ទស្សន៍ទាយមើលពីលក្ខណៈក្រចកដៃ
ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។
ចំណិតខែ ចំណិតខែមានទីតាំងស្ថិតនៅនឹងគល់ក្រចកមានពណ៌ស។ តាមធម្មតាចំណិតខែដែលគេចាត់ទុកថា ត្រូវខ្នាតនោះគឺមានទំហំប្រហែលជា១ភាគ៥នៃផ្ទៃក្រចកទាំងមូល។ ដូច្នេះប្រសិនបើចំណិតខែនោះមាន ទំហំធំជាងទំហំខ្នាតខាងលើ គឺជានិមិត្តរូបអ្នកដែលមានចិត្តឆាប់ខឹងឆេវឆាវ ហើយបើតូចជាងទំហំខ្នាត គឺជា និមិត្តរូបអ្នកដែលមានចរិតលក្ខណៈទន់ខ្សោយខ្វះខាតនូវការសម្រេចចិត្តនិងការអនុវត្ត។
កម្រិតកោង បើមើលចំពីមុខផ្ទៃក្រចកទាំងមូល គឺមានរាងកោងបន្តិច តែបើផ្ទៃក្រចកនោះមានរាងរាបស្មើ ជាងក្រចកដៃរបស់អ្នកឯទៀត តំណាងឱ្យប្រព័ន្ធរំលាយអហារមានបញ្ហាដែលបណ្តាលឱ្យក្លាយជាមនុស្ស មានចរិតលក្ខណៈលោភលន់ និងមានមហិច្ឆតាជាពិសេសគឺល្មោភស៊ីផឹកមិនចេះឆ្អែតឆ្អន់តែម្តង។
ស្នាមខ្សែបញ្ឈរត្រង់ នៅលើផ្ទៃក្រចក ប្រសិនបើមានស្នាមខ្សែបញ្ឈរត្រង់ (មើលពីគល់ដល់ចុងក្រចក)គឺតំណាងឱ្យ ការដេកពុំបានស្កប់ស្កល់ ឬដេកពុំបានគ្រប់គ្រាន់អស់រយៈពេលមួយដ៏យូរនោះក៏បណ្តាលមកពីសាមីខ្លួនមាន ទុក្ខកង្វល់ច្រើន ជាពិសេសគេសង្កេតឃើញទៅលើមនុស្សប្រុស-ស្រីដែលជាប់រវល់កិច្ចការងារមមាញឹកច្រើន។ ម្យ៉ាងទៀតចំពោះគូស្នេហ៍ប្រុស-ស្រីដែលខកស្នេហ៍ដេកកើតទុក្ខតែម្នាក់ឯង។
កម្រិតក្រាស់ តាមពិតទៅមនុស្សម្នាក់ៗតែងតែមានក្រចកក្រាស់ឬស្តើងមិនដូចគ្នាឡើយ (មុននឹងកាត់ក្រចក គឺច្បាស់លាស់ជាងគេ)។ ម្យ៉ាងទៀតលោកអ្នកអាច ប្រៀបធៀបជាមួយអ្នកដទៃ ក៏អាចដឹងថាក្រចកដៃ ខ្លួនឯងក្រាស់ ឬស្តើង។ ចំពោះអ្នកដែលមានក្រចកដៃក្រាស់ គឺតំណាងឱ្យការអត់ធ្មត់ មានកម្លាំងខ្លាំងក្លាអាចស៊ូទ្រាំបាន គ្រប់សព្វបែបយ៉ាង។ ប៉ុន្តែចំណុចខ្វះខាត គឺនៅត្រង់ថា ជួនអង្គុយស្រយុតស្រយង់មិនខ្ចីនិយាយស្តីរកអ្នកណា។ ចំពោះអ្នកដែលមានក្រចកដៃស្តើង គឺតំណាងឱ្យភាពរវៀសរវៃ និងរហ័សរហួន។ ប៉ុន្តែចំណុចខ្វះខាត គឺនៅត្រង់ឆ្កឹះឆ្កៀល ឬអុជអាលគេឱ្យឈ្លោះប្រកែកគ្នា។
ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។