រំលងទៅមាតិកា

អត្ថន័យប្រជ្រុយលើមុខ និងរាងកាយ

ការមើលប្រជ្រុយជាផ្នែកមួយនៃការមើលលក្ខណៈមុខ ដែលមានតាំងពីបុរាណនៅកម្ពុជា និងនៅទូទាំងអាស៊ី។ គេជឿថាទីតាំងរបស់ប្រជ្រុយ មិនថានៅលើថ្ងាស ចិញ្ចើម បបូរមាត់ ថ្ពាល់ ឬបាតជើង អាចប្រាប់ពីអត្តចរិត ស្នេហា សុខភាព និងជោគលាភរបស់មនុស្សម្នាក់ៗ។ ការទស្សន៍ទាយខ្លះក៏អាស្រ័យលើពណ៌ប្រជ្រុយដែរ ដូចជាប្រជ្រុយពណ៌ខ្មៅរលោង ច្រើនតែថាប្រែជោគអាក្រក់ឲ្យទៅជាល្អ។

ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។

ប្រជ្រុយនៅលើទងស្លឹកត្រចៀក

ប្រជ្រុយនៅលើទងស្លឹកត្រចៀក អ្នកដែលមានប្រជ្រុយនៅលើទងស្លឹកត្រចៀកជាមនុស្សមានសម្ថភាព មានទេពកោសល្យ មានគំនិតប្រាជ្ញាឈ្លាសវៃ មានសុភមង្គល ការរកស៊ីវិញគឺទទួលបានជោគជ័យ ហើយទៅថ្ងៃមុខក៏អាចក្លាយទៅជាអ្នកមានទ្រព្យស្ដុកស្ដម្ភម្នាក់ដែរ។ ប៉ុន្តែបើជាប្រភេទប្រជ្រុយដែលមានពណ៌សស្លេក ឬពណ៌ក្រហមព្រឿងៗវិញជាមនុស្សដែលមានមនសិកាផ្ទាល់ខ្លួនខ្លាំងក្លា ហើយដោយសារតែទំនើងចិត្តខ្លួនឯងនេះហើយទើបនាំមកនូវជោគសំណាងអាក្រក់។

ប្រជ្រុយនៅលើត្របកភ្នែក

ប្រជ្រុយនៅលើត្របកភ្នែក អ្នកដែលមានប្រជ្រុយនៅលើត្របកភ្នែក ក្នុងចំណោមមនុស្ស ១០នាក់ មាន ៩នាក់ ប្រៀបដូចជាសត្វខ្យងហៀនគ្មានស្នូក ហើយបើមិនដូច្នោះទេ ជាមនុស្សដែលមិនមានលំនៅស្ថានពិតប្រាកដ។ ពួកគេចូលចិត្តសេរីភាព ដូច្នេះជាញឹកញាប់តែងផ្លាស់ប្ដូរទីលំនៅ។ ប្រសិនបើប្រជ្រុយមានពណ៌ខ្មៅរលោង ប្រែជាមានជោគសំណាងល្អទៅវិញ។ ផ្ទុយទៅវិញ ប្រសិនបើប្រជ្រុយពណ៌ក្រហមព្រឿងៗ ជាមនុស្សចូលចិត្តប្រឆាំងនឹងមេកោយ ឬចាស់ទុំទៀតផង។

ប្រជ្រុយនៅក្រោមភ្នែក

ប្រជ្រុយនៅក្រោមភ្នែក អ្នកដែលមានប្រជ្រុយនៅក្រោមភ្នែក ជាមនុស្សសម្បូរស្នេហ៍ ហើយជារឿយៗតែងតែជួបនឹងករណីស្នេហ៍ច្រើន ទុក្ខច្រើន។ ចំពោះស្ត្រីភេទ ក្រោយពីទទួលរងការរំជើបរំជួលចិត្តរួចមក តែងតែយល់ច្រឡំពីរឿងស្នេហា។ ដូចច្នេះថ្ងៃណាមួយ បើមានទំនាក់ទំនងស្នេហា មិនត្រូវងប់ងល់ខ្លាំងពេកឡើយ។

ប្រជ្រុយនៅចុងកន្ទុយភ្នែក

ប្រជ្រុយនៅចុងកន្ទុយភ្នែក អ្នកដែលមានប្រជ្រុយប្រភេទនេះ ភាគច្រើន នៅពេលកំពុងមានទំនាក់ទំនងស្នេហាយ៉ាងស្អិតរមួត ឬក្រោយពេលរៀបអាពាហ៍ពិពាហ៍រួច មានអ្នកទីបីចូលមកជ្រៀតជ្រែក។ ក្រៅពីនោះ អាពាហ៍ពិពាហ៍ដំបូងតែងតែបានជួបឧបសគ្គ។

