រំលងទៅមាតិកា

ឈ្មោះកូនខ្មែរ ផ្ដើមដោយ ខ គ ឃ

ឈ្មោះ ៤៤ ផ្ដើមដោយអក្សរ ខ គ ឃ ព្រមទាំងការសរសេរជាអក្សរឡាតាំង និងអត្ថន័យ។

ឈ្មោះផ្ដើមដោយ ខ

ខត្តិយា KHATTIYA
ក្សត្រ, ត្រកូលស្ដេច។ ខ្មែរយើងមិនសូរលឺមានឈ្មោះនេះប៉ុន្មានទេ, ខាងស្រុកថៃគេនិយម ហើយមានដាក់ឈ្មោះនេះច្រើន។ ឯនៅក្នុងរឿងព្រេងវិញសម្បូរមានឃើញ “ខត្តិយា” ជាស្រីដែលពូកែវោហារ។
ខន្តី KHAEM
ស្រស់បំព្រង, ស្រស់ប៉ប្រិម។ ឧ. មាត់ដឹតស្លាខិម, សាច់ឡើងសម្បុរខិម។ ច្រើនប្រើជាប់់ជាមួយ សុ នៅពីមុខ សុខិមៈ ល្អស្រស់ប៉ប្រិម, ដ៏សែនស្រស់បំព្រង។
ខីណា KHEYNA កូនប្រុស
ជាពាក្យដែលក្លាយមកអំពីពាក្យថាៈ ខីណាស្រព បានន័យថាៈ ព្រះអរិយបុគ្គលដែលអស់នូវអាសវៈហើយ (អស់កិលេស)។ ជាជំពូកបុគ្គល ដែលកំចាត់បង់អស់ ហើយនូវសេចក្ដីជាប់ជំពាក់ក្នុងជីវិត។ សរុបមកវិញគឺគេជាកូនប្រុស ស្រីដែលពោរពេញទៅដោយការលះបង់ដ៏ខ្ពង់ខ្ពស់, ជាឧត្តមមន្ត្រីដែលស្រឡាញ់ជាតិ មាតុភូមិ។
ខីរ KHEYR
ភាពបរិសុទ្ធនៃការចិញ្ចឺមជីវិត។ សំដៅចំពោះអ្នកដែលចិញ្ចឹមជីវិតដោយសេចក្ដីសុចរិត។
ខីរជាតិ KHEYRAHCHEAT
រសជាតិនៃទឹកដោះដែលរីតថ្មីៗ, រសជាតិនៃសេចក្ដីបរិសុទ្ធ, ភាពបរិសុទ្ធដែលជីវិតត្រូវទទួល។
ខុន KHON
មនុស្ស, ឬជាឈ្មោះរបស់កូនចត្រង្គ ដែឡសន្មតថាជាស្ដេច។ បើភ្ជាប់ពាក្យ ណាង ជា ខុនណាង ក៏បានទៅជាស្រ្តីជាភរិយាមន្ត្រី, ពាក្យបុរាណប្រើថាៈ ពួកខុនណាង, ជំទាវខុនណាង។
ខៀវ KHIEV
ពណ៌ខៀវ គឺពណ៌ផ្ទៃមេឃប្រក្រតី (មិនមែនជាផ្ទៃមេឃដែលប្រែប្រួលនៅពេលភ្លៀង ឬពេលស្រទុំ) អ្នកជាប់ត្រកូលខៀវនៅមានច្រើន។
ខេមរៈ: ខេមរា KHEMARAK/KHEMARA
ខ្មែរ (ក្នុងសិលាចារិកថាៈ ក្មែរ), ជាមនុស្សដែលមានសេចក្ដីក្សេមក្សាន្ត, ដែលផ្អែកទៅលើបទវីគ្គហៈ ថាៈ “ខេមំ យស្ស អត្ថីត > ខេមរា” ដូច្នោះគឺបានន័យថាៈ ខ្មែរ ឬសេចក្ដីក្សេមក្សាន្ត។
ខេមរង្សី KHEMARIANGSEY
ពន្លឺរស្មីនៃសេចក្ដីសុខក្សេមក្សាន្ត។
ខេមររង្សា KHEMARAKRIANGSA
គឺមានន័យដូចខេមរង្សីដែរ។
ខេមររង្សី KHEMARAKRIANGSEY
ពន្លឺចាំងចេញមករបស់ត្រកូលខ្មែរនាំឲ្យកើតសេចក្ដីសុខក្សេមក្សាន្ត, អ្នកមានសេចក្ដីក្សេមក្សាន្តព័ទ្ធជុំវិញហើយ។
ខេមរវង្ស KHEMARAKVONG
ត្រកូលខ្មែរ, ពូជពង្សខេមរៈបុត្រ។
ខេមរវង្សា KHEMARAKVONGSA
ត្រកូលខ្មែរជាច្រើន, ពូជខ្មែរទាំងអស់មូលជុំ។
ខេមរិន្ទ KHEMRIN
អ្នកជាធំជាងគេលើខ្មែរ, អ្នកមានសេចក្ដីក្សេមក្សាន្តពេញលេញ.
ខេមា KHEMA កូនស្រី
កូនស្រីអ្នកមានសេចក្ដីសុខក្សេមក្សាន្ត។ នាមព្រះរាជបុត្ររបស់ព្រះករុណា នរោត្តម សីហនុ “នរោត្តម ខេមានុរក្ស”
ខែណា KHAYNA
អ្នកដែលច្បាស់លាស់គ្រប់ការងារ, អ្នកមានការប្រឹងប្រែងរាល់កិច្ចការ។
ខៃណានុកូល KHAYNANUKOLE
អ្នកមានការទំនុកបម្រុងហើយដោយប្រឹងប្រែង, អ្នកទទួលការអនុគ្រោះមួយដោយម៉ត់ចត់។

