រំលងទៅមាតិកា

ហុងស៊ុយ

ដីបែបណាត្រូវតាមក្បួនហុងស៊ុយ

ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។

១. ត្រូវចេះសាកសួរពីប្រវត្តិដី ប្រការនេះសំខាន់ណាស់ពីព្រោះមនុស្សភាគច្រើនតែងមិនគិតដល់បញ្ហាមួយនេះទេ។បើតាមគោលការណ៍របស់ក្បួនហុងស៊ុយនោះបានឲ្យដឹងថាបញ្ហាប្រវត្តិដីគឺ យើងមិនអាចមើលរំលងបានទេ ព្រោះថាបើកាលណាយើងទិញប៉ះចំដីវាលកប់ខ្មោច ដីដែលមានមនុស្សស្លាប់ជាក្រុមដូចជាសង្គ្រាម ក្រឡាប់រថយន្ត ឬកើតឧបទ្ទវហេតុអាក្រក់នានាតែងជាដីមិនល្អ និងបើសាងសង់ផ្ទះ ចាត់ទុកថាអពមង្គលរស់នៅមិនសូវបានសុខដុមសោះឡើយ។ បើដីមានប្រវត្តិបែបនេះហាមសាងសង់ផ្ទះដាច់ខាត ពីព្រោះតាមក្បួនហុងស៊ុយចាត់ទុកថាជាលក្ខណៈដីដែលទម្លាក់ផលអាក្រក់ឲ្យអ្នករស់នៅលើដីនេះ។ក្រៅពីនេះក៏នៅមានការរំខានពីវិញ្ញាណខ្មោចបិសាចនៅបរិវេណទីនោះដែលនាំឲ្យការរស់នៅមានតែបញ្ហាកើតឡើងមិនចេះចប់ចេះហើយ។

២. ពិនិត្យមើលពីកម្ពស់ដី កម្រិតកម្ពស់ដីជាផ្នែកមួយទៀតដែលសំខាន់ក្នុងក្បួនហុងស៊ុយ។យើងចាំបាច់ត្រូវត្រួតពិនិត្យមើលពីសភាពស្ថានដីជុំវិញឲ្យបានច្បាស់លាស់ហើយបើមានត្រង់ណាខ្ពស់ទាបត្រូវចាក់បំពេញឲ្យបានស្មើល្អទើបប្រសើរ។យើងត្រូវចងចាំថាផ្ទៃដីដែលមានលក្ខណៈល្អចាំបាច់ត្រូវមានកម្រិតកម្ពស់ផ្ទៃដីមិនខុសប្លែកពីគ្នាខ្លាំងដោយយើងសម្លឹងយកពីផ្ទៃដីផ្លូវថ្នល់ផ្នែកខាងមុខជាគោល។ត្រូវចងចាំថាដីដែលខ្ពស់ជាងផ្លូវថ្នល់តែងតែល្អជាងដីដែលទាបជាងផ្លូវថ្នល់។ ចំណែកផ្ទះដែលសាងសង់នៅទាបជាងផ្លូវថ្នល់តែងបង្កឲ្យផ្ទះនោះបាត់បង់ជោគលាភ ព្រោះថា ជោគអាក្រក់នោះមានការបៀតបៀនយាយីច្រើនឯជោគល្អនោះមានការខ្សត់ខ្សោយ។ ក្រៅពីនេះមនុស្សរស់នៅក្នុងផ្ទះមានអារម្មណ៍សោះកក្រោះ ខ្វះភាពរស់រវើកដែលជាហេតុធ្វើឲ្យដំណើរជីវិតជួបតែភាពរដិបរដុបយាយីច្រើន។

