ឈ្មោះកូនខ្មែរ ផ្ដើមដោយ ឈ ញ ដ ឋ ឌ ឍ ណ ត
ឈ្មោះ ៥៣ ផ្ដើមដោយអក្សរ ឈ ញ ដ ឋ ឌ ឍ ណ ត ព្រមទាំងការសរសេរជាអក្សរឡាតាំង និងអត្ថន័យ។
ឈ្មោះផ្ដើមដោយ ឈ
- ឈាន CHHEAN
- អ្នកដែលសម្លឹងទៅរកការផ្លាស់ប្ដូរជានិច្ច។
- ឈូក CHHOUK
- គឺជាផ្កាឈូក (ប្រភេទអ្នកដែលជាមនុស្សស្អាតស្អំ ជាទីពេញចិត្តនៃមនុស្សគ្រប់លំដាប់ថ្នាក់) ពីព្រោះឈូកដុះក្នុងបឹងបានយ៉ាងងាយ គ្រប់ទិសទី។
- ឈើទាល CHOEUTEAL
- ជាមនុស្សអ្នកពូកែដោយយុទ្ធវិធី, សម័យបុរាណធ្លាប់មានឮសូរឈ្មោះនេះមួយ។ ឧ. កំហែងឈើទាល។
ឈ្មោះផ្ដើមដោយ ញ
- ញញឹម NHONHOEUM
- មិនបាច់ប្រាប់ក៏ដឹងដែរថា គេជាអ្នកដែលស្រស់ស្រាយរហូតនេះហើយ។
- ញាណ NHEAN
- អ្នកដែលព្យាយាមដើម្បីសេចក្ដីដឹង។
- ញាតា NHEATA
- អ្នកដែលដឹង (អ្នកមានប្រាជ្ញា)។
- ញ៉ិល NHEL
- មនុស្សរហ័សរហួន, ងាយជ្រួតជ្រាប។
ឈ្មោះផ្ដើមដោយ ដ
- ដកចន្ទន៍ DOKCHAN
- បើស្រលាញ់ផ្កាដកចន្ទន៍ ខ្មែរយើងមានចម្លាក់ក្បាច់ដកចន្ទន៍។
- ដរាប DOKRAP
- មនុស្សអ្នកគោរពបែបបទ, អ្នកមិនងាករេ។
- ដាន DAN
- មនុស្សនឹងធឹង ជាទីពឹងរបស់មនុស្សទាំងឡាយ។
- ដានី DANY
- អ្នកដែលទទួលឱវាទចាស់បុរាណ មិនល្អៀងខកខាន។
- ដាមរី DAMRY
- អ្នកដែលពូកែត្រួសត្រាយផ្លូវ (ដោះស្រាយវិបត្តិ កុំឲ្យមានជំពាក់វាក់វីនទៀត)។
- ដាវ DAV
- សង្ឃឹមថា ជាអ្នកដែលចេះការពារខ្លួន និងក្រុមគ្រួសារ។
- ដីកា DEYKA
- ជនអ្នកពូកែ កែខៃ បកស្រាយ។
- ដួង DOUNG
- អ្នកដែលធ្វើការងារស្នួល, ចេះលាក់ការ មិនបណ្ដាលឲ្យបែករឿងផ្ដេសផ្ដាស។
- ដែន DEN
- អ្នកដែលធ្វើការមានកំណត់, តែការដើរហើរមិនកំណត់។
- ដំណាល DOMNAL
- ជនអ្នកមិនរំលោភសិទ្ធិអ្នកដទៃ, និយមភាពស្មើៗគ្នា។
- ដំណែង DOMNENG
- អ្នកចេះច្នៃ, អ្នកដែលអាចធ្វើឲ្យគេជឿបានដោយងាយ។
- ដំណែល DOMNEL
- ជនអ្នកថែរក្សា។
- ដំបន់ DOMBOAN
- អ្នកត្រួតត្រា។
- ដំបារ DOMBAR
- អ្នកដែលជាធំ។
- ដាំ DEM
- អ្នកដែលត្រូវបណ្ដុះឡើងដោយល្អ។ កប់ពូជដំណាំក្នុងធរណីដើម្បី នឹងឲ្យដុះលូតលា់មានផលប្រយោជន៍តទៅ។
ឈ្មោះផ្ដើមដោយ ឋ
- ឋានៈ THANAK
- អ្នកដែលមានហេតុទំនងគួរឲ្យជឿទុកចិត្តបាន។ អ្នកមុខងារនៅក្នុងសង្គម។
- ឋានន្តរ៍ THANANT
- ជនអ្នកមានកេរ្តិ៍ឈ្មោះ។ អ្នកមានកិត្តិយស។
- ឋាបនា THABANA
- អ្នកកសាង (ពីសម័យសាធារណៈរដ្ឋខ្មែរ មានឧត្តមមន្ត្រីមួយរូបឈ្មោះ “ឋាបនា ងិន” ជាឧបនាយករដ្ឋមន្ត្រីទី២ (១៩៧២-១៩៧៣))។
ឈ្មោះផ្ដើមដោយ ឌ
- ឌិន DIN
- គ្រឿងវីចិត្រដែលធ្វើដោយប្រាក់, មាស ឬទង់ហ្វា។
- ឌុន DUN
- ជាពាក្យដែឡក្លាយមកពីភាសាបាលីថា ដុល្យ ឬ តុល្យ បានន័យថា ស្មើគ្នា។
ឈ្មោះផ្ដើមដោយ ឍ
- ឍាណ THEAL
