រំលងទៅមាតិកា

ឈ្មោះកូនខ្មែរ ផ្ដើមដោយ ក

ឈ្មោះ ៥០ ផ្ដើមដោយអក្សរ ក ព្រមទាំងការសរសេរជាអក្សរឡាតាំង និងអត្ថន័យ។

ឈ្មោះផ្ដើមដោយ ក

កក្កដា KAKAHDA
មិនបាច់ឆ្ងល់ទេ គេដឹងថាកូនម្នាក់នេះច្បាស់ជាកើតនៅខែកក្កដាដោយប្រាកដ។ ខែទី៧នៃឆ្នាំ ជាខែដែលមនុស្សរវល់មមាញឹក ដូច្នេះកូនម្នាក់នេះគឺជាអ្នកឆ្លាត, ឧស្សាហ៍ហើយក៏ស្រឡាញ់គ្រួសារណាស់ដែរ។
កង KANG កូនប្រុស
ភាគច្រើនជាឈ្មោះកូនប្រុស, មានន័យពីរយ៉ាងៈ ១. ជាពួកក្រុម ឬ ចង្កោម។ ឧ. កងទ័ព, កងធម៌។ល។ ២.ប្រដាប់អ្វីមួយមានរាងជាវង់មូលសម្រាប់ពាក់ប្រហក។ ឧ. កងដៃ, កងជើង, កងក្រវិល។ ឬអ្វីៗដែលមានចំនួនល្មមត្រកង, ល្មមក្រសោមបាន។
កញ្ញា KHANHA កូនស្រី
សម្រាប់កូនស្រី ស្រីជំទង់, រាសីស្រីក្រមុំតូច។ តាមការនិយម ចាស់ៗពីបុរាណតែងដាក់ឈ្មោះនេះឲ្យកូនស្រីដែលមានសម្បុរល្អគួរឲ្យស្រឡាញ់។ បើកើតប៉ះចំលើខែកញ្ញា (ខែទី៩ នៃសុរិយាគតិទៀតនោះគឺកូនស្រីនោះច្បាស់ជាឈ្មោះថា កញ្ញា យ៉ាងពិតប្រាដក។
កណិការ KANIKAR កូនស្រី
(អានថា កៈណិការ) ជាកូនស្រីដែលមានមាឌខ្ពស់ស្រឡោន សម្បុរ ស ពីព្រោះ កណិការ ជាឈ្មោះឈើម៉្យាងមានផ្កាពណ៌ ស សណ្ឋានប្រហែលគ្នាំនឹងផ្កាម្លឹះ មានក្លិនក្រអូប។
កណ្ឌ KAND
(អានថា កាន់) មានន័យថាៈ ព្រួញ, គ្រាប់កាំភ្លើង, ទង់, ដើម, កំណត់, បរិច្ឆេទ, វគ្គ, ខ្សែ។ ឧ. សាស្រ្ដាមួយកណ្ឌ, លោកទេសន៍កណ្ឌព្រះវេស្សន្តរ។
កតិកា KATIKA
សេចក្ដីប្រាថ្នា, ជាការគ្នាទុកជាគ្រឿងសម្គាល់, យើងត្រូវតែធ្វើ កតិកា សញ្ញាមួយ។ (គេគឺជាកូនប្រុសដែលមានចិត្តមុះមុត និងហាក់ដូចជាដាច់ខាតថែមទៀតផង) បើជាកូនស្រីវិញ ក៏គឺជាអ្នកដែលចូលចិត្តធ្វើការច្រើនជាងនិយាយ។
កត្តា KATTA
មានន័យអ្នកផ្ដើមធ្វើ, អ្នកធ្វើ។ គេជាមនុស្សចូលចិត្តចាប់ផ្ដើមធ្វើការងារអ្វីណាមួយប្រកបដោយសេចក្ដីហ្មត់ចត់ល្អ។
កត្តិក KATDOEUK កូនប្រុស