ប្រជ្រុយបង្កប់ក្នុងរោមចញ្ចើម

ប្រជ្រុយបង្កប់ក្នុងរោមចញ្ចើម ជាប្រភេទប្រជ្រុយនាំមកនូវជោគលាភល្អ និង អាយុវែង។ មិនថាប្រជ្រុយកប់ក្នុងរោម ចិញ្ចើមខាងឆ្វេង ឬខាងស្ដាំឡើយ សុទ្ធតែជាមនុស្សធ្វើការម៉ត់ចត់ និង ហ៊ានទទួលខុសត្រូវ ព្រមទាំងមានចិត្តមេត្តាករុណា ស័ក្តិសមប្រកបការងារផ្នែកសប្បុរសធម៌។ ម្យ៉ាងទៀត មនុស្សប្រភេទនេះមានជំនាញផ្នែកសិល្បៈទៀតផង។

ប្រជ្រុយនៅពីក្រោមបបូរមាត់

ប្រជ្រុយនៅពីក្រោមបបូរមាត់ អ្នកដែលមានប្រជ្រុយប្រភេទនេះ មួយជីវិតប្រហែលជាអាចនៅតែលតោលមិនប្រាកដប្រជា ហើយបើទោះជាមានទ្រព្យច្រើនយ៉ាងណាក្ដី ក៏មិនស័ក្កសមនឹងទិញអចលនទ្រព្យដែរ។ ប៉ុន្តែបើប្រជ្រុយមានពណ៌ខ្មៅភ្លឺរលោងវិញ មួយជីវិតនេះអាចមានជីវភាពរស់នៅប្រកបដោយសេចក្ដីសុខដុមរមនា។ ប្រសិនបើចំណុចប្រជ្រុយស្ថិតនៅចំកណ្ដាលខាងក្រោមបបូរមាត់ គឺជាមនុស្សប្រមឹករាល់ថ្ងៃ។ ចំណែកអត្តចរិតវិញជា មនុស្សមានឆន្ទៈខ្សោយ រីឯគុណសម្បត្តិវិញ ជាមនុស្សដែលមានការគិតគូរដិតដល់ ហ៊ានអារកាត់គ្រប់រឿងរ៉ាវដោយឥតរួញរាឡើយ។

ប្រជ្រុយនៅលើបបូរមាត់

ប្រជ្រុយនៅលើបបូរមាត់ អ្នកដែលមានប្រជ្រុយប្រភេទនេះ ក្រោយពេលរៀបអាពាហ៍ពិពាហ៍រួចអាចមានកូនភ្លោះ។ ចំពោះស្ត្រីប្រសិនបើចំណុចប្រជ្រុយស្ថិតនៅចំកណ្ដាល រវាងចុងច្រមុះ និង បបូរមាត់នោះ ចូរយកចិត្តទុកដាក់លើបញ្ហាសម្រាលកូន ព្រោះពិបាកក្នុងការឆ្លងទន្លេ។ មនុស្សប្រភេទនេះមិនសូវចេះសម្រួលទៅតាមកាលទេសៈ និង មិនសូវមានសេរីទៀតផង។ ប៉ុន្តែបើជាប្រជ្រុយមានពណ៌ខ្មៅរលោង បែរជាមានជោគសំណាងល្អទៅវិញ ព្រោះក្នុងមួយជីវិតមិនមានភាពខ្វះខាតឡើយ ហើយជីវភាពរស់នៅក៏ប្រកបដោយភាពថ្កុំថ្កើនរុងរឿងដែរ។

ប្រជ្រុយគ្រោះលង់ទឹក

ប្រជ្រុយគ្រោះលង់ទឹក មានពីរប្រភេទគឺចំណុចប្រជ្រុយនៅចំកណ្ដាលថ្ពាល់ខាងស្ដាំនិងនៅចំកណ្ដាលក្ដោងច្រមុះ។ អ្នកដែលមានប្រជ្រុយប្រភេទនេះជាទូទៅគឺខ្លាចទឹក។ ចំពោះស្ត្រីដែលមានប្រជ្រុយបែបនេះគួរជៀសវាងសកម្មភាពនៅលើផ្ទៃទឹកដូចជាទឹកសមុទ្រទន្លេបឹងបួរជាដើម។