- អ្នកដែលនិយាយទៅអ្នកផង ស្ដាប់តាម, អ្នកមានសមត្ថភាពប្រមូលមនុស្ស ឬប្រកាសដំណឹងបានឆ្ងាយ។ អ្នកដែលការពារខ្លួនបានល្អ, ចេះរក្សាអំណាចបានដោយប្រពៃ។
- ឍាមរា THEAMREA
- សត្វហង្ស។ អ្នកមានពូជពង្សខ្ពស់។
- ឍាលិន THEALIN
- ទាហានចម្បាំងដែលមានខែលការពាខ្លួនសម្រាប់រារាំងគ្រឿងសាស្រ្តវុធបច្ចាមិត្រមិនឲ្យប៉ះត្រូវខ្លួន។
ឈ្មោះផ្ដើមដោយ ណ
- ណែណន NHEONE
- មនុស្សដែលប្រាកដប្រជា (កុំច្រឡំថា ជាភាសាថៃឲ្យសោះ)។
- ណែម NEM កូនប្រុស
- តាមពិតជាន័យរបស់ឈ្មោះអាហារគោកមួយប្រភេទដែលគេធ្វើដោយស្បែកជ្រូកលាយសាច់ចិញ្ច្រាំ មានស្លឹករលួសបាយ, ស្លឹកកន្ទួតស្រុក, ស្លឹកចាព្លូ, ខ្ចប់ជាមួយផង រួចទុកឲ្យឡើងបាយស្រារាងជូរបន្តិច។ ឈ្មោះរបស់តួភាពយន្តខ្មែរម្នាក់ឈ្មោះ (ណុប ណែម) បុរសស្អាត, មានមុខមាត់ច្រើនយ៉ាង ជាតួបែបកាច, ស្លូត, កម្សត់។
ឈ្មោះផ្ដើមដោយ ត
- តក្កវិទ TAKAVIT
- អ្នកដែលពូកែខាងវិជ្ជាផ្នែកចិត្ត, អ្នកបានរៀនផ្នែកចិត្តសាស្រ្ត, អ្នកប្រាជ្ញាចិត្តសាស្ត្រ។
- តន់ TOANN
- អ្នកដែលជាប្អូនគួរឲ្យស្រលាញ់។
- តម្កល់ DOMKOAL
- ជនដែលគេលើកឡើងជាទំនុកចិត្តរបស់មនុស្សច្រើន។
- តម្កើង DOMKOEUNG
- អ្នកត្រូវបានគេគោរពច្រើន។
- តម្រា DOMRA
- មនុស្សត្រួសត្រាយផ្លូវជាគំរូឲ្យអ្នកជំនាន់ក្រោយ។
- តម្រិះ DOMRES
- ជាមនុស្សមានតម្រិះល្អ គឺមនុស្សដែលមានសេចក្ដីរិះគិតត្រូវ។
- តរុណ TARUN
- អ្នកដែលនៅក្មេងជានិច្ច។
- តរុណី TARUNEY កូនស្រី
- គឺគេជាកូនស្រីក្រមុំ។
- តាន់ TAN
- គឺតាន់ ណែន (អ្វីដែលធ្លាប់មានប្រហោង ក្លាយប្រែជាឥតប្រហោង) គឺជាមនុស្សដែលចេះកែតម្រូវរកសេចក្ដីត្រូវ។
- តារា DARA
- គឺជាហ្វូងផ្កាយ, អ្នកដែលមានពន្លឺ។
- តុលា TOLA
- អ្នកចេះថ្លឹងថ្លែងសេចក្ដីត្រឹមត្រូវ, មានយុត្តិធម៌បំផុតៗ ចាស់ទុំខ្លះច្រើនដាក់ឈ្មោះកូនដែលកើតចំខែតុលាតែម្ដង។
- តុសិត DOHSIT
- ជនអ្នកមានបុណ្យ បានកសាងអំពើល្អច្រើនហើយតែងតែជាអ្នកជួយយកអាសារអ្នកផង។
- តេជសី DECHEHSEY
- អ្នកមានអំណាចតេជៈ។
- តេជោជ័យ DECHORCHEY
- អ្នកមានជ័យជំនះដោយសារអំណាច។
- ត្រកាល TRAKARL
- អ្នកដែលពេញចិត្តចំពោះការងារថ្មីៗនឹងប្លែក។
- ត្រកូល TRAKOLE
- ជនដែលនិយមពូជពង្សជាធំ។
- ត្រចង់ TROACHONG
- ជនអ្នកបានខាងប្រាជ្ញាឆ្លៀវឆ្លាស់។
- ត្រជំ TROACHUM
- មនុស្សអ្នកមានចិត្តប្រកបដោយសេចក្ដីសុខ។
- ត្រដែត TROADET
- អ្នកដែលខ្ពង់ខ្ពស់ (មានសំណាង)។
- ត្រសែត TROASET
- អ្នកដែលខ្ពង់ខ្ពស់ និងកាន់តែខ្ពង់ខ្ពស់។
- ត្រីនេត្រ TREYNEITR
- មនុស្សមានភ្នែកបីប្រភេទ គឺភ្នែកសាច់ (ធម្មតា), ភ្នែកគឺបញ្ញា, ភ្នែកគឺផ្លូវធម៌ យល់ច្បាស់នូវជីវិតមនុស្ស។