រំលងទៅមាតិកា

ផ្ទះ និងការសាងសង់

ក្បួនជីករណ្តៅសង់ផ្ទះ

ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។

ការជីករណ្តៅសង់ផ្ទះ ត្រូវរើសយកថ្ងៃល្អ ឬក្សល្អ ត្រូវដឹងរឿងនាគបែរមុខទៅទិសណា? គឺថា ខែណានាគបែរក្បាលទៅទិសណា? កន្ទុយទៅទិសណា? ពោះទៅទិសណា? ខ្នងទៅទិសណា? ក្នុងការចូលទៅជីករណ្តៅទៀតសោត ត្រូវចូលពីទិសខាងណា? កាយដីទៅទិសណា ទើបបានល្អ។ ភាគច្រើនគេឲ្យជីកត្រង់ទិសនៃពោះនាគ ដូចកាយយកទ្រព្យចញពីពោះនាគ។ ក្នុងការចូលទៅជីកនោះដែរ គេត្រូវដឹងពីរឿងស្តេចក្រុងពាលីផ្ទុំ(ដេក)បែរក្បាលទៅទិស ខាងណា? ជើងទៅទិសខាងណា? ព្រោះត្រូវចូលពីខាងចុងជើងទើបបានល្អ។ ក្រៅពីនោះនៅមានគាថា សំរាប់សូត្រមុនជីក ខណៈដែលជីក និងក្នុងពេលដែលជីកថែមទៀត។

១-ស្តេចក្រុងពាលី អ្នកណាក៏ដោយទោះជាមានការត្រូវជីកស្រះ ជីកអណ្តូង សាងចេតិយ សាងសាលា ព្រះវិហារ កោរជុក បួសនាគ រៀបការ សង់ផ្ទះ ៘ ត្រូវតែបូជាដល់ស្តេចក្រុងពាលីជាមុនសិនទើបរស់នៅបានសុខដុមរម្យនា។ ស្តេចក្រុងពាលីត្រូវបានគេចាត់ទុកថាជាម្ចាស់ធរណី ជាទេពថែរក្សាផែនដី ឬក៏ជាស្តេចព្រះភូមិក៏ថាបានដែរ។

១-១ក្បួនចែងអំពីថ្ងៃស្តេចក្រុងពាលីផ្ទុំ

-អាទិត្យ៖ សិរសា(ក្បាល)ស្តេចក្រុងពាលីបែរទៅឦសាន(ខាងជើងឆៀងខាងកើត), ជើងទៅពាយ័ព្យ(ខាងជើងឆៀងខាងលិច)។ចូលទៅបូជាខាងចុងជើង។

-ច័ន្ទ៖ សិរសា ស្តេចក្រុងពាលីបែរទៅអគ្នេយ៍(ខាងត្បូងឆៀងខាងកើត), ជើងទៅពាយ័ព្យ។ ចូលទៅបូជាខាងចុងជើង។

-អង្គារ ៖ សិរសា ស្តេចក្រុងពាលីបែរទៅទក្សិណ(ខាងត្បូង), ជើងទៅឧត្តរ(ខាងជើង)។ ចូលទៅបូជាខាងចុងជើង។

-ពុធ៖ សិរសា ស្តេចក្រុងពាលីបែរទៅនិរតី(ខាងត្បូងឆៀងខាងលិច), ជើងទៅឧត្តរ។ចូលទៅបូជាខាងចុងជើង។

-ព្រហស្បតិ៍៖ សិរសា ស្តេចក្រុងពាលីបែរទៅបស្ចឹម(ខាងលិច), ជើងទៅបូព៌ា(ខាងកើត)។ចូលទៅបូជាខាងចុងជើង។