ឈ្មោះខែទី១២ របស់ខែ្មរតាមច័ន្ទគតិ។ ឃើញមានច្រើនជាឈ្មោះកូនប្រុស។ តាមធម្មតាខែ កត្តិក មានអាកាសធាតុត្រជាក់ស្រួល, ដូច្នោះកូនប្រុសលោក អ្នកនឹងក្លាយទៅជាមនុស្សដែលមានចិត្តត្រជាក់ជាសុខអស់កាលជាអង្វែងដោយប្រាកដ។
កន KOAN កូនប្រុស
ឈ្មោះកូនប្រុស ទោះបីគេមិនសូវឃើញមានអត្ថន័យអ្វីជាអស្ចារ្យណាស់ណាក៏ដោយ ក៏ឈ្មោះ កន នេះប្រទះឃើញច្រើនគួរសម។ មានន័យថា បក្ខពួក, គ្នីគ្នា, កូកន។
កនិដ្ឋា KANITHA កូនស្រី
ច្រើនប្រើក្នុងពាក្យកំណាព្យមានន័យថាៈ ប្អូន, ប្អូនពៅ, ប្អូនតូច, ច្រើនប្រើសម្រាប់តែកូនស្រីប៉ុណ្ណោះ។
កន្សៃ KANSAY
ចុងក្រោយរបស់ទូក, កន្ទុយទូក ន័យមួយទៀត សំដៅដល់គូព្រេងពីអតីត (កន្សៃសាព៌េជ្ញ) កន្សៃសាព៌េជ្ញៈ ប្រពន្ធព្រះ។
កបិល KABEL
ឈ្មោះក្រុងកំណើតព្រះសមណគោត្តមនៅដែនប្រទេសឥណ្ឌាៈ ក្រុង កបិលវត្ថុ ហោះក្លាយមកជា កបិលពស្ដុ ហើយក្លាយមកជា កបិលភស្ដុ។
កប្បាស KABBAS
ឈ្មោះឈើតូចមួយប្រភេទជាដំណាំសំខាន់ មានផ្លែបង្កើតបានជាសំឡីសម្រាប់ធ្វើជាអំបោះត្បាញសំពត់, (ម៉្យាងវិញទៀតសំឡីគឺសំដៅន័យទៅឲ្យពណ៌ស)។
កមល KAMOL
មានន័យថា ផ្កាឈូក, បេះដូង, ដួងចិត្ត។ មិនសូវឃើញមានប្រើជាទូទៅទេ គឺច្រើនមានតែការក្នុងពាក្យកាព្យ។ កមលបុប្ផា, កមលកេសរ, កមលផាត់។
កម្ពុ KAMPUH
មានន័យថា មាស, កងដៃមាស, ខ្យងស័ង្ខ, គឺជាអ្វីៗ ដែលគេធ្វើអំពីមាន។ ឧ. កម្ពុមាលា = សុវណ្ណមាលា កម្រងមាស, ខ្សែមាស។
កម្រង KOAMROANG
អ្វីៗដែលកើតឡើងអំពីការក្រង។ ឧ. កម្រងផ្កា
កម្សាន្ត ឬ កំសាន្ត KOAMSANT
សម្រាកចិត្ត, ធ្វើឲ្យក្សាន្តចិត្ត, លំហើយចិត្ត, ធ្វើចិត្តឲ្យស្រាកស្រាន្ត, ឲ្យស្បើយចាក អារម្មណ៍ផ្សេងៗ។
ករណី KARANEY
រឿង, ហេតុ, អំពើ, ដំណើរហេតុ ឬដំណើរការណ៏ដែលកើតឡើង។
ករី KAREY កូនស្រី
ឈ្មោះលឺសូរទៅសមតែជាមនុស្សស្រី ក៏ប៉ុន្តែបានន័យថាៈ សត្វចតុប្បាទ ដែលមានប្រមោយជាដៃ គឺសត្វដំរី។ ប្រហែលជាអាចដាក់ទៅសមចំពោះ (អ្នកដែលជាឪពុកម្ដាយណា) មានបំណងចង់ឲ្យកូនស្រីរបស់ខ្លួនមានមាឌធំខ្ពស់ស្រឡះ។
ករុណា KARUNA កូនប្រុស
គឺសេចក្ដីអាណិតអាសូរ។ ឧ. សូមមានសេចក្ដីអាសូរករុណាចំពោះអ្នកទន់ខ្សោយ (បានទាំងកូនប្រុសស្រី)។