ឈ្មោះផ្ដើមដោយ គ

គង់ KONG កូនប្រុស
មានន័យពីរយ៉ាងៈ ១. អ្នកថែរក្សាទ្រព្យសម្បត្តិឲ្យគង់វង្ស, អ្នកដែលមានសេចក្ដីសុខគ្មានសត្រូវបៀតបៀន គឺអ្នកស្បែកគង់។ ២. ជាអ្នកដែលមានទឹកចិត្តជាជនសប្បុរសធម៌មិនងាករេ។
គង្កា KONGKEA
ឈ្មោះរបស់ទន្លេធំមួយនៅក្នុងមជ្ឈឹមប្រទេសដែលមានក្បាលជាប់ពីភ្នំហិមាល័យ។ គេជាមនុស្សដែលមិនសូវគិតអំពីប្រយោជន៍ផ្ទាល់ខ្លួនជាធំទេ, ម៉្យាងតៀតគេជាប្រភេទបុគ្គលដែលសង្គមជាតិត្រូវការ។
គជ់ KOUCH
វត្ថុអ្វីមួយជាដុំពក មានសាច់រឹងដូចកែច កើតមានក្នុងសរីរាង្គកាយ ឬក្នុងក្បាលរបស់សត្វទាំងឡាយ។ ឈ្មោះរបស់អ្នកដែលមានប្រាជ្ញាដុះចេញមកពីកំណើត សម្រាប់ជួយដល់សេចក្ដីត្រូវការនៃមនុស្សលោកទូទៅ។
គណ KOUNN
បានន័យថាៈ ពួក, ក្រុម, បន, ហ្វូង។ ប្រើជាៈ មេគណ បានដល់ប្រធានព្រះសង្សតាមខេត្ត, ស្រុក។ ព្រះមេគណខេត្ត, ព្រះមេគណស្រុក។ល។ មានតួនាទីដូចជាចៅហ្វាយខេត្ត, ស្រុក ផ្នែកខាងព្រះសង្សដូច្នោះដែរ។
គតិ KAHTEIH
ដំណើរ, ការដើរទៅ, ផ្លូវគន្លង, ទីកើតផ្សេងៗ, និស្ស័យ, អធ្យាស្រ៏យ, ប្រាជ្ញាញាណ, ទីនៅ, បរិសុទ្ធ។
គន្ធ KUNTH
ក្លិន, គ្រឿងក្រអូប។ បើរៀងភ្ជាប់នៅមុខស័ព្ទដទៃអានថាៈ គ័ន ធៈ។ ឧ. មន្ទីរពេទ្យ គន្ធបុប្ផា, គន្ធពិដោរ (ក្លិនក្រអូបឈ្ងុយ), គន្ធវារី (ទឹកអប់, ទឹកក្រអូប) គន្ធរស (ទឹកក្រអូប, ទឹកអប់), គន្ធពាណិជ (អ្នកលក់គ្រឿងក្រអូប)គន្ធមាលា (ផ្កាក្រអូប), បើភ្ជាប់ សុ ពីមុខទៀតរឹតតែប្រសើរ។ គេអាចនិយមហៅថា ស្រីគន្ធ (ពិតជាពិរោះណាស់)។
គន្ធា KUNTHEA
អ្នកមានក្លិនក្រអូប (អ្នកសម្បូរក្លិនក្រអូប)។
គន្ធី KUNTHY
កូនទេវតាដែលគ្រប់គ្រងទិសខាងកើត (ទេវតារបាំ)
គម្ពីរ KOUMPHY
គឺជាពាក្យក្លាយមកពីពាក្យបាលី គម្ពីរ ប្រែថា៖ ជ្រៅ, សាស្រ្តាច្បាប់, ធម៌វិន័យ ដែលបូករួមដោយប៉ែក ដោយពួក, ដោយខ្សែនិមួយៗ។
គម្ភីរ KOUMPHY
អ្វីដែលមានជម្រៅ, ដែលជ្រៅ។
គិរី KIRI
ភ្នំ។
គី KI
កំពិសសមុទ្រ, ឬផ្អកធ្វើដោយកំពិសសមុទ្រ។
គុណ KUN
ដំណើរធ្វើឲ្យរីកចម្រើនកើនឡើង ដូចជាការគុណលេខជាដើម ន៏យមួយទៀតថាជាន់ថ្នាក់, លក្ខណៈ, សេចក្ដីល្អ, សភាពបែបបទ។
