វិធីជួយបន្ថែមដួងរាសីស្នេហា
ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។
ក្នុងរឿងសេចក្តីស្នេហានរណាក៏ចង់បានភាពផ្អែមល្ហែមនិងមានចំណងចងភ្ជាប់គ្នាយូរអង្វែងដែរ។ តើត្រូវធ្វើដូចម្តេចដើម្បីថែចំណងស្នេហារបស់អ្នកឱ្យបានស្ថិតស្ថេរហើយគ្មានថ្ងៃថាអាចបែកបាក់?នេះជាជំនឿដែលអ្នកអាចធ្វើការសាកល្បងបានដូចខាងក្រោម៖
បើអ្នកស្រឡាញ់គេខ្លាំងនិងមិនចង់ឱ្យគេងាករេចិត្តទៅរកអ្នកដទៃ ថ្ងៃណាមួយបើបានណាត់ចេញទៅជួបគ្នា លើកដំបូងឱ្យសាកល្បងរកឱកាសចាប់ដៃគេហើយប្រើម្រាមកូនដៃរបស់អ្នកថ្ពក់ជាមួយកូនដៃគេរួចហើយអធិដ្ឋាន”សុំឱ្យអ្នកស្មោះត្រង់ជាមួយខ្ញុំមិនចាប់អារម្មណ៍ជាមួយស្រីផ្សេងទៀត”។ ការប្រើម្រាមកូនដៃថ្ពក់ជាមួយគ្នាបែបនេះគឺជានិមិត្តរូបនៃពាក្យសច្ចាចងផ្សារភ្ជាប់បេះដូងរបស់អ្នកជាមួយគេទុក។
ដាំដើមឈើធំដែលមានផ្កាពណ៌សទុកបរិវេណជិតដំបូលផ្ទះមិនល្អ គេមានជំនឿថាបើសិនដាំដើមឈើមានផ្កាពណ៌សនោះពេលជ្រុះលើដំបូលផ្ទះអាចធ្វើឱ្យភាគីបុរសមានរោគជំងឺឬអាចជួបឧប្បត្តិហេតុណាមួយកើតឡើង។ទោះបីយ៉ាងណាយើងក៏អាចដាំដើមឈើដែលមានផ្កាពណ៌សក្នុងផ្ទះបានបើសិនមិនមែនជាដើមផ្កាអព្វមង្គលទេ។សម្រាប់ផ្កាដែលអព្វមង្គលយើងក៏អាចដាំបានដូចគ្នាដែរតែគួរដាំឱ្យឆ្ងាយពីតួផ្ទះដោយមិនឱ្យផ្កាទោរមកប៉ះត្រូវផ្ទះជាការស្រេច។
បើផ្លូវថ្នល់ឬផ្លូវដើរមុខផ្ទះមាន២ខ្សែបំបែកចេញពីគ្នាគួររកវិធីដោះស្រាយ ផ្លូវបំបែកមុខផ្ទះតែងបង្កការប៉ះពាល់ដល់ចំណងគូស្នេហ៍ឱ្យបែកខ្ញែកពីគ្នា។បើសិនមិនអាចផ្លាស់ចេញពីផ្ទះនោះបានឱ្យបំបាត់ភាពឧបទ្រពនេះដោយការនាំយកផើងដាំដើមឈើធំដែលមានកម្ពស់ខ្ពស់ល្មមដាក់់ទុកមុខផ្ទះចោលដើម្បីបាំងភ្នែកមនុស្សក្នុងផ្ទះមិនឱ្យសម្លឹងផ្លូវបំបែកនោះឃើញ។ក្រៅពីនេះកុំភ្លេចព្យួរគ្រាប់ឃ្លីគ្រីសតាល់ទុកមុខផ្ទះដើម្បីបំបាត់រាល់ឥទ្ធិពលអាក្រក់ទាំងនេះមិនឱ្យចូលក្នុងផ្ទះកើត។
បើសិនដាំដើមឈើក្នុងផ្ទះ គួរជ្រើសរើសដាំដើមណាដែលអាចរីកធំធាត់បានយ៉ាងពេញទីហើយអាចចេញស្លឹកផ្កាយ៉ាងស្រស់ស្អាត។កុំបណ្តោយឱ្យដើមឈើនោះស្វិតស្រពោនព្រោះថាអាចធ្វើឱ្យអ្នករស់នៅក្នុងផ្ទះសម្បែងមានអារម្មណ៍ល្អក់កករនិងសេចក្តីស្នេហាជួបតែភាពសោះកក្រោះមានតែភាពរកាំរកូសកើតឡើង។
បើសិនអ្នកកំពុងសម្លឹងរកនរណាម្នាក់មកជាគូគាប់ សាកល្បងព្យួរកែវគ្រីសតាល់ដែលមានគ្រាប់មូលៗទុកលើបរិវេណដេកហើយត្រូវដេកនៅផ្នែកណាមួយនៃគ្រែដើម្បីជួយបង្កើតថាមពលឱ្យកើតឡើងដោយហៅសេចក្តីស្នេហានោះដើរចូលមករក។
