រំលងទៅមាតិកា

ជំនឿ និងទំនៀមផ្សេងៗ

ថ្ងាសបង្ហាញនិស្ស័យរបស់មនុស្ស

ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។

ថ្ងាសមានទម្រង់៤ជ្រុងទ្រវែង: អ្នកមានទម្រង់ថ្ងាសបែបនេះអាចបង្ហាញឲ្យដឹងថាជាមនុស្សពូកែធ្វើការងារ។មនុស្សនេះស័ក្តិសមនឹងប្រកបអាជីពជាអ្នកជំនួញគ្រប់ប្រភេទ។ជាអ្នកមានចិត្តទូលំទូលាយតែរឹងមាំមិនទន់ទោរទៅតាមជំនោរព្រោះគេមានហេតុផលគ្រប់គ្រាន់ ជាពិសេសមានការពិចារណានិងម៉ត់ចត់គ្រប់រឿងរ៉ាវទាំងអស់មិនថារឿងតូច ឬរឿងធំក៏ដោយចុះ។

លើសាច់ថ្ងាសមានស្នាមជ្រីវជ្រួញ: ភាគច្រើនស្នាមជ្រីវជ្រួញស្បែកនៅត្រង់បរិវេណនេះ គឺជាតួអក្សរ M។អ្នកមានស្នាម បែបនេះលេចឡើងនៅលើថ្ងាស យើងអាចទស្សន៍ទាយបានថាជាមនុស្សដែលអាចចូលក្នុងចំណោមមនុស្សគ្រប់សណ្ឋានគ្រប់ពេលវេលាទាំងអស់។ គុណសម្បត្តិពិសេសរបស់គេគឺមានការទទួលខុសត្រូវបានគ្រប់គ្រាន់ និងស្មោះត្រង់អាចជឿទុកចិត្តបាន។

សាច់ថ្ងាសមានស្នាមជ្រួញបន្តិចបន្តួច: ស្នាមជ្រីវជ្រួញនេះក៏មានសណ្ឋានស្រដៀវទៅនឹងអក្សរ Mព្រាលៗយ៉ាងដូច្នោះដែរ។ សម្រាប់អ្នកមានស្នាមបែបនេះគឺលាតត្រដាងឲ្យយើងបានដឹងថាជាមនុស្សម្នាក់សំបូរទៅដោយគំនិតផ្តួចផ្តើមថ្មីៗ ក៏ប៉ុន្តែទន្ទឹមនឹងចំណុចល្អខាងលើនេះក៏គេនៅមានចំណុចខ្សោយផងដែរនោះគឺក្នុងពេលប្រឈមជាមួយស្ថានការណ៍តឹងតែងខ្លះគេបែរជាមិនអាចគ្រប់គ្រងខ្លួនឯងបាន។ ជាងនេះទៅទៀតមនុស្សនេះក៏មិនសូវចេះកំប៉ិកំប៉ុកជាមួយនឹងនរណាទៀតផង។

សាច់ថ្ងាសសមានរាងត្រងិល ឬឆកធំ: អាចចាត់ទុកថា ជាមនុស្សម្នាក់ទទួលបានពរពីឋានសួគ៌ ព្រោះអ្នកដែលមានសណ្ឋានថ្ងាសត្រងិលឬឆកបែបនេះគេមានសមត្ថភាពពេញលេញ មានប្រាជ្ញាមុះមុត ឈ្លាសវៃនិងធ្វើអ្វីៗប្រកបដោយហេតុផលមិនប្រើអារម្មណ៍ធ្វើជាត្រីមុខ។ អ្នកដែលបានសេពគប់ជាមួយមនុស្សម្នាក់នេះ អាចជឿជាក់លើការសម្រេចចិត្តរបស់គេបានគ្រប់ការងារទាំងអស់ ដោយមិនចាំបាច់ព្រួយបារម្ភនោះឡើយ។

ថ្ងាសរាងប៉ោងមូល: អាចពោលថា ជាមនុស្សមានលក្ខណៈពិសេសម្នាក់ផងដែរ ព្រោះថាមនុស្សមានសណ្ឋានថ្ងាសរាងប៉ោងមូលបែបនេះ បង្ហាញឲ្យឃើញពីអ្នកពូកែគិតចូលចិត្តធ្វើការប្រកួតប្រជែងជាមួយអ្នកដទៃដោយបើកបង្ហើបមិនលាក់លៀម ព្រមទាំងមានសមត្ថភាពដោះស្រាយ បញ្ហានៅចំពោះមុខបានយ៉ាងពូកែទៀតផង។ ជាពិសេសមនុស្សនេះមានការតាំងចិត្តយ៉ាងរឹងមាំមិនងាយរារែកនោះឡើយ។

ថ្ងាសរាងចង្អៀតហើយខ្លី: សម្រាប់មនុស្សចុងក្រោយនេះ គ្រាន់តែយើងមើលឃើញពីសណ្ឋានថា្ងសរបស់គេ ក៏អាចដឹងត្រួសៗ ជាមុនទៅហើយថា មានអំណាចពីធម្មជាតិមិនសូវជាពេញលេញល្អជាមុនរួចទៅហើយ ព្រោះមនុស្សមានសាច់ថ្ងាសខ្លីហើយចង្អៀតបែបនេះ បញ្ជាក់បានថា ជាមនុស្សមិនសូចឆ្លាត ខ្វះគំនិតផ្តួចផ្តើមថ្មីៗ ហើយចាំធ្វើតែតាមគេប្រើបែបដែលគ្មានគំនិតដុះដាល ឬបើនិយាយឲ្យខ្លីជាមនុស្សមានគំនិតសុញនោះឯង៕

ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។