងអាក្រក់ចាំធ្វើបាបឬលួចទ្រព្យសម្បត្តិរបស់យើង។

សុបិន្តថាប្រសូតបុត្រ

*ទំនាយបញ្ជាក់ថាកិច្ចការងារដែលលោកអ្នកបានគិតទុកនឹងទទួលបានភាពរលូនល្អនិងទទួលជោគជ័យ។ក្រៅពីនេះបើមានការរកស៊ីជួញដូរនឹងប្រសើរឡើងថែមទៀត។

សុបិន្តឃើញមឈូសប៉ុន្តែមិនឃើញសាកសពដាក់ត្រួតលើគ្នា ឬ មានមនុស្សសែងមឈូសកាត់មក

*ទំនាយបញ្ជាក់ថានឹងបានទទួលដំណឹងល្អ ឬលាភពីចម្ងាយឬមានការផ្លាស់ប្តូរតួនាទីការងារប្រសើរឡើង។

សុបិន្តឃើញមនុស្សមានគភ៌

*ទំនាយបញ្ជាក់ថាឱ្យប្រយ័ត្នមានមនុស្សកាច់កុងក្នុងការបណ្តាក់ទុនឬបើដំណើរកិច្ចការងារនឹងខាតដើម។

សុបិន្តឃើញលាមកឬបានចាប់កាន់លាមកខ្លួនឯងឬបន្ទោរបង់លាមក

*ទំនាយបញ្ជាក់ថាអ្នកនោះនឹងមានគ្រោះ នឹងមានរឿងបាត់កេរ្តិ៍ឈ្មោះ ឬត្រូវមនុស្សនិន្ទាដោយនិយាយបង្កាច់បង្ខូច។

សុបិន្តឃើញសត្វឆ្មា

*ទំនាយបញ្ជាក់ថានឹងទទួលបានលាភយសឬការកោតសរសើពីមនុស្សចាស់ឬអ្នកគ្រប់គ្រងឬអ្នកបង្គាប់បញ្ជា។

សុបិន្តឃើញព្រះ ព្រះពុទ្ធរូបឬព្រះបូជាផ្សេងៗ

-សុបិនឃើញព្រះតូចធំឬព្រះដែលគោរពបូជា

*ទំនាយបញ្ជាក់ថា សុបិននោះកើតសិរីមង្គលដល់ខ្លួនឯង ឬបានទទួលជោគលាភរត់មកតាមនៅគ្រាខាងមុខ។

-សុបិនឃើញព្រះព្រហ្ម

*ទំនាយបញ្ជាក់ថាការសុបិនឃើញរូបសំណាកព្រះព្រហ្ម ឬបានគោរពក្រាបសំពះបូជានោះជាសុបិនដ៏ល្អ អ្នកនឹងបានទទួលសេចក្តីសុខនិងមានលាភយស។

-សុបិនឃើញព្រះពុទ្ធបាត(បាតជើងព្រះពុទ្ធ)

*ទំនាយបញ្ជាក់ថានឹងបានទទួលជោគលាភហើយបញ្ហាការងារដែលទទួលខុសត្រូវនឹងមានការចម្រើនទៅមុខឬត្រូវបានរំកិលតំណែងកាន់តែប្រសើរឡើង។

-សុបិនឃើញព្រះចេតិយឬព្រះប្រាង្គឬស្តូបកំពូលខ្ពស់ៗ

*ទំនាយបញ្ជាក់ថានឹងមានជ័យមង្គលចំពោះខ្លួនឯង។បើជាមន្ត្រីរាជការឬអ្នកធ្វើការក្រុមហ៊ុននឹងបានទទួលតំណែងខ្ពស់ឡើង។បើជាអ្នកជំនួញនឹងបានទទួលកេរ្តិ៍ឈ្មោះក្នុងផ្លូវល្អ ប៉ុន្តែបញ្ហាជោគលាភប្រាក់កាសមិនសូវសម្បូរឡើយ។

សុបិន្តឃើញលុយខ្លួនឯង

*ទំនាយបញ្ជាក់ថាបើជាអ្នកនៅលីវនឹងមានគូ ប៉ុន្តែបើអ្នកមានគូហើយនឹងមានបុត្រ ឬនឹងបានរបស់របរជាមាសប្រាក់ ឬជោគលាភខាងការផ្សងសំណាងអ្វីមួយ។

សុបិន្តថាកាត់សក់

*ទំនាយបញ្ជាក់ថាកំពុងអស់គ្រោះ នឹងឈ្នះរឿងក្តី អាការ:ឈឺថ្កាត់នឹងធូរស្រាលចុះ។

សុបិន្តឃើញសុដន់

- សុបិនឃើញសុដន់ស្ត្រីឬបានចាប់ស្ទាបអង្អែល

*ទំនាយបញ្ជាក់ថាអ្នកនឹងបានទទួលជោគលាភ បានទទួលប្រាក់កាសដែលជាទីពេញចិត្ត។

- សុបិនឃើញថាទារកកំពុងបៅដោះ

*ទំនាយបញ្ជាក់ថានឹងទទួលរងការប៉ះទង្គិចផ្លូវចិត្ត មានការឈឺថ្កាត់ ឬបាត់បង់ប្រាក់កាស។

សុបិន្តឃើញសត្វឈ្លើងឬសុបិនឃើញឈ្លើងតោងតាមរាងកាយរហូតទាល់តែស្រែកឱ្យគេជួយក្នុងសុបិន

*ទំនាយបញ្ជាក់ថាបើជាអ្នកនៅលីវនឹងជួបគូដែលជាមេម៉ាយឬពោះម៉ាយឬបានទទួលជោគលាភពីមនុស្សភេទផ្ទុយគ្នា។

