រំលងទៅមាតិកា

ហុងស៊ុយ

ហុងស៊ុយទូដាក់សម្លៀកបំពាក់

ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។

ក្នុងហុងស៊ុយ វត្ថុនីមួយៗសុទ្ធតែមានប្រភពថាមពលដោយឡែកៗពីគ្នា ហើយវិធីដែលអ្នកថែរក្សា និង រៀបចំទុកដាក់វត្ថុទាំងអស់នោះ នឹងនាំមកនូវប្រភពថាមពលដែលមាន ទំនាក់ទំនងគ្នាទៅវិញទៅមក។ ការរៀបចំសម្លៀកបំពាក់ក្នុងទូឲ្យបានរៀបរយល្អ មិនត្រឹមតែធ្វើឲ្យអ្នកមានលំហបន្ថែមច្រើនដើម្បីទុកដាក់របស់របរប៉ុណ្ណោះទេ ថែមទាំងធ្វើឲ្យអ្នកសុខស្រួលផ្លូវចិត្ត មិនមានទុក្ខព្រួយទៀតផង។ ទីកន្លែងនេះ គឺជារូបភាពឆ្លុះបញ្ចាំងជីវិតប្រចាំថ្ងៃរបស់អ្នក។ ការគោរពវត្ថុនៅជុំវិញ ក៏ជាវិធីដែលអ្នកបង្ហាញនូវការគោរពចំពោះជីវិតរបស់ខ្លួនឯងដែរ។

១. តុបតែងទូដែលចាស់ឡើងវិញ ចូរធ្វើទូឲ្យថ្មី ដោយវិធីយកសម្លៀកបំពាក់ទាំងអស់ចេញ សម្អាតរបស់របរដែលដុះផ្សិត ហើយបត់ឡើងវិញឲ្យមានរបៀបរៀបរយ។ ក្រោយពីបូម ឬបោសអស់ធូលីដីនៅក្នុងទូ ចូរអ្នកលាងសម្អាតទូដោយទឹកក្តៅឧណ្ឌៗដោយប្រុងប្រយ័ត្ន។ ប្រសិនបើទូបានចាស់ ចូរអ្នកលាបថ្នាំឡើងវិញតាមពណ៌ដែលអ្នកស្រឡាញ់ និងឲ្យសមស្របជាមួយលំហក្នុងបន្ទប់។ មុនពេលដាក់ខោអាវចូល ត្រូវបើកចំហទ្វារទូប្រមាណ២ទៅ៣ថ្ងៃ ដើម្បីឲ្យស្រទាប់ថ្នាំស្ងួត ហើយក្លិនថ្នាំហើរអស់យ៉ាងឆាប់រហ័ស។ ប្រសិនបើរវល់ អ្នកអាចប្រើកង្ហារដើម្បីបង្ហើរក្លិនថ្នាំចេញ។អ្នកត្រូវទុករបស់របរដែលមានមុខងារផ្សេងគ្នានៅតំបន់ដោយឡែកៗពីគ្នា។

២. មិនត្រូវដាក់សម្លៀកបំពាក់ឲ្យចង្អៀតទូពេកទេ តាមហុងស៊ុយ ដើម្បីកុំឲ្យទូខោអាវធ្វើឲ្យស្ងប់ស្ងៀមប្រភពចម្រុងចម្រើននោះ អ្នកត្រូវប្រើប្រាស់គោលការណ៍៥០ភាគរយ។ រឿងនោះមានន័យថា អ្នកគ្រាន់តែព្យួរបរិមាណសម្លៀកបំពាក់សមល្មម ដែលដណ្តើម៥០ភាគរយនៃទំហំរបស់ទូបានហើយ។ ក្រៅពីនេះ អ្នកត្រូវរៀបម្ខាងណាជាខោ, ម្ខាងណាជាអាវសឺមិ និងបែងចែកសម្លៀកបំពាក់រដូវរងា, រដូវក្តៅ ...។ ប្រសិនបើអ្នកត្រូវការទុកស្បែកជើងក្នុងទូ ត្រូវដាក់ស្បែកជើងកុំឲ្យប៉ះខោអាវ។ ចូរបោះចោលខោអាវចង្អៀត, ចាស់ និងមិនចាំបាច់ ឬប្រដាប់ព្យួរមិនប្រើ ដើម្បីបញ្ចៀសភាពស្មុគស្មាញនៅក្នុងទូ។ នៅខាងក្រៅទ្វារទូ អ្នកអាចដំឡើងកញ្ចក់មួយ ដើម្បីបំពេញលំហផងដើម្បីជួយអ្នកក្នុងការកែលម្អ សម្លៀកបំពាក់ផង។

៣. តម្រៀបតាមពណ៌និងមុខងារ ការរៀបចំសម្លៀកបំពាក់តាមប្រព័ន្ធ គឺជាវិធីមួយជួយឲ្យអ្នកងាយស្រួលរកឃើញសម្លៀកបំពាក់ដែលខ្លួនត្រូវការ។ ឧទាហរណ៍ អ្នកត្រូវព្យួរអាវសឺមិជិតគ្នា, ព្យួរសំពត់ និងសម្លៀកបំពាក់ផ្សេងៗ ទៅជ្រុងមួយដោយឡែក។ ចំពោះស្បែកជើងក្រោមទូ ចូរតម្រៀបវាជាប់ៗគ្នា និងបែរមុខស្បែកជើងទៅរកទ្វារទូ។ ទូស្មោគគ្រោកពេកនឹងធ្វើឲ្យអ្នកចំណាយពេលវេលា និងមានអារម្មណ៍ហត់នឿយ។

៤. ព្យួរសម្លៀកបំពាក់តាមហុងស៊ុយ នៅទ្វារខាងឆ្វេង (ទិសតំណាងឲ្យចំណេះដឹងនិងភាពរុងរឿង) ចូរអ្នកព្យួរឯកសណ្ឋាន និងសម្លៀកពាក់ធ្វើការ។ នៅចំកណ្តាលទូ (សុខភាព, កេរ្តិ៍ឈ្មោះ និងអាជីព) ព្យួររបស់ប្រើប្រាស់សម្រាប់ដើរលេង។ ប្រសិនបើចង់ជំរុញការច្នៃប្រឌិតផ្ទាល់ខ្លួន អ្នកអាចព្យួរសម្លៀកបំពាក់ប្រពៃណីដែលខ្លួនស្រឡាញ់ជំនួសឲ្យការបត់។

៥. រក្សាធ្នើរដាក់ខោអាវឲ្យស្អាត ធ្នើរដាក់ខោអាវ (ភាគខាងលើផ្នែកព្យួរខោអាវ) គួរទុករបស់របរមានពណ៌ភ្លឺ ដូចជាអាវឡែនពណ៌ស ឬ កន្សែងពណ៌ត្នោត។ មិនត្រូវទុកខោអាវដែលមិនចាំបាច់ ឬមិនដែលពាក់ឡើយ ព្រោះរឿងនោះគ្រាន់តែបង្កើតការពង្រាយ និងភាពរាំងស្ទះ ដែលបង្កឲ្យអាក្រក់ដល់ហុងស៊ុយរបស់ទូតែប៉ុណ្ណោះ៕

ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។