គោត KOTE
ឈ្មោះនេះនៅស្រុកក្រោម (កម្ពុជាក្រោម) មានច្រើនសំដៅដល់អ្នកជាធំជាងគេនៅក្នុងស្រុកភូមិ។
គោតម KODOME
(គោត ប្រៃថាៈ ព្រះអាទិត្យ, តម (ដំ) ប្រៃថាៈ ប្រសើរ) = ព្រះអាទិត្យដ៏ប្រសើរ, ដែលរស្មីចែងចាំងល្អ។ គោតមជាឈ្មោះអ្នកប្រាជ្ញជាច្រើនពីជំនាន់មុនៗ នៅមជ្ឈឹមប្រទេស។
គោតមី KOTAMEY
ជាស្ត្រីដែលមានពន្លឺរស្មីចែងចាំងដូចព្រះអាទិត្យ។ ជាឈ្មោះរបស់ម្ដាយមីងរបស់ព្រះពុទ្ធ, ត្រូវជាប្អូនស្រីបង្កើតរបស់ព្រះពុទ្ធមាតា សិរីមហាមាយា។ មានសេចក្ដីដំណាលថាៈ កាលព្រះពុទ្ធនាមសទ្ធត្ថប្រសូតបាន ៧ ថ្លៃព្រះមាតាក៏សោយទីវង្គត, ព្រះនាមគោតមីក៏ទទួលនាទីជាព្រះមាតាចិញ្ចឹមព្រះពុទ្ធរហូតទៅ
គោរព KOROUP
សេចក្ដីលំអុតលំអោន, ដំណើរប្រតិបត្តិតាមដោយយកចិត្តទុកដាក់។ នៅក្នុងរឿងព្រេងបុរាណមានឈ្មោះ “ព្រះច័ន្ទគោរព”។
គោរម KOROUM
ប្រើជា គោរម្យ៍ ក៏បាន។ សម្លេងដែលឮដូរគួរឲ្យពិរោះស្រើបស្រាល, គួរឲ្យរីករាយ។ ឧ. គោរមងារ = ជាឈ្មោះនៃឋានន្តរស័ក្ដដ៏ពិរោះរណ្ដំ។
គំនិត KOUMNIT
ពិតជាឧស្សាហ៏ឃើញមានឈ្មោះនេះច្រើនទាំងក្នុងសៀវភៅរឿង និងជីវិតខាងក្រៅ។ បានន័យថាៈ ការគិត, យោបល់។ ចាស់ៗ តែងនិយាយថាៈ ប្រាំបួនទាល់ដប់ទាល់, កុំឲ្យទាល់ គំនិត។
គំរូ KOMROU
បែប, សំណាក, តួយ៉ាង, ផែនទី។ ធ្វើជាគំរូឲ្យគេត្រូវមើលអ្នកឧស្សាហ៍យកធ្វើជាគំរូសម្រាប់ខ្លួនយើង។
គាំ KOAM
ទល់ទ្រ, ទប់ទល់។ ឈ្មោះនេះហាក់ដូចជាហត់បន្តិចហើយ ក៏ប៉ុន្តែវាមានសភាពមាំទាំល្អ។

ឈ្មោះផ្ដើមដោយ ឃ

ឃន KHORN
ជាដុំដែលតាន់, ន័យម៉្យាងទៀតថាៈ មេឃ។
ឃរណី KHARANY កូនស្រី
ស្រ្តីអ្នកជាម្ចាស់ផ្ទះ, អ្នកទទួលគ្រប់គ្រងផ្នែកខាងក្នុង។ ប្រើចំពោះកូនស្រី។
ឃាន KHEAN
អ្នកដែលតែងតែដឹងមុនជានិច្ច (សំដៅលើអ្វីៗដែលបំរុងកើតឡើងចំពោះខ្លួន)។
ឃីម KHIM
មនុស្សរួសរាយក្នុងសេចក្ដីថ្លៃថ្នូរ។
ឃឹម KHIM
ខ្មែរហៅគ្រឿងភ្លេងមួយប្រភេទរបស់ចិនថា ឃឹម ដែលមានស្នូលឈើ និងខ្សៃលួសសម្រាប់ដេញ។
ឃុន KHUN
ទីតំណែងសម្រាប់អ្នកមានបណ្ដាស័ក្ដិបួន (ហ៊ូពាន់) ឃុនភក្ដីសម្បត្តិ។

← ក ង ច →