ប្រជ្រុយនៅចុងច្រមុះ

ប្រជ្រុយនៅចុងច្រមុះ សម្រាប់បុរសដែលមានប្រជ្រុយប្រភេទនេះអាចមានឈ្មោះបោះសំឡេង និងប្រមូលផលចំណូលតែក្នុងរយៈពេលខ្លីប៉ុណ្ណោះចំណែកឯស្ត្រីគឺមានជោគលាភនិងជោគទ្រព្យល្អ។ ក្រៅពីនេះទាំងបុរសនិងស្ត្រីកាលបើមានប្រជ្រុយប្រភេទនេះសុទតែជាមនុស្សមានកាមតណ្ហាខ្លាំងខ្លាដូចគ្នា។

ប្រជ្រុយនៅកណ្ដាលរោមចញ្ចើម

ប្រជ្រុយនៅកណ្ដាលរោមចញ្ចើម ប្រជ្រុយប្រភេទនេះតំណាងឲ្យជោគជ័យធំនិងនិងការបរាជ័យធំដែរ។ ចំពោះស្ត្រីបង្ហាញពីជោគគ្រួសារខ្សត់ខ្សោយបន្តិចត្រូវយកចិត្តទុកដាក់ទាក់ទាញចិត្តលោកប្ដីឲ្យបានជាប់ ពុំនោះទេអាចចែកផ្លូវគ្នាដើររៀងៗខ្លួនជាក់ជាមិនខានប៉ុន្តែអ្នកក៏ជាស្ត្រីជើងខ្លាំងម្នាក់ដែរពិតមែនតែពុំសូវយកចិត្តទុកដាក់ប្រកបកិច្ចការងារក្នុងផ្ទះក្ដីតែចូលចិត្តទៅប្រកបកិច្ចការងារនៅទីឆ្ងាយទៅវិញ។

ប្រជ្រុយនៅលើថ្ងាសជិតជើងសក់

ប្រជ្រុយនៅលើថ្ងាសជិតជើងសក់ អ្នកដដែលមានប្រជ្រុយប្រភេទនេះមានជោគសំណាងល្អណាស់ ព្រោះក្នុងមួយជីវិតអ្នកអាចទទួលបានការកោតសរសើរពីអ្នកដទៃហើយប្រជ្រុយប្រភេទនេះអាចធ្វើឲ្យបុគ្គលម្នាក់ ពេលជួបគ្រោះអាក្រក់ ប្រែមកជាល្អ។

ប្រជ្រុយបបូរមាត់

ប្រជ្រុយបបូរមាត់ អ្នកដែលមានប្រជ្រុយប្រភេទនេះជាមនុស្សសម្បូរទៅដោយមនោសញ្ចេតនាមានចិត្តមេត្តាករុណាហើយក្នុងមួយជីវិតនេះតែងតែជួយឈឺឆ្អាលរឿងរបស់អ្នកដទៃព្រមទាំងត្រូវបានបងប្អូនញាតិមិត្តស្រឡាញ់រាប់អានទៀតផង។ ទោះជាបែបនេះក្ដីត្រូវយកចិត្តទុកដាក់បញ្ហាហូបចុកមិនត្រូវល្មោភស៊ីល្មោភផឹកឡើយព្រោះអាចអន្តរាយដល់សុខភាព។

ប្រជ្រុយក្បែរស្លាបច្រមុះទាំងសងខាង

ប្រជ្រុយក្បែរស្លាបច្រមុះទាំងសងខាង អ្នកដែលមានប្រជ្រុយនៅក្បែរស្លាបច្រមុះឆ្វេងឬស្ដាំជាមនុស្សមានគំនិតមិនប្រាកដប្រជា មិនសូវជាពេញចិត្តក្នុងកិច្ចការងារប៉ុន្មានឡើយ ហើយអាចប៉ះពាល់ដល់ការរីកលូតលាស់មុខរបរជួញដូរ និងពិបាកធ្វើឲ្យអ្នកដទៃជឿទុកចិត្តទៀតផង។ ប្រសិនបើប្រជ្រុយមានពណ៌ភ្លឺរលោងវិញ ជាបុគ្គលដែលមានជោគការងារល្អ និងចេះសម្របសម្រួលទៅតាមកាលៈទេសៈប្រែប្រួល។ លុះឈានដល់វ័យកណ្ដាល ជោគ សំណាងក៏ប្រែមកជាល្អប្រសើរ ហើយជីវភាពរស់នៅក៏ប្រកបតែសេចក្ដីសុខក្សេមក្សាន្តដែរ។

