រំលងទៅមាតិកា

ជំនឿ និងទំនៀមផ្សេងៗ

របៀបដេកទាយពីនិស្ស័យមនុស្ស

ជំនឿប្រពៃណីខ្មែរ ចែករំលែកជាវប្បធម៌ និងសម្រាប់ការកម្សាន្ត។ មិនមែនជាវិទ្យាសាស្ត្រទេ សូមកុំសម្រេចចិត្តរឿងសំខាន់ដោយផ្អែកតែលើហោរាសាស្ត្រ។

ដេកផ្ងារកន្លែកដៃ-ជើង ជាប្រភេទមនុស្សស្រលាញ់សេរីភាព ស្រលាញ់ភាពងាយស្រួលស្រលាញ់ភាពស្អាតនិងភាព សិចស៊ី។ ចំណែកការចាយវាយច្រើនដៃធំ និងខ្ជះខ្ជាយ ប៉ុន្តែការរកប្រាក់កាសវិញក៏ពូកែដែរ។ សម្រាប់ចំណុចខ្សោយរបស់មនុស្សក្រុមនេះ គឺចូលចិត្តពាក់ព័ន្ធជាមួយនឹងអ្នកដទៃនិងចូលចិត្ត ដើរកម្សាន្តសប្បាយ។

ដេកផ្ងារដាក់ជើងខ្វែងគ្នារបៀបគងអន្ទាក់ខ្លា ក្រុមមនុស្សដែលចូលចិត្តដេកបែបនេះច្រើនជាមនុស្សមិនសូវទទួលខុសត្រូវចិត្តមានការប្រែប្រួល ផ្លាស់ប្តូរងាយ ពិសេសចូលចិត្តងប់ងុលជឿជាក់តែរឿងរបស់ខ្លួនឯង។ សម្រាប់សេចក្តីស្នេហាវិញ ច្រើនចិត្ត ស្មោះត្រង់ ពោលគឺបើស្រលាញ់នរណាម្នាក់ហើយ គឺស្រលាញ់អស់មួយជីវិត។ ចំពោះការងារមានភាព អត់ធ្មត់ និងគិតអ្វីៗបានគ្រប់ជ្រុងជ្រោយ។

ដេកផ្ងារក្បាលកើយដៃ អ្នកដែលចូលចិត្តដេករបៀបនេះ ច្រើនជាមនុស្សធ្លាតរហ័សរហួនចូលចិត្តស្វែងយល់ស្រាវជ្រាវ របស់ថ្មីមិនចេះអស់មិនចេះហើយ។ សម្រាប់សេចក្តីស្នេហាមានការយកចិត្តទុកដាក់ទៅលើក្រុមគ្រួសារច្រើន ប៉ុន្តែក៏មិនមែនជាមនុស្សងាយស្រួលស្រលាញ់ងាយទុកចិត្តដែរ។

ដេកផ្កាប់ ប្រសិនបើដេកកាយវិការបែបនេះជាប់ជាប្រចាំផងច្រើនបញ្ជាក់ថា ជាមនុស្សចិត្តចង្អៀតគិតតែពី ផលប្រយោជន៍ខ្លួនឯងជាធំ និងត្រូវការឱ្យអ្នកដទៃ ធ្វើតាមអ្វីដែលខ្លួនឯងចង់បានជានិច្ច។

ដេកផ្អៀង អ្នកដែលចូលចិត្តដេកកាយវិការបែបនេះ ជាមនុស្សដែលមានការជឿជាក់ខ្លួនឯងខ្ពស់។ ទោះបីធ្វើ អ្វីៗច្រើនសម្រេចដូចខ្លួនប៉ងទុក។ ចំណែកការដេកផ្អៀងមកស្តាំ សណ្តូកដៃស្តាំទៅលើក្បាលបញ្ជាក់ថា ជា មនុស្សមានអំណាច មានវាសនា និងជាក្បួនវិធីដេកល្អបំផុត។

ដេកផ្អៀងអង្កុញជើងឡើងម្ខាង ដេកបែបនេះមិនសូវល្អប៉ុន្មានទេ ព្រោះបើតាមក្បួនតម្រាបញ្ជាក់ថា ជាមនុស្សប្រយ័ត្នប្រយែងជ្រុល មានការសង្ស័យមិនចេះចប់មិនចេះហើយ និងគ្មានហេតុផលពិតប្រាកដ។ ជាមួយគ្នានេះដែរជាមនុស្សរអ៊ូរទាំ មិនដឹងពេលវេលាជាមនុស្សខ្វះការជឿជាក់លើខ្លួនឯង អាចជាមនុស្សពាល និងអាចកើតរោគសរសៃប្រសាទ បានយ៉ាងងាយ។

