ឈ្មោះកូនខ្មែរ ផ្ដើមដោយ វ
ឈ្មោះ ៤៨ ផ្ដើមដោយអក្សរ វ ព្រមទាំងការសរសេរជាអក្សរឡាតាំង និងអត្ថន័យ។
ឈ្មោះផ្ដើមដោយ វ
- វង VOGN
- ពាក្យជាឈ្មោះសំដៅសេចក្ដីស្និទ្ធស្នាល, ថ្លៃទងវង, មាសថ្លៃ, កែវវង, ស្រីថ្លៃ។
- វង្ស VONGS
- អ្នកថែរក្សាដំណរត្រូល។
- វង្សា VONGSA
- អ្នកតវង្សត្រកូលច្រើនដំណរមក, អ្នកទទួលមតក៌ តវង្សវែងឆ្ងាយ។
- វឌ្ឍនៈ VATHANAK
- អ្នកមានសេចក្ដីចម្រើន កើតកាលវាលគុម្ព។
- វណ្ណនា VANANEA
- ការសរសេរពន្យល់, ការពណ៌នា, អ្នកដែលមានគរុកោសល្យខាងពន្យល់។
- វណ្ណៈវតី VANAKVATEY
- ស្រ្តីអ្នកមានពូជអម្បូរ។
- វណ្ណសម្បត្តិ VANAKSAMBAT
- ការសម្បូណ៌ ដោយសម្បុរ។
- វន: វ័ន VORN
- អ្នកមានទីលំនៅ ជាទីអាស្រ័យ។
- វរៈ VAREAK
- អ្នកដែលប្រសើរ, អ្នកដែលខ្ពង់ខ្ពស់, អ្នកគួរប្រាថ្នាចង់បានជ្រើសយក។
- វរោ VARO
- បុគ្គលប្រសើរថ្លៃថ្លាគួរជាទីគោរព។
- វាសនា VEASNA
- ចរិយា ឬចរិតដែលអប់រំសន្សំទុកក្នុងចិត្ត, បុព្វចរិយានៃកាយប្រយោគ និងវីចីប្រយោគ។ មនុស្សមានវាសនាសំដៅថា ជាអ្នកមានសំណាង, បុណ្យភ័ព្វ មានវាសនាល្អ។
- វិចិត្រ VICHIT
- អ្នកដែលចូលចិត្តឆ្នៃរំលេជពណ៌។
- វិចិន្តា VICHENDA
- ការនឹងឃើញផ្សេងៗ ដោយសេចក្ដីអផ្សុក។
- វិច្ឆិកា VICHHEKA
- គឺខែវិច្ឆិកា (សម្រាប់អ្នកកើតខែនេះ) មាន៣០ថ្ងៃ, វិច្ឆិកាៈរាសី = រាសីសត្វខ្ទួយ។ គេជាអ្នកមានសម្ដីជាអាវុធសម្រាប់ការពារខ្លួន។
- វិជនី VICHENY
- ព្រះវិជនី គឺផ្លិតសម្រាប់បក់ថ្វាយក្សត្រិយ៍ ឬថាផ្លិតដែលព្រះរាជាទ្រង់ប្រើប្រាស់។ អ្នកជាបុគ្គលដ៏ស្មោះត្រង់របស់អ្នកមានឋានៈខ្ពស់។
- វិជ័យ VICHEY
- ការឈ្នះវិសេស, ដំណើរឈ្នះស្រេចបាច់។
- វិជរៈ VACHARAH
- រន្ទះពេជ្រ, ខ្សែភ្លឺផ្លេកបន្ទោរ, ជាអាវុធរបស់ព្រះឥន្ទ។
- វិទូ VITOU
- អ្នកដែលមានប្រាជ្ញា, អ្នកជំនាញ, ដែលឈ្លាសវាងវៃ។
- វិបុល VIBOL
- ធំទូលាយ, ក្រៃលែង ច្រើនក្រៃ, យូរបរិបូរ។
- វិភូ VIPHOU
- អ្នកជាធំក្រៃលែង អ្នកដែលមានអំណាចខ្លាំងពូកែ។
- វិភូសិត VIPHOUSIT
- អ្នកដែលត្រូវបានតាក់តែងស្អិតស្អាងហើយ។
- វិមល VIMOL
- ដែលឥតមានបន្ទិល, ឥតមានសៅហ្មង អ្នកដែលស្អាតបរិសុទ្ធ។ វិមលចិត្ត = ចិត្តដែលបរិសុទ្ធអ្នកដែលមានចិត្តបរិសុទ្ធកើតហើយ។
- វិមលា VIMALA
- ដែលរីកស្រស់ល្អគ្រប់រដូវកាល។
- វិមាន VIMEAN
- អ្នកដែលរស់នៅក្នុងសម្បតិ្តវិសេសវិសាល អ្នកមានទីនាំងល្អវិសេសដូចទេវតា។
- វិមុត VIMUT
- អ្នកមានឥស្សរភាព, អ្នករួចស្រឡះ, ដែលផុតស្រឡះហើយ។
- វិមុត្តិ VIMUT
- ការគេចអំពីផ្លូវជាទីបំផុតនៃដំណើរទៅមក (គឺផ្លូវអំពីផ្លូវ កើត ស្លាប់ គឺអ្នករកឃើញព្រះនិព្វាន)។