ប្រជ្រុយនៅលើថ្ងាសខាងឆ្វេង ឬ ស្ដាំ

ប្រជ្រុយនៅលើថ្ងាសខាងឆ្វេង ឬ ស្ដាំ អ្នកដែលមានប្រជ្រុយនៅត្រង់កន្លែងនេះ ជាមនុស្សមានឧបនិស្ស័យតិចជាមួយញាតិសន្ដាន ហើយឱកាសនៃការចាកចេញពីផ្ទះមានច្រើន ព្រមទាំងមិនងាយនឹងទទួលបានការជ្រោមជ្រែងពីចាស់ទុំ និងការដំឡើងយសស័ក្កិពីចៅហ្វាយនាយទៀតផង។ រីឯជីវភាពរស់នៅលំបាកលំបិន ប៉ុន្តែបើចំណុចប្រជ្រុយស្ថិតនៅចំកណ្ដាលផ្នែកលើបន្តិច ជាមនុស្សមានគំនិតចាស់ទុំ ហើយដល់វ័យចាស់ជរា នឹងមានជីវភាពល្អប្រសើរ និងមានសេចក្ដីសុខដុមរមនា។ ចំពោះស្ត្រី គឺតំណាងឲ្យជោគទ្រព្យល្អណាស់ តែរឿងស្នេហាវិញ ងាយនឹងជូបបញ្ហាស្មុគស្មាញច្រើន។ ដូច្នេះការជ្រើសរើសគូស្រករត្រូវត្រិះរិះពិចារណាឲ្យបានល្អិតល្អន់ តែបើជាប្រជ្រុយមានពណ៌ខ្មៅភ្លឺរលោងវិញគឺបង្ហាញពីជោគសំណាងល្អ មូលដ្ឋានគ្រឹះច្បាស់លាស់ នឹងអាចទទូលបានជោគជ័យដ៏ត្រចះត្រចង់ទៀតផង។

ប្រជ្រុយថ្ងាសស្តាំ

ប្រជ្រុយថ្ងាសស្តាំ មនុស្សដែលមានប្រជ្រុននៅត្រង់នេះ ជាមនុស្សមានគំនិត, ល្បីឈ្មោះ, និងមានជីវិតរុងរឿងថ្កុំថ្កើង។

ប្រជ្រុយថ្ងាសឆ្វេង

ប្រជ្រុយថ្ងាសឆ្វេង អ្នកដែលមានប្រជ្រុយនៅលើថ្ងាស ជាមនុស្សខ្ជះខ្ជាយ និងតែលតោលគ្មានទីពឹង។

ប្រជ្រុយត្របកភ្នែក

ប្រជ្រុយត្របកភ្នែក អ្នកដែលមានប្រជ្រុយនៅត្របកភ្នែក ជាមនុស្សមានសន្តិភាព មានទំនុកចិត្ត និងភាពទៀងត្រង់។