-សុក្រ៖ សិរសា ស្តេចក្រុងពាលីបែរទៅពាយ័ព្យ, ជើងទៅអគ្នេយ៍។ចូលទៅបូជាខាងចុងជើង។

-សៅរ៍៖ សិរសា ស្តេចក្រុងពាលីបែរទៅទក្សិណ, ជើងទៅឧត្តរ។ចូលទៅបូជាខាងចុងជើង។

១-២-ក្បួនចែងអំពីខែស្តេចក្រុងពាលីផ្ទុំ

-ខែ៥៖ ស្តេចក្រុងពាលីផ្ទុំ(ដេក)សិរសា ទៅឦសាន, ការបូជាត្រូវបែរមុខទៅទិសខាងត្បូង។

-ខែ៦ ៖ ស្តេចក្រុងពាលីក្រោកឡើងអង្គុយ បែរមុខទៅទិសនិរតី, ការបូជាត្រូវបែរមុខទៅទិសខាងកើត។

-ខែ៧ ៖ ស្តេចក្រុងពាលីក្រោកឡើងអង្គុយ បែរមុខទៅទិសខាងលិច, ការបូជាត្រូវបែរមុខទៅទិសខាងកើត។

-ខែ៨ ៖ ស្តេចក្រុងពាលីក្រោកឈរបែរមុខទៅពាយ័ព្យ, ការបូជាត្រូវបែរមុខទៅទិសខាងត្បូង។

-ខែ៩ ៖ ស្តេចក្រុងពាលីក្រោកឈរបែរមុខទៅគ្រប់ទិស, ការបូជាត្រូវបែរមុខទៅទិសនិរតី។

-ខែ១០ ៖ ស្តេចក្រុងពាលីក្រោកឈរបែរមុខទៅទិសខាងកើត, ការបូជាត្រូវបែរមុខទៅទិសខាងលិច។

-ខែ១១ ៖ ស្តេចក្រុងពាលីក្រោកឈរបែរមុខទៅទិសអគ្នេយ៍, ការបូជាត្រូវបែរមុខទៅទិសខាងជើង។

-ខែ១២ ៖ ស្តេចក្រុងពាលីក្រោកឈរបែរមុខទៅទិសឦសាន, ការបូជាត្រូវបែរមុខទៅទិសខាងត្បូង។

-ខែ១ ៖ ស្តេចក្រុងពាលីផ្ទុំសិរសាទៅទិសឦសាន, ការបូជាត្រូវបែរមុខទៅទិសនិរតី។

-ខែ២ ៖ ស្តេចក្រុងពាលីក្រោកឡើងអង្គុយបែរមុខទៅទិសឦសាន, ការបូជាត្រូវបែរមុខទៅទិសពាយ័ព្យ។

-ខែ៣ ៖ ស្តេចក្រុងពាលីផ្ទុំបែរមុខទៅទិសពាយ័ព្យ, ការបូជាត្រូវបែរមុខទៅទិសនិរតី។

-ខែ៤៖ ស្តេចក្រុងពាលីផ្ទុំបែរមុខទៅទិសខាងត្បូង, ការបូជាត្រូវបែរមុខទៅទិសអគ្នេយ៍។ កំណត់សំគាល់ៈការដើរចូលទៅធ្វើពិធីបូជាត្រូវចូលខាងទិសចុងជើងតាមថ្ងៃ។ ពេលអង្គុយចុះធ្វើការបូជា ត្រូវបែរមុខឆ្ពោះតាមទិសនៃខែវិញ។

២-តម្រានាគប្រែក្បាល

-ខែ៤, ៥, ៦ ៖ ក្បាលទៅទិសខាងលិច, កន្ទុយទៅទិសខាងកើត, ពោះទៅទិសខាងជើង, ខ្នងទៅទិសខាងត្បូង, ពិសទៅទិសពាយ័ព្យ, ជីករណ្តៅបែរមុខទៅទិសខាងកើត, បារអាចម៍ដីទុកទៅទិសខាងជើង, ចុងសសរកន្លោងទៅទិសឦសាន។

-ខែ១០, ១១, ១២ ៖ ក្បាលទៅទិសខាងកើត, កន្ទុយទៅទិសខាងលិច, ពោះទៅទិសខាងជើង, ខ្នងទៅទិសខាងត្បូង, ពិសទៅទិសអាគ្នេយ៍, ជីករណ្តៅបែរមុខទៅទិសខាងលិច, បារអាចម៍ដីទុកទៅទិសខាងត្បូង, ចុងសសរកន្លោងទៅទិសអាគ្នេយ៍។