សុបិន្តថាយំ

*ទំនាយបញ្ជាក់ថារបស់ដែលបាត់នឹងបានមកវិញក្នុងពេលឆាប់ៗនេះឬមិនដូច្នេះនឹងបានទទួលជោគលាភហួសពីការស្មានទុក។

សុបិន្តឃើញដំរី

-សុបិនឃើញហ្វូងដំរី

*ទំនាយបញ្ជាក់ថានឹងបានទទួលការគាំទ្រជួយឧបត្ថម្ភពីក្រុមមនុស្ស។

-សុបិនឃើញភ្លុកដំរីជាគូឬបានចាប់កាន់ភ្លុកដំរី

*ទំនាយបញ្ជាក់ថានឹងបានជោគលាភយ៉ាងធំដុំ។បើជាអ្នកជួញដូរនឹងមានការលក់ដូរដាច់មានផលចំណូលច្រើន ប៉ុន្តែបើធ្វើការឬបំពេញការងាររាជការនឹងមានមនុស្សនាំជោគលាភមកឱ្យឬបានទទួលជោគលាភពីការផ្សងសំណាងអ្វីមួយ។

-ដំរីរត់ត្រឹកៗ

*ទំនាយបញ្ជាក់ថានឹងបានទទួលជោគលាភពីមនុស្សចាស់ក្នុងពេលឆាប់ៗនេះ។

-សុបិនឃើញជិះដំរីឬបានស្ទាបអង្អែលខ្លួនដំរី

*ទំនាយបញ្ជាក់ថានឹងបានទទួលដំណឹងល្អពីការធ្វើដំណើរផ្លូវឆ្ងាយឬការធ្វើដំណើរទទួលសំណាងអ្វីមួយ។

-សុបិនធ្លាក់ពីលើដំរីឬជិះដំរីចុះប្រេង

*ទំនាយបញ្ជាក់ថាអ្នកនឹងបានទទួលគ្រោះឬការប៉ងអាក្រក់ណាមួយពីសត្រូវដែលខ្លាំងជាង៕

វចនានុក្រមសុបិននេះប្រមូលអត្ថន័យសុបិនចំនួន ៥២ ពីកម្មវិធីហោរាសាស្ត្រខ្មែរ។ ទាំងនេះជាជំនឿប្រជាប្រិយ និងការបកស្រាយទូទៅ មិនមែនជាការពិតតាមវិទ្យាសាស្ត្រ ឬការទស្សន៍ទាយពិតប្រាកដទេ។ សូមអានដើម្បីកម្សាន្ត និងស្គាល់វប្បធម៌ខ្មែរ ហើយកុំយកមកសម្រេចរឿងសំខាន់ៗ។

សំណួរដែលសួរញឹកញាប់

សុបិនឃើញពស់មានន័យដូចម្ដេច?

អាស្រ័យលើអ្វីដែលពស់ធ្វើ។ សុបិនឃើញពស់រឹតខ្លួន ទំនាយថាស្ត្រីនៅលីវនឹងបានជួបគូ សុបិនថាពស់ចឹក ទំនាយថាមានសត្រូវប៉ងអាក្រក់ ឬមានគ្រោះពីអ្នកជិតខាង ហើយសុបិនថារត់គេចពីពស់មិនរួច ទំនាយថានឹងបានអ្នកដែលខ្លួនស្រឡាញ់ជាគូ។

សុបិនឃើញបាក់ធ្មេញមានន័យដូចម្ដេច?

តាមជំនឿនេះ បើបាក់ធ្មេញលើ ទំនាយថាសាច់ញាតិចាស់ខាងឪពុកអាចបាត់បង់ជីវិត បើបាក់ធ្មេញក្រោម គឺខាងម្ដាយ។ បើសុបិនឃើញធ្មេញដុះថ្មី ទំនាយថានឹងមានមនុស្សមកសុំស្នាក់នៅ។

សុបិនឃើញមនុស្សស្លាប់ អាក្រក់ឬទេ?

តាមជំនឿនេះ មិនអាក្រក់ទេ។ សុបិនឃើញមនុស្សស្លាប់ ទំនាយថានឹងបានជោគលាភពីការជួញដូរ ការងារ ឬការផ្សងសំណាង។ ចំណែកសុបិនថាខ្លួនឯងស្លាប់ មានន័យថាអ្នកត្រូវការកម្លាំងចិត្ត ឬកំពុងមានតួនាទីថ្មីក្នុងជីវិត។

តើសុបិនអាចទស្សន៍ទាយអនាគតបានពិតមែនឬ?

មិនមានភស្តុតាងវិទ្យាសាស្ត្រថាសុបិនអាចទស្សន៍ទាយអនាគតបានទេ។ អត្ថន័យទាំងនេះជាជំនឿបុរាណ និងការបកស្រាយទូទៅ។ ប៉ុន្តែការបកស្រាយខ្លះ ដូចជាសុបិនឆ្លុះបញ្ចាំងពីការព្រួយបារម្ភ អាចជួយឲ្យអ្នកពិចារណាពីអារម្មណ៍ខ្លួនឯងបាន។

ការទស្សន៍ទាយ