ហុងស៊ុយគ្រឿងតាំងលម្អក្នុងផ្ទះ
ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។
វត្ថុតាំងលម្អ មិនត្រឹមតែជួយលើកសម្រស់គេហដ្ឋានរបស់អ្នកឲ្យមានភាពស្រស់ឆើតឆាយប៉ុណ្ណោះទេ តែនៅអាចជួយឲ្យមានហុងស៊ុយល្អដល់ផ្ទះរបស់អ្នកទៀតផង។ តាមក្បួនហុងស៊ុយ គ្រឿងតាំងលម្អផ្ទះ គឺជាវត្ថុដែលអាចជួយសម្រាលបញ្ហាពីធ្ងន់មកស្រាលបាន ប៉ុន្តែអ្នកក៏គួរដឹងថា តើគ្រឿងលម្អផ្ទះបែបណាខ្លះ ដែលត្រូវដាក់តាំងឲ្យសមនឹងផ្ទះរបស់អ្នក ? ដើម្បីឲ្យបានដឹងថា គ្រឿងលម្អបែបណាសមនឹងផ្ទះរបស់អ្នកនោះ ចូរយកលេខផ្ទះរបស់អ្នកបូកជាមួយថ្ងៃកំណើតរបស់អ្នក ដោយបូកចូលគ្នារហូតសល់លេខតែមួយខ្ទង់។
ឧទាហរណ៍ផ្ទះលេខ ៣០៨, ថ្ងៃកំណើត ០៦ = ៣ + ០ + ៨ + ០ + ៦ = ១៧, ១ + ៧ = ៨ ដូច្នេះផ្ទះរបស់អ្នកសមនឹងគ្រឿងលម្អចំណុចលេខ៨។
១. កញ្ចក់ បើកញ្ចក់បែរមុខទៅទិសខាងកើតឆៀងខាងជើង (ឦសាន) នៃបន្ទប់ទទួល ភ្ញៀវ ឬបន្ទប់ធ្វើការ វាអាចជួយធ្វើឲ្យអ្នកមានភាពភ្លឺថ្លា ក្នុងការដោះស្រាយបញ្ហា អ្នក មានភាពស្វាហាប់ ចូលចិត្តយកចំណេះដឹងថ្មីៗដាក់ខ្លួន។
២. រូបថត ដូចជារូបថតពេលដែលអ្នកទទួលរង្វាន់ ឬទទួលបរិញ្ញាបត្រជាដើម ទោះបី ជាវាមើលទៅដូចជាអួតបង្ហាញបន្តិច តែរូបនេះជួយទាក់ទាញថាមពលវិជ្ជមាន ធ្វើឲ្យអ្នកមានកេរ្តិ៍ឈ្មោះ ជួបប្រទះតែជោគជ័យក្នុងកិច្ចការលំបាកៗ និងមានអ្នកធំជួយ ឧបត្ថម្ភ។
៣. វត្ថុដែលរេតាមខ្យល់ សមស្របសម្រាប់អ្នកដែលមិនសូវមានគំនិតច្រើន គិតអ្វីមិនចេញ ប្រសិនបើយកវត្ថុដែលរេតាមខ្យល់ ដូចជាទង់ជាតិ ជួងព្យួរតូចៗ កណ្តឹង ឬកង្ហារខ្យល់បក់ ព្រោះវាអាចជួយធ្វើឲ្យខួរក្បាលអ្នកស្រស់ថ្លា។
៤-. ផ្លិត តាមក្បួនហុងស៊ុយ ផ្លិត អាចជួយបណ្តេញភាពក្តៅក្រហាយក្នុងចិត្តបាន ហើយប្រសិនបើអ្នកបានសរសេរពាក្យមង្គលនៅលើផ្លិត វាអាចជួយនាំដំណឹងល្អដល់អ្នក។
៥-. ក្រូច ពណ៌ទឹកក្រូច និងពណ៌មាស តំណាងឲ្យមាសប្រាក់ ដូចនេះប្រសិនបើអ្នក ជួបឧបសគ្គផ្នែកប្រាក់កាស គ្មានប្រាក់ចំណេញ ឬខាតបង់ប្រាក់ អ្នកគួរយកផ្លែក្រូចស្រស់ៗដាក់លើថាស រួចយកទៅដាក់នៅក្នុងបន្ទប់ទទួលភ្ញៀវ ឬបន្ទប់ទទួលទានអាហារនោះ មិនយូរប៉ុន្មានស្ថានការណ៍នឹងមានភាពល្អប្រសើរឡើង។
៦. ជួង ជួង ឬកណ្តឹងតូចៗដែលមានសំឡេងពីរោះ វាអាចជួយបន្ថែមថាមពលវិជ្ជមាន ធ្វើឲ្យអ្នកមានគំនិត និងសតិបញ្ញាស្រស់ថ្លា។ អ្នកគួរយកវាទៅដាក់នៅទិសខាងកើត ឆៀងខាងជើងផ្ទះ ដើម្បីបណ្តេញរឿងមិនល្អឲ្យចេញទៅ។
៧. ខ្នើយរូបបេះដូង ខ្នើយពណ៌សរូបបេះដូង ជាជំនួយការដោះស្រាយបញ្ហាស្នេហារបស់អ្នក។ ប្រសិនបើមានអ្នកទី៣ចូលជ្រៀតជ្រែក អ្នកកុំភ្លេចយកខ្នើយរូបបេះដូងពណ៌ស ឬពណ៌ផ្កាឈូក២ មកដាក់ក្នុងបន្ទប់គេង ដើម្បីឲ្យគូស្នេហ៍ភ្ញាក់ខ្លួនត្រឡប់មករកអ្នកវិញ។
៨. អំពូលភ្លើង វាអាចជួយការពារភាពឆ្គាំឆ្គងរបស់អ្នក និងកែខៃឲ្យស្ថានភាពល្អប្រសើរឡើង និងបញ្ចៀសអ្នកពីហេតុការណ៍អាក្រក់នានា។
៩. សៀវភៅក្បួនតម្រាផ្តល់ចំណេះដឹងនានា ជួយធ្វើឲ្យអ្នកមានភាពស្វាហាប់ក្នុងការសិក្សា ប្រសិនបើអ្នកដាក់នៅជិតបន្ទប់ទទួលភ្ញៀវ ឬបន្ទប់គេង។ ប៉ុន្តែអ្នកត្រូវរៀបចំឲ្យបានរៀបរយ ដើម្បីធ្វើឲ្យអ្នកមានចិត្តចង់អាន និងជក់អារម្មណ៍ក្នុងការអាន។
ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។