-ខែ១, ២, ៣ ៖ ក្បាលទៅទិសខាងត្បូង, កន្ទុយទៅទិសខាងជើង, ពោះទៅទិសខាងលិច, ខ្នងទៅទិសខាងកើត, ពិសទៅទិសនិរតី, ជីករណ្តៅបែរមុខទៅទិសខាងជើង, បារអាចម៍ដីទុកទៅទិសខាងលិច, ចុងសសរកន្លោងទៅទិសនិរតី។

៣-ពិធីកម្មក្នុងពេលជីករណ្តៅ ការសុំទឹកសុំដី ដើម្បីសង់ផ្ទះពីស្តេចក្រុងពាលី ទៅតាមរបៀបខ្មែរមានយ៉ាងដូច្នេះគឺ ៖

១- ស្លាធម៌មួយគូរ

២- ផ្កា៥, ធូបទៀន សំពត់ស១ផ្ទាំង

៣- ពែដាក់បាយសម្ល បង្អែម នំអន្សម សណ្តែក ល្ង អំបោះ ម្លូស្លា បារី

៤- ទឹកផឹក ពួកគ្រឿងក្រអូប ដូចជា ម្សៅ ទឹកអប់ផ្សេងៗ កាលបើបានរបស់អស់ទាំងនេះហើយ ក៏ដើរចូលទៅតាមទិសចុងជើងស្តេចក្រុងពាលី លុតជង្គង់ចុះដាក់របស់របរពែនៅក្នុងរណ្តៅ ចំណែករបស់ផ្សេងទៀតដាក់នៅលើដី ដុតធូបទៀន សក្ការៈបូជាហើយ សូត្រនមោ(បីចប់) រួចហើយពោលនូវគាថាដូច្នេះថា៖ "

ឧម បទុមុត្តរោ ចបូរពា អគ្នេយ្យេ ចរេវតោ ទក្ខិណេ កស្សបោ ពុទ្ធោ សូមអញ្ជើញស្តេចក្រុងពាលី ម្ចាស់នៃធរណី មកទទួលយកនូវគ្រឿងដង្វាយ ដែលអញខ្ញុំបូជា ទៀនធូប មាលា បាយចំណីត្រីសាច់ ល្ងសណ្តែក ព្រមទាំង គ្រឿងក្រអូបឌួងចន្ទ័ទាំងអស់ហោង" ។ បន្ទាប់មកក៏ប្រាប់សូមការអនុញ្ញាតសង់ផ្ទះនៅត្រង់នេះ សូមឲ្យកូនចៅនៅជាសុខសប្បាយ ៘ ទៅតាមរឿងរ៉ាវដែលបានប្រាថ្នា តាមការពោលរបស់អ្នកអាចារ្យ។កាលបើបានឃើញថា លោកទទួលយកនូវគ្រឿងដង្វាយយូរល្មមសមគួរហើយ ក៏យកដីលប់ពែ ឲ្យនៅក្នុងរណ្តៅនោះទៅ។ ចំណែកឯរបស់របរ គ្រឿងបូជាផ្សេងៗ លោកអាចារ្យអ្នកកាន់ពិធីជាអ្នកទទួលយកទៅ។ ក្រោយមកចូលទៅជីករណ្តៅតាមឬក្សថ្ងៃ តាមនាគប្រែក្បាលដោយមានគាថាដូចបានជម្រាបជូនខាងលើ។ភាគច្រើនគេ ជីករណ្តៅសសរកន្លោងមុន។ អាចារ្យអ្នកកាន់ពិធីធ្វើការជីកត្រឹមតែបីដង ហើយក៏ថយចេញទុកឲ្យអ្នកផ្សេងជីកបន្តរហូតចប់រួចរាល់។

៤-វត្ថុមង្គលដាក់បាតរណ្តៅ បាតរណ្តៅនៃសសរខាងមុខទាំង៤ ឬសសរបន្ទប់ដេកនោះឲ្យដាក់របស់ដូចតទៅនេះគឺ៖