កប៌ូរ KARBO កូនស្រី
(ក្បូ័រ) ឈ្មោះជ័រឈើម៉្យាងមានក្លិនប្រហើរឆួលសម្រាប់ប្រើជាថ្នាំឈឺក្បាល, តឹងច្រមុះ។ល។ គេគឺជាកូនស្រីដែលសម្លេងល្អ, (បានក្លាយជាអ្នកចម្រៀងក៏ល្អម៉្យាងដែរណ៎) សម្លេងគេអាចព្យាបាលរោគ (ចំពោះអ្នកមានជំងឺសេ្នហា, ជំងឺគេងមិនលក់, ជំងឺអផ្សុក)។
កល្យាណី KOALYANEY
ស្រ្ដីមានលំអ, នាងល្អៈ ដូចនៅក្នុងពាក្យកាព្យថាៈ ស្រីកល្យាណី កែវកល្យាណី, មាសកល្យានី បើដាក់ឈ្មោះនេះគេច្រើនហៅ អាណី ឬ ស្រីណី វិញជាពាក្យខ្លី។
កវី KAHVEY
អ្នកប្រាជ្ញដែលតែឆន្ទ, ខាងកាព្យឃ្លោង, គឺជាអ្នកប្រាជ្ញខាងសំដី។ កវីនិពន្ធ អ្នកដែលតាក់តែងកាព្យឃ្លោង, កវីជាអ្នកនិពន្ធ។
កសិណ KASIN
ប្រែថា ទាំងអស់។ និយាយបានម៉្យាងទៀតថា សមថកម្មដ្ឋាន ដែលកំណត់យកពណ៌សម្បុរជាអារម្មណ៍ ជាគ្រឿងដឹកមកកាន់ចិត្ត។ ឬក៏ថាបានម៉្យាងទៀតថាៈ ជារូបតាងដែលជាសំអាងៈ កសិណសាក្សី, យកពាក្យសំដីរបស់អ្នកជាកសិណមិនបានទេ (សំដៅលើអ្នកដែលជួយយកអាសារគេ)។
កាកណិក KARKANEIK
គឺជាឈ្មោះប្រាក់ម៉្យាងពីបុរាណ ដែលគេប្រើនៅក្នុងមជ្ឈឹមប្រទេស។
កាកនាសូរ KARKANASO
នៅក្នុងរឿងរាមកេរិ៍្ត មានឈ្មោះ កាកនាសូរ នេះគឺជាឈ្មោះក្អែកមួយមានក្បាលជាយក្ស។ មិនល្អសោះ រូបអាក្រក់ហើយចិត្តខ្មៅទៀត។
កាកី KAKEI
ក្អែកញី។ ពាក្យផ្ទុយគឺ កាកៈ ក្អែកឈ្មោល។ ជាឈ្មោះប្រពន្ធស្ដេងមួយព្រះអង្គក្នុងរឿង កាកី គឺនាងកាកី(សំដៅទៅលើស្រ្តីដែលមិនស្មោះត្រង់, ឬក៏ថាផិតក្បត់, ជាស្រីដែលមានចិត្តខ្មៅដូចក្អែកញី) សព្វថ្ងៃបានក្លាយទៅជាពាក្យដែលតំណាងឲ្យអំពើផិតក្បត់របស់ស្ត្រី។
កាង KANH
មានន័យបីយ៉ាងៈ ១. លាតចំកាងទៅខាងៈ កាងស្លាប, កាងដៃ។ ២. សន្ទូចខ្លៃង, សន្ទូចក្រពើ, សន្ទូចត្រីផ្ទោង។ ៣. ឆ្អែតកាងចេញទៅខាងៈ គោស៊ីស្មៅឆ្អែតកាងពោះ។
ការកេត KARAKEIT
ជាឈ្មោះរបស់ឈើមួយប្រភេទ។ បញ្ជាក់ប្រាក់អំពីឫកណារអាកប្បកិរិយាសុភាពរាបសាររបស់កូនក្រមុំដ៏ស្រស់ប្រិមប្រិយហើយដែលបំពាក់ទៅដោយចរិយាសុភាពល្វតល្វន់គួរឲ្យចាប់ចិត្ត។
