រំលងទៅមាតិកា

ហុងស៊ុយ

បំរាមពេលសាងសង់ផ្ទះ

ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។

បំរាមខាងក្រោមនេះស្រាវជ្រាវដោយលោកបណ្ឌិតមីសែលត្រាណេ និងមានបោះពុម្ពផ្សាយនៅក្នុងសៀវភៅ “វប្បធម៌ខ្មែរសុរិន្ទ្រ-ភាគទីមួយ”។ តាមការរៀបរាប់របស់លោកបណ្ឌិតបំរាមនេះចងក្រងឡើងតាមការស្រាវជ្រាវ និងសម្ភាសន៍មួយចំនួនដូចជា: តម្រាព្រះគ្រូភ្រីងមេធំការ ចៅអធិការវត្តបានតាណាំង, តម្រារបស់ព្រះគ្រូបនពូជិតោ ចៅអធិកាវត្តបានឃោកពុ សង្កាត់ថ្ម ស្រុកប្រាសាទ ខេត្តសុរិន្ទ្រ និងកិច្ចសម្ភាសន៍ជាមួយលោកអុំឥន្ទ្រ ក្លាញីងនៅភូមិបុទុម។ មានបំរាម ១០ ដែលមិនត្រូវបំពានពេលសាងសង់ផ្ទះសម្បែង:

១. ហាមមិនឲ្យធ្វើផ្ទះដែលដីនៅទីសាងសង់នោះមានឬសឈើ គល់ឈើ ឬក៏បង្គោលឈើកប់នៅពីក្រោម បើមិនដូច្នោះទេមានឬសឈើចាស់ៗយូរហើយដែលនៅក្នុងដីស្រាប់។ បើសិនជាសង់ផ្ទះលើទីបែបនោះនឹងកើតមានទោសឈឺពោះ ដូចជាមានអ្វីមកចាក់ដោតក្នុងពោះអញ្ចឹង។ ចាំបាច់ត្រូវជីកយករបស់អស់នោះចេញឲ្យអស់សិនសឹមសង់នៅពីលើទីនោះ។

២. ហាមសង់ផ្ទះលើឬសសីមាចាស់ វត្តចាស់ ឬក៏មានគេបញ្ចុះអាថ័នទុករួចហើយ។ ក្នុងករណីមិនដឹងគេនិយមនិមន្តព្រះសង្ឃទៅសូត្រដកសីមាសិន

៣. ហាមសង់ផ្ទះលើផ្លូវចាស់, ផ្លូវទឹកហូរចាស់ៗ ឬហាមសង់នៅក្នុងលក្ខណៈដែលតួផ្ទះមានភ្លឺស្រែសឹករិចរឹល, បង្គោលរបងកំបុត, ផ្លូវដើរ, ឬក៏ថ្នល់ចាស់បុកមកចំ ព្រោះនឹងកើតរោគភ័យរកមូលហតុមិនឃើញ។ បើសិនជាមានករណីបែបនេះហើយចៀសវាងមិនបាន ត្រូវដោះស្រាយដោយដាំដើមទាល់ចំត្រង់ពីលើចុងបង្គោល ឬចំផ្លូវនោះ ដើម្បីកុំឲ្យកម្លាំងអាថ៌កំបាំងធ្វើអ្វីបាន។ ក៏ប៉ុន្តែចំពោះជនជាតិចិនវិញ គេនិយមដាក់កញ្ចក់ឆ្លុះស្រមោល ឬដាក់រូបសឹង្ហពាំដាវនៅត្រង់កន្លែងនោះ ដើម្បីកែខៃឲ្យទៅជាល្អវិញ។

៤. ហាមស្រះខាងត្បូងអណ្តូងខាងលិច បានន័យថា មិនឲ្យជីកស្រះនៅខាងត្បូងផ្ទះ និងជីកអណ្តូងនៅពីខាងលិចផ្ទះ ព្រោះជាអពមង្គលរកស៊ីមិនឡើង។ អ្នកចាស់ទុំបានផ្តល់ហេតុផលថា: ស្រះទឹកគឺជាអាងទឹកជ្រៅ រីឯខាងត្បូងមានន័យម្យ៉ាងថា ក្បាល(ដូចជាក្បាលចិញ្ចៀនឬត្បូងចិញ្ចៀនជាដើម)។ ក្បាលត្រូវតែខ្ពស់នៅលើផុតទើបល្អ តែបើជាអាងជ្រៅវិញបានន័យថា កំបុតក។ ចំណែកឯអណ្តូងទឹកនៅពីលិចវិញបានន័យថា មិនអណ្តែត វានឹងចុះទៅក្នុងអណ្តូង នឹងរកស៊ីអ្វីក៏មិនឡើងដែរ។

៥. ហាមយកឈើដែលគេធ្វើជង្រុកស្រូវ ឬក៏វត្តអារាមមកសង់ផ្ទះ។ មានជំនឿថា នឹងមានតែរឿងក្តៅក្រហាយមិនចេះអស់មិនចេះហើយ។

៦. ការធ្វើទ្វារផ្ទះ បើសិនជាមានទ្វារក្រោយ កុំឲ្យទ្វារមុខ និងទ្វារក្រោយនៅត្រង់គ្នា។ បើនៅត្រង់គ្នានឹងរក្សាទ្រព្យមិនគង់ឡើយ បានន័យថា រកបានដៃស្តាំចំណាយដៃឆ្វេង។