៣. ផ្ទៃដីដែលមានជម្រាលផ្អៀង ស្ថានដីដែលមានលក្ខណៈបែបនេះចាត់ទុកថាមិនល្អហើយមិនគួរសាងសង់ផ្ទះរស់នៅឡើយពីព្រោះថាផ្ទះដែលសាងសង់នៅលើដីជម្រាលពុំផ្តល់ជោគលាភល្អទេគឺតែងមានឧបសគ្កនិងបញ្ហាចូលលុកលុយយាយីញឹកញាប់ផង។មិនថាផ្ទៃដីស្ថិតនៅលើទីខ្ពស់និងជម្រាលទាបគឺពុំផ្តល់ជោគលាភល្អដូចគ្នា។ចំណែកផ្ទៃដីផ្ទះដែលនៅផ្នែកខាងមុខខ្ពស់ជាងផ្នែកខាងក្រោយក៏ចាត់ទុកថាអាក្រក់មិនត្រូវតាមក្បួនហុងស៊ុយដែរ។ សម្រាប់ជម្រាលដែលល្អគឺបើ ចង់សាងសង់ផ្ទះឲ្យបានជោគល្អត្រូវជ្រើ់សរើសធ្វើយ៉ាងណាឲ្យខាងក្រោយផ្ទះស្ថិតក្នុងបរិវេណជម្រាលខ្ពស់ ឯមុខផ្ទះជម្រាលទាបទើបផ្តល់ជោគលាភល្អជាង។

៤. ដីច្រមុះជ្រូក ទីតាំងដីបែបនេះត្រូវបានគេចាត់ទុកថាមិនល្អទាល់តែសោះពីព្រោះបរិវេណមានការប៉ះទង្គិចដោយផ្ទាល់ ហើយបើចង់កាត់បន្ថយពីចង្រៃឧបទ្រពចេញខ្លះមានតែជ្រើសរើសធ្វើទ្វារចូលមិនឲ្យចំត្រង់ច្រមុះជ្រូកប៉ុណ្ណោះ។

៥. រូបទម្រង់ដីល្អនិងមិនល្អ ដីរាងចតុកោណកែងឬការ៉េត្រូវបានគេចាត់ទុកថាជាប្រភេទដីល្អបំផុត។ចំណែកប្រភេទដីរាងត្រីកោណត្រូវបានគេចាត់ទុកថាអាក្រក់បំផុត ប៉ុន្តែសម្រាប់ដីរាងផ្សេងៗទៀតដូចជាងរាងអក្សរTអក្សរL ចតុកោណស្មើ ចតុកោណព្នាយនិងរាងប្លែកៗដទៃទៀតដែលគ្មានជ្រុងណាមួយស្មើគ្នា ចាំបាច់ត្រូវពិនិត្យដូចខាងក្រោមដើម្បីឲ្យដឹងថាល្អឬអាក្រក់៖

ឧទាហរណ៍ដូចជាដីរាងចតុកោណព្នាយបើករណីដែលជម្រៅចូលជ្រៅមានលក្ខណៈល្អជាងមានមុខធំ តែជម្រៅរាក់។ ទោះបីបែបណាក្តី ក្នុងករណីដែលទទឹងមានត្រឹម៥ម៉ែត្រតែជម្រៅមានដល់ទៅជាង៣០ម៉ែត្រក៏ពុំសូវល្អប៉ុន្មានដែរ ព្រោះថាជោគលាភចូលមិនដល់ក្រោយ។ចំណែកដីដែលមានមុខទទឹងធំ តែជម្រៅរាក់វិញក៏ជះផលអាក្រក់ដូចគ្នាព្រោះថាជោគលាភងាយហូរចេញមិនអាចរក្សាទុកបានយូរឡើយ។ ចំពោះដីរាងត្រីកោណត្រូវបានគេចាត់ទុកថាជាប្រភេទរូបទម្រង់ដីអាក្រក់បំផុតក៏ព្រោះថាការសាងសង់ផ្ទះឬអគារនានាតែងជួបការលំបាកហើយបើករណីសង់ផ្ទះកណ្តាលដីនាំឲ្យខូចផ្ទៃដីថែមទៀត៕

ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។