ហុងស៊ុយអំពីការទិញផ្ទះ
ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។
ក្នុងការជ្រើសរើសផ្ទះសម្រាប់ស្នាក់អាស្រ័យ មានមនុស្សមួយចំនួនតែងប្រកាន់នូវជំនឿផ្សេងៗ ទាំងតាមជំនឿពីបុរាណ និងជំនឿតាមក្បួនហុងស៊ុយ ហើយហុងស៊ុយខាងក្រោមនេះ អ្នកអានអាចស្វែងយល់អំពីជំនឿក្នុងការទិញផ្ទះ ដើម្បីឱ្យរស់នៅបានត្រជាក់ត្រជុំ មានសេចក្តីសុខ...
ក្នុងការជ្រើសរើសទិញផ្ទះ គេមានជំនឿថាគួរជ្រើសរើសទិញផ្ទះណាដែលមានទ្រង់ទ្រាយសមស្រប អាចជារាង៤ជ្រុងស្មើ ឬ ៤ជ្រុងទ្រវែង។ ពុំគួរទិញផ្ទះដែលមានរូបរាងប្លែកពេកនោះទេ ព្រោះអាចនឹងបាត់មុំ ឬជ្រុងណាមួយនៃផ្ទះដែលធ្វើឱ្យក្រុមគ្រួសារខាតលាភសំណាងនៅផ្នែកណាមួយ។ ឧទាហរណ៏ ផ្ទះដែលផត ឬគ្មានមុំ ឬជ្រុងទិសខាងលិច ធ្វើឱ្យគូស្វាមីភរិយាពិបាកមានបុត្រជាដើម។
បន្ទាប់មក អ្នកគួរពិនិត្យបរិវេណផ្ទះ និងធ្វើការសង្កេតមើល តើមានកន្លែងណាមានលូទឹក ខ្សែភ្លើង កន្លែងកប់ខ្មោច ប៉ាឆា ឬអ្វីផ្សេងៗទៀត ឬអត់? ព្រោះវត្ថុទាំងនោះ អាចនាំសំណាងអាក្រក់មកឱ្យផ្ទះ ដែលនៅក្បែរៗនោះ។ បន្ទាប់ពីនោះ គួរមើលជ្រុង ដំបូលផ្ទះ ឬការរចនាម៉ូតរបស់ផ្ទះដែលនៅជុំវិញផ្ទះនោះ មិនគួរឱ្យមានធ្នូពិឃាត ឬសសរភ្លើងផ្សេងៗ ស្ថិតនៅចំពីមុខ ឬបុកមកចំទ្វារចូលនៃផ្ទះនោះទេ។
សម្រាប់ជនជាតិអាស៊ី គេនិយមជ្រើសទិញផ្ទះបែរមុខទៅទិសខាងជើង ខាងត្បូង ឬខាងកើត។ សម្រាប់ជនជាតិលោកខាងលិច ឬអឺរ៉ុប គេនិយមជ្រើសទិញផ្ទះបែរមុខទៅទឹកពាយ័ព្យ ទិសនិរតី ឬទិសឦសាន។
ទ្វារចេញចូលគួរឱ្យមានភាពរឹងមាំ ដើម្បីការពារផ្ទះផង ក៏ដូចជាការពារក្រុមគ្រួសារផង និងត្រូវឱ្យមានទំហំធំ ដែលអាចនាំមកនូវលាភសំណាង ភាពរឹងមាំយូរអង្វែង។ នៅពេលមើលពីទ្វារផ្ទះ ចូលទៅក្នុងគួរជាទីធ្លាទទួលភ្ញៀវធំទូលាយ ពុំមែនតូចចង្អៀត នោះទេ ព្រោះអាចរាំងស្ទះភាពចម្រើនរុងរឿងចូលមកក្នុងផ្ទះ។
ទ្វារធំខាងមុខ មិនត្រូវឱ្យទល់មុខគ្នានឹងផ្ទះបាយ ឬទ្វារក្រោយទេ ព្រោះលក្ខណៈនេះ អាចធ្វើឱ្យមានប្រាក់ហូរចេញពីក្រុមគ្រួសារ និងមិនអាចរក្សាភាពគង់វង្សបាន។ កុំព្យួរកញ្ចក់នៅមុខទ្វារចេញចូល ព្រោះជាការបណ្តេញភ្ញៀវដែលធ្វើឱ្យគ្មានញាតិមិត្ត បងប្អូនមកលេងសួរសុខទុក្ខ។
កុំទិញផ្ទះដែលមានផ្ទះបាយស្ថិតនៅទិសពាយ័ព្យ (ខាងលិចឆៀងខាងជើង) នៃផ្ទះ ព្រោះអាចនឹងផ្តល់ផលអាក្រក់ដល់អ្នកជាឪពុក រួមទាំងការអសមត្ថភាពធ្វើជាឪពុកផងដែរ។ ក្នុងករណីដែលអ្នកជ្រុលទិញផ្ទះនេះហើយ ត្រូវប្រាកដថាចង្ក្រានបាយ មិនស្ថិតនៅទិសពាយ័ព្យនៃផ្ទះបាយឡើយ។ យកល្អគួរផ្លាស់ប្តូរទីតាំងផ្ទះបាយទាំងមូលតែម្តង ទើបជាការប្រសើរ។
បន្ទប់គេង គួរមានទំហំធំ និងផ្ទៃទូលាយ ដែលអាចឱ្យអ្នកដាក់ក្បាលគ្រែទៅតាមទិសមង្គលរបស់អ្នក។ កុំដាក់ក្បាលដំណេក ជាប់នឹងជញ្ជាំងបន្ទប់ទឹកព្រោះអាចបង្កឱ្យមានបញ្ហាដល់ជិវិតអាពាហ៏ពិពាហ៌ ឬសម្ព័ន្ធផ្សេងៗ នាអនាគត។ អ្នកគួរពិនិត្យមើលពិតាន គ្រប់ជ្រុងផងដែរ ដើម្បីឱ្យប្រាកដថា អ្នកមិនបានគេងនៅក្រោមធ្នឹម ទុយោទឹក នៃបន្ទប់ទឹក ឬបង្កន់នោះទេ។
ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។