៧. សសរផ្ទះ បើសិនជាមានផ្ទះនៅជិតខាងគ្នាបញ្ច្រាសគ្នា សុំកុំឲ្យសសរផ្ទះរត់ត្រង់បន្ទាត់ជាមួយគ្នា នឹងមានរឿងទាស់ចិត្តទាស់គំនិតគ្នា ឬកើតរឿងឈ្លោះគ្នា។

៨. ជណ្តើរផ្ទះ កុំធ្វើកាំជណ្តើររាប់ទៅគត់ ព្រោះនឹងនាំមកនូវភ័យវិបត្តិដល់ម្ចាស់ផ្ទះ។

៩. ជណ្តើរផ្ទះហាមកុំឲ្យចុងសំយុងចុះទៅទិសខាងលិច ព្រោះនឹងនាំឲ្យឱនអាប់ធ្លាក់ដុនដាប។ បើធ្វើជណ្តើរជារង្វេលឡើង កុំធ្វើរង្វេលពទ្ធ័ទៅខាងឆ្វេង (គឺនៅពេលដើរត្រូវឡើងពទ្ធ័ខាងឆ្វេងដៃ) ជណ្តើរបែបនោះគេចាត់ទុកថា ជាជណ្តើរខ្មោចនឹងកើតរោគាព្យាធិហើយនឹងស្លាប់។

១០. សសរផ្ទះត្រូវត្រង់ហើយស្មើៗគ្នា កុំឲ្យមានសសរខ្លះតូចខ្លះធំ នឹងរស់នៅពុំសុខសប្បាយ។ ចំពោះរឿងសសរនេះ លោកហាមប្រើសសរដែលមានភ្នែកឈើ ៤ ប្រភេទ:

១០-១ ភ្នែកឈើត្រង់កំរិតកាយបាននៅជាប់ដី ហៅថា ភ្នែកឈើមាន់កកាយ។ ទោសរបស់ភ្នែកឈើមាន់កកាយ គឺទ្រព្យសម្បត្តិនឹងខ្ចាត់ខ្ចាយជួបវិបត្តិផ្សេងៗ។

១០-២ ភ្នែកឈើត្រង់កំរិតជ្រូកកកិតចំហៀងបាន ហៅថាភ្នែកឈើជ្រូកត្រដុស។ ជ្រូកត្រដុសនឹងធ្វើឲ្យកើតរឿងជាប់គុកជាប់ច្រវាក់ មានរឿងក្តីមនុស្សដទៃមួលបង្កាច់។

១០-៣ ភ្នែកឈើត្រង់ចំណុចបញ្ឈរដែលគេដាក់រត ហៅថាភ្នែកឈើទល់រត។ ភ្នែកឈើបែបនេះនឹងធ្វើឲ្យភ្លើងឆេះផ្ទះ ឬក៏ឈឺគ្រុនក្តៅ ហើយរក្សាព្យាបាលមិនជាឡើយ។

១០-៤ ភ្នែកឈើនៅត្រង់ចំណុចដែលគេវាយដែកគោល ឬចំណុចដែលគេដាក់គន្លឹះខ្លាស់រត ដែលដូចជា ចោះលើភ្នែកឈើនោះតែម្តង។ ភ្នែកឈើបែបនេះគេហៅថា ភ្នែកឈើស្លាក់ឡត (ខ្ទាស់បំពង់) ដែលនឹងធ្វើឲ្យពិបាកសំរាលកូ ន។នៅមានរបស់ដែលផ្តល់ទោសម្យ៉ាងទៀតដែលខ្មែរហៅថា ពាំសម្បក បានន័យថា មានស្នាមភ្នែកជារាងទ្រវែង ហើយមានសំបកនៅជាប់ក្នុងស្នាមដំបៅនៃសាច់ឈើនោះ។ ចាស់ទុំប្រកាន់ជឿថា នឹងឲ្យទោសយ៉ាងខ្លាំងជាទីបំផុត បើតាមឃើញកន្លងមកកន្លែងខ្លះបើសិនជាមានកូនប្រុស កូននោះច្រើនមិនគ្រប់ទឹក ឡប់ៗព្យាបាលយ៉ាងណាក៏មិនជាដែរអស់ជាច្រើនឆ្នាំ។ ក្រោយមកមានគេបញ្ជាន់រូបប្រាប់ឲ្យ យកសសរពាំសម្បកនោះចេញទើបកូននោះបានជាសះស្បើយ ដោយមិនទាំងបានព្យាបាលអ្វីផង។ គួរបញ្ជាក់ថា សសរពាំសម្បកនេះ ជួនកាលមើលពីខាងក្រៅមិនឃើញទេ ពីព្រោះមានសម្បកនៅរុំពទ្ធ័ក៏មានដែរ។ ត្រូវឲ្យគេបញ្ចូលរូបទើបបានដឹង។ទាក់ទងនឹងភ្នែកសសរនេះ បើសិនជាអារឡើងខាងលើហើយនោះលោកថា មិនជាអ្វីទេ។តម្រាខ្លះបានពោលថា សសរដែលមានភ្នែកជាលេខសេស (១,៣,៥,៧) ចាត់ទុកថា ល្អ បើសិនជាលេខគូ(២,៤,៦,៨) គឺមិនល្អទេ ត្រូវមានពិធីរំងាប់ពិសទោសរបស់សសរផ្ទះ ដោយការសូត្រគាថា ដាក់នឹងដែកគោល វាយត្រង់ភ្នែកសសរ សង្កត់ជំនាងឈើទុក ដោយសូត្រមន្ត ធរណីសារ៕

ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។