ដេកអង្កុញខ្លួន ច្រើនជាមនុស្សចូលចិត្តច្រណែនឈ្នានីសដោយខ្លាចអ្នកដទៃល្អជាងខ្លួន។ ក្រៅពីនេះនៅជាមនុស្ស អាត្មានិយម និងកើតមានគំនុំគុំកួនយ៉ាងខ្លាំងផង។

ដេកសង្កត់ដៃខ្លួនឯង ក្រុមមនុស្សដែលចូលចិត្តដេករបៀបនេះច្រើនជាមនុស្សទន់ភ្លន់ ចិត្តស្មោះ ត្រង់នឹងសេចក្តីស្នេហា ប៉ុន្តែជាមនុស្សខ្វះការជឿជាក់ខ្លួនឯង និងខ្វះភាពកក់ក្តៅក្នុងជីវិត។

ដេកក្រាប ជាមនុស្សអផ្សុកយ៉ាងខ្លាំង ឆាប់សោកសៅ ជាមនុស្សឆាប់ភ័យខ្លាច និងមានការរារែកចិត្តជាញឹក ញាប់។ ការរស់នៅខ្វះភាពកក់ក្តៅ និងនាំឱ្យជីវិតខកបំណងញឹកញាប់។

ដេកដណ្តប់ជិត ជឿឬទេថា បើមើលពីក្រៅទៅគេអាចជាទីពឹងពាក់និងជឿជាក់បាន ប៉ុន្តែក្នុងជម្រៅចិត្តពិតប្រាកដ ជាមនុស្សពូកែខ្មាសអៀន ចិត្តទន់ជ្រាយ ចូលចិត្តមានរឿងអាថ៌កំបាំង និងពូកែលាក់អាថ៌កំបាំង។ ក្រៅពីនេះគេ នៅមនុស្សចូលចិត្តយករឿងរ៉ាវទុកក្នុងចិត្តហើយប្រើអារម្មណ៍គិតនាំទុក្ខកង្វល់ខ្វល់ខ្វាយក្នុងចិត្តជាប់ជានិច្ច។

ដេកយកដៃចាប់ប្រដាប់ភេទខ្លួនឯង ជាមនុស្សចម្លែក។ និស្ស័យរបស់មនុស្សក្រុមនេះចូលចិត្តងប់ងុលនៅក្នុងតាមអារម្មណ៍មាន សេចក្តីត្រូវការផ្លូវភេទខ្ពស់ ចិត្តឆេវឆាវឆាប់ខឹងឆាប់បាត់។ សម្រាប់សេចក្តីស្នេហាគឺជាមនុស្សឆាប់ឈ្លក់ វង្វេងហើយក៏មិនងាយបាត់ដែរ។ ទោះបីយ៉ាងណាក្រុមមនុស្សជំពូកនេះឆ្លៀវឆ្លាត និងមានសតិបញ្ញាវាងវៃ។

ដេកមមើ ស្ថិតក្នុងក្រុមមនុស្សគិតច្រើន ហើយបើមានអ្វីកើតឡើង តែងប្រើអារម្មណ៍គិតមិនងាយរសាយបាត់ ទៅវិញ។ មនុស្សស្ថិតក្នុងក្រុមនេះខ្វះការជឿជាក់ខ្លួនឯងនិងចូលចិត្តធ្វើតាមការស្នើសុំអ្នកដទៃជានិច្ច។

ដេកសង្កៀតធ្មេញ តាមចាស់បុរាណថា ជាមនុស្សអភ័ព្វនិងចង្រៃ។

ដេកហាមាត់ តាមចាស់បុរាណថា ជាមនុស្សមានរោគជំងឺបៀតបៀន និងសុខភាពពុំសូវរឹងមាំប៉ុន្មានទេ។

ដេកបើកភ្នែកទន្សាយ ចាស់បុរាណថា ជាមនុស្សប្រយ័ត្នប្រយែងនិងធ្វើកិច្ចការអ្វីៗបានយ៉ាងល្អិតល្អន់។ ទោះបីយ៉ាងណា មនុស្សស្ថិតក្នុងក្រុមនេះក៏អាចត្រូវគេបង្កាច់បង្ខូច និងងាយជួបរឿងរ៉ាវអាក្រក់ៗកើតឡើងដែរ ហេតុដូច្នេះត្រូវ ប្រុងប្រយ័ត្នឱ្យបានជាប់ជានិច្ច។

ប្រភព៖ កម្មវិធី ហោរាសាស្ត្រខ្មែរ (Khmer Horoscope) របស់ Kode4U។