លក្ខណៈក្នុងផ្ទះដែលធ្វើឱ្យគូស្នេហារួមរស់នៅជាមួយគ្នាយ៉ាងសុខដុម គឺនៅពេលដែលភ្ញៀវបើកទ្វារចូលក្នុងផ្ទះហើយមិនគួរឱ្យឃើញបន្ទប់ដេកភ្លាម ព្រោះថានឹងជះឥទ្ធិពលឱ្យការដេកពួនមិនលង់លក់ស្រួល។ក្រៅពីនេះនៅបង្កឱ្យមានការទាស់ចិត្តគ្នាបន្តិចបន្តួចកើតឡើងមិនចេះចប់មិនចេះហើយ។បើផ្ទះរបស់អ្នកតូចមិនអាចរកកន្លែងផ្សេងទៀតដេកពួនបានឱ្យរកទូរមកដាក់បាំងភ្នែកដើម្បីធ្វើយ៉ាងណាកុំឱ្យភ្ញៀវបើទ្វារចូលហើយឃើញគ្រែដេកយ៉ាងច្បាស់លាស់។
សេចក្តីស្នេហារបស់អ្នកនឹងស្អិតរមួតថែមឡើងទៀតបើមានបន្ថែមពណ៌ក្រហមក្នុងបន្ទប់ដេក មិនថាជាវាំងនន ខ្នើយកើយ រូបភាព ព្រហ្ម ឬផ្កាទេបើបានគោមភ្លើងពណ៌ក្រហមកាន់តែល្អ។ព្រោះថាឥទ្ធិពលពណ៌ក្រហមនឹងជួយរុញច្រានសេចក្តីស្នេហារបស់អ្នកឱ្យឈានទៅមុខជានិច្ច។
កញ្ចក់នៅក្នុងបន្ទប់ដេក មិនថាកញ្ចក់ឆ្លុះមុខឬស៊ុមកញ្ចក់រូបភាពត្រូវតែថែទាំមិនឱ្យកខ្វក់។ដូចនេះត្រូវតែឧស្សាហ៍ដុសជូតសម្អាតញឹកញាប់ព្រោះថាបើកញ្ចក់កខ្វក់នោះសេចក្តីស្នេហារបស់អ្នកក៏សៅហ្មងមានតែបញ្ហាកើតឡើង។
គ្រឿងប្រើក្នុងផ្ទះបាយគប្បីប្រយ័ត្នប្រយែង ចង្រាននិងកន្លែងលាងចានគួរនៅឆ្ងាយពីគ្នាហើយក៏មិនគួរដាក់នៅទល់មុខគ្នាដែរព្រោះថាចង្ក្រានក៏ប្រៀបដូចភ្លើងហើយកន្លែងលាងចានប្រៀបដូចទឹក។វត្ថុទាំងពីរនេះនៅជិតគ្នាមិនបានទេគឺបើកាលណានៅក្បែរគ្នាច្បាស់ជាមានភាគីណាមួយបំផ្លាញភាគីណាមួយទៀតពុំខាន។ វិធីដោះស្រាយបើមិនចង់ឱ្យចំណងស្នេហារង្គោះរង្គើគប្បីមានការយករបស់ទាំងពីនេះចេញឱ្យឆ្ងាយពីគ្នាតែបើមិនអាចបំបែកបានគួររកថូផ្កាដ៏ស្រស់ស្អាតណាដាក់ចំកណ្តាលដើម្បីបំបាត់ឧបទ្រពនេះក៏ប្រសើរដែរ។
មិនគួរចោះកន្លែងណាមួយត្រង់របងផ្ទះ បើសិនមិនបានធ្វើដើម្បីភាពស្រស់ស្អាតហើយ ចោះច្រើនកន្លែងមានរន្ធធ្លុះធ្លាយផងមិនល្អទេពីព្រោះវានឹងបង្កឱ្យដំណើរជីវិតប្តីប្រពន្ធក្នុងផ្ទះតែងកើតបញ្ហាមកកកូរផ្លូវចិត្តនិងនាំបញ្ហាត្រូវឈឺក្បាលញឹកញាប់ជាក់ជាពុំខាន។
បើអ្នកនៅលីវចង់រកគូគាប់ សាកល្បងហៅរកសេចក្តីស្នេហាដោយការនាំយកផ្កាកុលាបធ្វើពីកែវ២ផ្កាមកដាក់ទុកត្រង់ទិសខាងលិចឆៀងត្បូងក្នុងបន្ទប់ដេក នោះគូគាប់តែងរត់មករកផង៕
ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។