ប្រជ្រុយចិញ្ចើមស្តាំ

ប្រជ្រុយចិញ្ចើមស្តាំ ជាមនុស្សមានសុភមង្គល និងឆាប់បានរៀបអាពាហ៍ពិពាហ៍។

ប្រជ្រុយចិញ្ចើមឆ្វេង

ប្រជ្រុយចិញ្ចើមឆ្វេង ជាមនុស្សមានភាពលំបាក និងការតស៊ូក្នុងជីវិតច្រើន។

ប្រជ្រុយត្រចៀក

ប្រជ្រុយត្រចៀក ជាមនុស្សគ្មានមេត្តាករុណាចំពោះអ្នកដទៃ។

ប្រជ្រុយថ្ពាល់ស្តាំ

ប្រជ្រុយថ្ពាល់ស្តាំ ជាមនុស្ស ពោរពេញដោយសុភមង្គល ជាពិសេសពេលរៀបការរួច។

ប្រជ្រុយថ្ពាល់ឆ្វេង

ប្រជ្រុយថ្ពាល់ឆ្វេង ជាមនុស្សមានការនឿយលំបាក និងការតស៊ូក្នុងជីវិត។

ប្រជ្រុយឆ្អឹងថ្ពាល់

ប្រជ្រុយឆ្អឹងថ្ពាល់ ជាមនុស្សទទួលបានភាពជោគជ័យ, ភាពរុងរឿង, និងមានសំណាងល្អ។

ប្រជ្រុយជុំវិញមាត់

ប្រជ្រុយជុំវិញមាត់ ជាមនុស្សដែលមានភាពត្រេកត្រអាលស្ទើរតែគ្រប់រឿង។

ប្រជ្រុយចង្កា

ប្រជ្រុយចង្ការ ជាមនុស្សមានសុខភាពមិនល្អ និង ឧស្សាហ៍មានជំងឺតម្កាត់។

ប្រជ្រុយច្រមុះ

ប្រជ្រុយច្រមុះ ជាមនុស្សដែលមានសំណាងខ្លាំង និងមានសមត្ថភាពផ្លូវភេទខ្ពស់។

ប្រជ្រុយក

ប្រជ្រុយក ជាមនុស្សដែលមានទាំងជោគជ័យ និងបរាជ័យដើរទន្ទឹមគ្នា។

ប្រជ្រុយកដៃ

ប្រជ្រុយកដៃ ជាមនុស្សមានសមត្ថភាពពីធម្មជាតិ ដូច្នេះងាយស្រួលទទួលបានជោគជ័យក្នុងជីវិតបំផុត។

ប្រជ្រុយដៃស្តាំ

ប្រជ្រុយដៃស្តាំ ជាមនុស្សមានសំណាងខ្ពស់។

ប្រជ្រុយដៃឆ្វេង

ប្រជ្រុយដៃឆ្វេង ជាមនុស្សមានការព្រួយបារម្ភអំពីបញ្ហាលុយកាកច្រើន។

ប្រជ្រុយស្មា

ប្រជ្រុយស្មា ជាមនុស្សមានការលំបាក និងភាពស្មុគស្មាញនៅក្នុងជីវិត។

ប្រជ្រុយទ្រូងស្តាំ

ប្រជ្រុយទ្រូងស្តាំ ជាមនុស្សមានជោគវាសនាផ្លាស់ប្តូរមិនទៀងទាត់។

ប្រជ្រុយទ្រូងឆ្វេង

ប្រជ្រុយទ្រូងឆ្វេង ជាមនុស្សមានភាពជោគជ័យ និងសុភមង្គល, បើជាស្ត្រី គឺជាមនុស្សចិត្តក្តៅ និងមាននិស្ស័យរឹង ហើយច្រើនជាគូនឹងមនុស្ស ដែលមានអារម្មណ៍ឆេវឆាវ។

ប្រជ្រុយពោះ

ប្រជ្រុយពោះ ជាមនុស្សគិតច្រើន ខ្វល់ខ្វាយពីភាពទន់ខ្សោយរបស់ខ្លួន មានភាពខ្ជឹលច្រអូស ប៉ុន្តែលោភលន់។

ប្រជ្រុយខ្នង

ប្រជ្រុយខ្នង ជាមនុស្សស្មោះត្រង់ និងមានចិត្តសប្បុរស ប៉ុន្តែមានចរិតកោងកាចបន្តិច។

ប្រជ្រុយដងខ្លួនខាងស្តាំ

ប្រជ្រុយដងខ្លួនខាងស្តាំ ជាមនុស្សកម្សាក និង ឆាប់ខ្លាចបំផុត។

ប្រជ្រុយដងខ្លួនខាងឆ្វេង

ប្រជ្រុយដងខ្លួនខាងឆ្វេង ជាមនុស្សចូលចិត្តចំអកឲ្យខ្លួនឯង។

ប្រជ្រុយលើនិងក្រោមភ្លៅ

ប្រជ្រុយលើនិងក្រោមភ្លៅ ជាមនុស្សរឹងមាំ ហើយពេលមានកូនៗសុទ្ធតែមានសុខភាពល្អ និងមានចៅច្រើន។

ប្រជ្រុយសងខាងភ្លៅស្តាំ

ប្រជ្រុយសងខាងភ្លៅស្តាំ ជាមនុស្សមានអត្តចរិតល្អ, មានទ្រព្យសម្បត្តិ និងមានសុភមង្គលនៅក្នុងជីវិតគ្រួសារ។

ប្រជ្រុយភ្លៅឆ្វេង

ប្រជ្រុយភ្លៅឆ្វេង ជាមនុស្សឯកា, ច្រើនតែចុះចាញ់, ក្រីក្រ និងច្រើនតែបាក់ទឹកចិត្ត និងមានចរិតមិនទៀងទាត់។