ការុណិក KARUNIK
អ្នកដែលមានសេចក្ដីករុណា អាណិតអាសូរចំពោះអ្នកដទៃ។ (គេជាមនុស្សរបស់សេចក្ដីករុណា, សេចក្ដីអាណិតអាសូរ) បើនៅក្នុងសង្គមមានមនុស្សឈ្មោះ ការុណិក ច្រើនគឺជាបុណ្យសំណាងរបស់ប្រទេសនោះ។
កាឡី KALEY
ផ្ទាំងសំពត់ចំនួន ២០ផ្ទាំង, ហៅថា សំពត់មួយកាឡី។ រឿងខ្មែរបុរាណមួយ “មរណៈមាតា” មានឈ្មោះនាង កាឡី តែគួរឲ្យស្ដាយដោយតួកាឡី គឺជាអ្នកដែលមានចិត្តអាក្រក់ (បានដល់សេចក្ដីលោភហាម)។
កិត្តិគុណ KITTIKUN
គុណដែលកើតមានមកពីកេរិ៍្តឈ្មោះ, ឬក៏សេចក្ដីចម្រើនដោយកេរិ៍្តឈ្មោះពីរោះពិសារ។
កិត្យា KITYA
បើពាក្យពេញគឺកិត្យានុភាព (មកពីកិត្តិ+អានុភាព) ប៉ុន្តែចាស់ៗ គាត់កាត់ (នុភាព) ចោលទុកតែ កិត្យា វិញស្រួលហៅ។ កិត្យា មានន័យពិរោះណាស់គឺកេរិ៍្តឈ្មោះ, អានុភាពនៃកេរិ៍្តឈ្មោះ។
កិន្នរ KEINOR
ឈ្មោះបក្សីមួយប្រភេទមានរូបដូចមនុស្សមានស្លាបហើរបាន ប៉ុន្តែធ្លាប់លឺនិយាយតែក្នុងរឿងបុរាណប៉ុណ្ណោះ ដូចនៅក្នុងពាក្យកាព្យមានហៅថា កេនរ ឬ កែណរ ដែលក្លាយពីពាក្យ កិន្នរ នេះឯង។
កិរិយា KIRIYA
បានន័យថាៈ លំនាំជាអំពើនៃឫកពារ។ (ឧ. កិរិយាល្អ, កិរិយាអាក្រក់)។ ដូច្នេះកាយវិការនេះស្ថិតនៅជាកណ្ដាលនៃសេចក្ដីល្អ និងអាក្រក់នៅឡើយទេ, មិនទាន់បញ្ជាក់ថា ជាកិរិយាល្អឬអាក្រក់ក៏ទេដែរ។
កុញ្ជរា KONHCHARA
ជាធំ, ដ៏ប្រសើរខ្ពង់ខ្ពស់, (សត្វចតុប្បាទមាឌធំ មានប្រមោយ គឺដំរី), ពីបុរាណក៏មានន័យថាៈ កុញ្ជរាធិបតី គឺមេទ័ពជើងគោក, ក្រោយមកហៅថា កុញ្ជរា កាត់ខ្លីមកវិញ។
កុមារ KOMAR
ឈ្មោះសាមញ្ញបំផុតងាយយល់ គឺសំដៅទៅលើ “ក្មេងប្រុស”។
កុមុទ KOMOUT
ផ្កាឈូកក្រហម។ ឈ្មោះនេះមិនប្លែកទេសម្រាប់ចាស់ៗបុរាណ, ប៉ុន្តែក៏អាចមានន័យរាងប្លែកៗ បន្តិចចំពោះកុលបុត្រ ធីតាជំនាន់ក្រោយៗមក។
កុម្ភៈ KOMPHEAK
ន័យពិតប្រាកដគឺៈ ក្អម, ឆ្នាំង។ បើរាប់ទៅតាមខែវិញ ជាឈ្មោះខែទី១១ (កុម្ភៈ) នៃសុរិយាគតិ (ខែទី១ នៃសុរិយាគតិ គឺខែមេសា) ហើយមានតែ ២៨ ឬ ២៩ថ្ងៃ ត្រូវគ្នានឹងខែហ្វេវ្រីយ៉េរ (ខែទី២) របស់បារាំង។ ដាក់ឈ្មោះកូនណាដែលកើតនៅខែ ២ថា “កុម្ភៈ” ក៏ល្អ, ស្រួលងាយចំណាំ ដឹងថាគេបានកើតនៅខែនោះ។