១- មាសទឹកដប់(មាសនព្វគុណ),

២- ប្រាក់១,

៣- សំរឹទ្ធិ១,

៤- ស្ពាន់ក្រហម១,

៥- ខ្លាញ់គោ១(គោខ្មៅ),

៦- ខ្លាញ់ក្របី(មហឹង្សា),

៧- ស្លឹកប្រយង្គុ១,

៨- ស្លឹកកន្ទី១,

៩- ស្លឹកលំពាន់១,

១០- ម្នាងសិលា១,

១១- ស្ពាន់ធ័រ១,

១២- សម៉ទេស១,

១៣- ស្មី១,

១៤- ស្លឹកមាស១(ផ្លែភូ ឬបាន),

១៥- ស្លឹកពៅ១,

១៦- ឬសទទឹម១,

១៧- អាចម៍គោ,

១៨- អាចម៍ពពែ,

១៩- ស្លឹកឈូក,

២០- ផ្កាខ្ទឹង,

២១- កេសរឈូកស,

២២- ល្ងខ្មៅ,

២៣- ល្ងស,

២៤- គ្រាប់សណ្តែកលឿង,

២៥- ស្រូវដំណើបខ្មៅ១ចំនួន,

២៦- ទឹកឃ្មុំ វត្ថុទាំងអស់នេះដាក់នៅបាតរណ្តៅ ហើយហាមប្រើលាជ និងអង្ករ។វត្ថុទាំងអស់នេះមានចំនួនច្រើនណាស់ ហើយពិបាកនឹងរកទៀតផង ហេតុនេះក្នុងពិធីក្រោយៗមកគេសង្ខេបប្រើតែរបស់ខ្លះៗប៉ុណ្ណោះ។ ទោះជាយ៉ាងនេះក្តីវត្ថុនិមួយៗសុទ្ធតែមានគុណសៃយ្យផ្សេងៗគ្នា។

៥-ប្រផ្នូល(និមិត្ត)ពេលជីករណ្តៅសង់ផ្ទះ ខណៈពេលដែលត្រូវជីករណ្តៅសង់ផ្ទះ បើសិនជាមានហេតុការណ៍អ្វីកើតឡើង ចាស់ទុំចាត់ទុកថាជានិមិត្ត(ប្រផ្នូល) ហើយឲ្យទាយដូចខាងក្រោមនេះ។ -បើសិនមានមនុស្សស្លៀកដណ្តប់ខ្មៅ មកពីទិសបស្ចឹម ម្ចាស់ផ្ទះនឹងស្លាប់។ -បើសិនជាមានមនុស្សចូលមកដោយស្លៀកសំពត់ក្រហម ឬសៀតផ្កាពណ៌ក្រហម ឬមានជាសញ្ញាផ្សេងៗដែលជំនួសឲ្យភ្លើងបាន ត្រូវប្រយត្ន័ភ្លើងឆេះផ្ទះ។ -បើសិនមានមនុស្សស្លៀក ឬទទូគ្រប ឬពាក់អាវពណ៌ដូចជាចីវរព្រះសង្ឃដើរចូលមក សុំកុំឲ្យចូល ព្រោះនឹងមានហេតុខ្វល់ខ្វាយ ច្របូកច្របល់មិនចេះស្ងប់។ -បើសិនមានមនុស្សយកសត្វជើងបួន ជើងពីរ ទោះជាមកពីទិសខាងណាក៏ដោយ ឲ្យទិញសត្វនោះហើយលែងចោលទៅ នឹងរំដោះអស់គ្រោះផងទាំងពួង។ -បើសិនជាមានសុនខ(ឆ្កែ)មកពីទិសខាងទក្សិណ(ត្បូង) សំដែងឲ្យឃើញថាម្ចាស់ផ្ទះនឹងរស់នៅយូរអង្វែង។ -បើសិនជាមានសុនខមកពីទិសអគ្នេយ៍(ខាងត្បូងឆៀងខាងកើត)សំដែងថាម្ចាស់ផ្ទះនឹងទ័លក្រលំបាក ឲ្យប្រញាប់ដេញវាត្រឡប់ទៅវិញ។ -បើសិនជាមានមនុស្សយកមាស ប្រាក់ អង្ករ របស់របរមកឲ្យជានិមិត្តល្អថានឹងមានបាន៕(តាមឯកសារបុរាណ)

ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។