ប្រជ្រុយជង្គង់ស្តាំ

ប្រជ្រុយជង្គង់ស្តាំ ជាមនុស្សមិនមានបញ្ហាក្នុងជីវិតអាពាហ៍ពិពាហ៍ និងផ្នែកហិរញ្ញវត្ថុ។

ប្រជ្រុយជង្គង់ឆ្វេង

ប្រជ្រុយជង្គង់ឆ្វេង ជាមនុស្សឥតប្រយោជន៍ និង ឥតបានការ។

ប្រជ្រុយកជើង

ប្រជ្រុយកជើង បើជាបុរស គឺជាបុរសមានភាពទាន់សម័យ តែបើជាស្ត្រីគឺឧស្សាហ៍ និងមានថាមពល។

ប្រជ្រុយបាតជើងស្តាំ

ប្រជ្រុយបាតជើងស្តាំ ជាមនុស្សដែលងាយបែកបាក់នៅក្នុងទំនាក់ទំនងស្នេហាបំផុត។

ប្រជ្រុយបាតជើងឆ្វេង

ប្រជ្រុយបាតជើងឆ្វេង ជាមនុស្សដែលពោរពេញទៅដោយបញ្ញា និងមានប្រាជ្ញាវៃឆ្លាត។

ទំព័រនេះរៀបរាប់អត្ថន័យប្រជ្រុយចំនួន ៤៥ ពីកម្មវិធីហោរាសាស្ត្រខ្មែរ។ ទីតាំងខ្លះមានពីរដង ព្រោះកម្មវិធីមានការទស្សន៍ទាយច្រើនជាងមួយ។ ទាំងនេះជាជំនឿប្រជាប្រិយ មិនមែនវិទ្យាសាស្ត្រទេ សូមអានដើម្បីកម្សាន្ត។ បើប្រជ្រុយប្ដូរទំហំ រាង ឬពណ៌ ហូរឈាម ឬរមាស់ សូមទៅជួបគ្រូពេទ្យ។

សំណួរដែលសួរញឹកញាប់

ប្រជ្រុយនៅលើច្រមុះមានន័យដូចម្ដេច?

តាមជំនឿនេះ ប្រជ្រុយច្រមុះ ថាជាមនុស្សមានសំណាងខ្លាំង និងមានសមត្ថភាពផ្លូវភេទខ្ពស់។ ប្រជ្រុយនៅចុងច្រមុះ ចំពោះបុរសអាចមានឈ្មោះបោះសំឡេង និងបានចំណូលតែក្នុងរយៈពេលខ្លី ចំណែកស្ត្រីមានជោគលាភ និងជោគទ្រព្យល្អ។

ប្រជ្រុយនៅលើបបូរមាត់មានន័យដូចម្ដេច?

ប្រជ្រុយបបូរមាត់ ថាជាមនុស្សមានចិត្តមេត្តាករុណា ត្រូវបានបងប្អូនញាតិមិត្តស្រឡាញ់ ប៉ុន្តែមិនត្រូវល្មោភស៊ីល្មោភផឹកឡើយ។ ប្រជ្រុយនៅលើបបូរមាត់ទាក់ទងនឹងការមានកូនភ្លោះ ហើយប្រជ្រុយនៅក្រោមបបូរមាត់ ថាជីវិតតែលតោល លើកលែងតែប្រជ្រុយពណ៌ខ្មៅរលោង។

ប្រជ្រុយនៅក្រោមភ្នែក ល្អឬអាក្រក់?

តាមជំនឿខ្មែរ ប្រជ្រុយនៅក្រោមភ្នែក ថាជាមនុស្សសម្បូរស្នេហ៍ ច្រើនជួបរឿងស្នេហា និងទុក្ខច្រើន ដូច្នេះពេលមានទំនាក់ទំនងស្នេហា មិនត្រូវងប់ងល់ខ្លាំងពេកឡើយ។

តើប្រជ្រុយអាចប្រាប់ពីជោគវាសនាបានពិតមែនឬ?

មិនមានភស្តុតាងវិទ្យាសាស្ត្រគាំទ្រការមើលប្រជ្រុយទេ វាជាជំនឿបុរាណ និងជាផ្នែកមួយនៃវប្បធម៌ខ្មែរ។ អ្វីដែលសំខាន់ជាងគេគឺសុខភាព៖ បើប្រជ្រុយណាប្ដូររាង ធំឡើង ហូរឈាម ឬរមាស់ សូមឲ្យគ្រូពេទ្យពិនិត្យ។

ការទស្សន៍ទាយ