កុយ KOY
លឺទៅដូចអាក្រក់ស្ដាប់បន្តិច (មានអ្នកខ្លះលុះខ្លួនគេធំពេញវ័យ ក៏លៃដូរឈ្មោះដោយខ្លួនឯង ព្រោះយល់ថា វាមិនពីរោះ, អ្នកខ្លះអាចគិតថា មានន៏័យមិនល្អទៀតផងក៏មាន។ តាមពិតគឺមានន័យថាៈ ស្នែងរមាស = កុយរមាស។ រហស្សនាមរបស់តារាកំប្លែងខ្មែរម្នាកល្បីល្បាញពេញនិយមនៅកំឡុងចុងសតវត្សរ៍ទី២០ ដើមសតវត្សរ៍ទី២១ នាយកុយ, ក្រុមនាយកុយ។
កុលធីតា KOLTHIDA
ជាកូនស្រីនៃអ្នកមានត្រកូល, ជាគូនឹងកុលបុត្រ = កូនប្រុសនៃត្រកូល។
កុលាប KOHLARP
ឈ្មោះដើមផ្កាមួយប្រភេទ មានសណ្ឋានជាវល្លិ៍ ដើមមានបន្លា, មានក្លិនក្រអូបឆ្ងាញ។ ឈ្មោះកុលាប លឺពិរោះគួរឲ្យស្រឡាញ់ណាស់។
កុសល KOSAL
អំពើដែលកម្ចាត់បង់នូវសេចក្ដីអាក្រក់, ដែលល្អប្រពៃ, ដែលជាបុណ្យ ឬក៏ថាដែលប៉ិនប្រសប់, ដែលឈ្លាសវៃ, ដែលជាបណ្ឌិត។ ឈ្មោះនេះជាទូទៅគឺមិនសូវចូលចិត្តចំណុះនរណាម្នាក់ឡើយ។
កុសុមៈ KOSUMAH កូនស្រី
ឈ្មោះផ្កាឈើម៉្យាង។ ប៉ុន្តែគឺជានារីមានចិត្តមាំទាំណាស់។
កេតន៍ KEIT
ភាពឧត្តុង្គឧត្តម។
កេតុ KET
ឈ្មោះផ្កាយប្រចាំរាសីក្នុងនព្វគ្រោះ។ ឈ្មោះថ្មមានបន្លឺភ្លឺខ្លាំងដែលធ្លាក់ចុះពីអាកាសមកលើផែនដី។
កេសរ KESOAR
កេសរផ្កាៈ លំអងផ្កា។ សំណុំរោមវែង។ ត្រង់ ក សត្វចតុប្បាទ មានសត្វសីហៈជាដើម (កេសរសីហ៍)។
កែវ KEO
រតនៈវត្ថុសាច់រឹងហើយស្រួយ ធ្វើពីខ្សាច់នឹងសំណលាយដោយថ្នាំស្លឲ្យរលាយ ឬកើតឯងពីថ្មមានរស្មីភ្លឺឆ្លុះ។
ក្រវ៉ាន់ KROAVANN
ជាឈ្មោះឈើមួយប្រភេទ មានផ្កាក្រអូបឈ្ងុញស្រដៀងគ្នានឹងក្លិនចេកទុំ។
ក្រស្នា KROASNA
ឈ្មោះរុក្ខជាតិមួយប្រភេទពពួកក្លាំពាក់, ចន្ទន៍, មានក្លិនក្រអូប គេច្រើននិយមប្រើធ្វើជាថ្នាំកែរោគ។ ដាក់ឈ្មោះកូនស្រី កូនប្រុស ដើម្បីឲ្យពួកគេក្លាយទៅជាអ្នកមានកេរ្តិ៍ឈ្មោះល្អ ក្រអូបដូចជាក្លិនផ្កា ក្រស្នា យ៉ាងដូច្នោះដែរ។

ខ គ ឃ →