- វិម្ហយ VIMHAYA
- សេចក្ដីអស្ចារ្យ, ការលាន់មាត់សរសើរ, អ្នកមានដំណើរហេតុគួរឲ្យស្រឡាញ់។
- វិរតិ VIRATI
- អ្នកដែលបានកាន់ត្រណម (តម) មានចរិតវៀរចាកអំពើអាក្រក់។
- វិរាព VIREAP
- អ្នកមានសម្រែកជាអាវុធ។ អ្នកមានសម្រែកជាគ្រឿងបញ្ហា។
- វិរាល័យ VIREALAY
- អ្នកដែលមានលំនៅជាប្រចាំនៅក្នុងជុំរុំទ័ព ទីស្ថានសម្រាប់មន្ត្រីអ្នកចម្បាំង។
- វិរិយ VIRIYA
- អ្នកមានសេចក្ដីព្យាយាម, តេជៈភាព។
- វិរិយា VIRIYA
- ដូចគ្នាជាមួយ វិរិយ ដែរ។ បែបបទនៃសេចក្ដីព្យាយាម។
- វិវឌ្ឍន័ VIWATHN
- សេចក្ដីរីកចម្រើន, អ្នកចម្រៀងក្មេងម្នាក់ឈ្មោះ សយ វិវឌ្ឍន៍ (ចូលចិត្តច្រៀងចម្រៀងខ្មែរកម្ពុជាក្រោម)។
- វិស័យ VISAY
- អ្នកដែលប្រើអារម្មណ៍ ឬប្រើគំនិត។
- វិសាខ VISAKH
- អ្នកដែលកើតក្នុងខែវិសាទ (រដូវត្រៀមរៀបចំធ្វើស្រែ (ខែពិសាខ) រៀបចំដាស់ថ្នាល)។
- វិសាល VISAL
- មនុស្សវិសាលសន្តាន = អ្នកមានចិត្តទូលាយបើកហើយ។ វិសេសវិសាល = ប្រសើរអស្ចារ្យ។
- វិសិដ្ឋ VISETH
- ស្មើនឹងពាក្យពិសិដ្ឋ។ វិសិដ្ឋភណ្ឌ = របស់ឧត្តម, ប្រសើរឧត្តម។ វិសិដ្ឋវិជ្ជា = វិជ្ជាជាន់ខ្ពស់។
- វិសុទ្ធ VISOTH
- ការបរិសុទ្ធ, ស្អាតបរិសុទ្ធថ្លៃពិសេស។ វិសុទ្ធចិត្ត ចិត្តដែលឥតសៅហ្មង, ឥតមានមន្ទិល។ វិសុទ្ធញាណ អ្នកមានញាណ និងសន្តានបរិសុទ្ធ។
- វិសេស VISES
- អ្នកមានសន្តានទូលាយ ប្រសើរប្លែក។ វិសេសវិសុទ្ធ ស្អាតវិសេស, ស្អាតឥតមានហ្មង។ វិសេសវិសាល ទូលាយល្អប្រសើរ។
- វិហា VIHEA
- មានន័យថា ស្ថានសួគ៌, អាកាសវេហាស៌។
- វីរៈ VIRAK កូនប្រុស
- ដែលខ្ជាប់ខ្លួនមាំមួន, អ្នកដែលមានសេចក្ដីព្យាយាមខ្ជាប់ខ្លួន។ អ្នកអង់អាចក្លាហាន, អ្នកប្រាជ្ញ, អ្នកចម្បាំង។ វីរជន = ជនអង់អាច។ វីរបុរស = បុរសអង់អាច។ វីរភាព = ភាពដែលក្លាហានអង់អាច។ វីរសេនា = សេនាមោះមុត, សេនាខ្លាំងពូកែ។
- វុឌ្ឍិ VUTHIH
- អ្នកមានសេចក្ដីចម្រើន អ្នកពេញចិត្តជាមួយភាពលូតលាស់។
- វៀងជ័យ VIENGCHEY
- ប្រើជាគោរមងាររបស់សេនាបតីក្រសួងព្រះបរមរាជវាំង (ក្រុង ឬវាំងមានជ័យ) អ្នកឧកញ៉ាវាំងវរៈវៀងជ័យ។
- វេទ VET
- ចំនេះវិជ្ជា, សេចក្ដីដឹង។
- វេទី VETY
- អ្នកចេះវេទ, អ្នកមានចំនេះ, ពួកអ្នកប្រាជ្ញ = ពួកវេទី, ក្រុមអ្នកវេទី = ក្រុមអ្នកមានតម្រិះ។
- វេស្សន្តរ VESSANDOR
- អ្នកដែលកើតនៅចន្លោះរវាងនៃក្រុមឈ្មួញ (កើតកណ្ដាលទីផ្សារ)។ គឺជាព្រះនាមរបស់ព្រះបរមពោធិសត្វ ក្នុងមហាវេស្សន្តរជាតក។ មានសេចក្ដីដំណាលថា ពេលប្រសូត្រភ្លាម ក៏ចេះស្ដីភ្លាម និយាយទៅកាន់ព្រះមាតាថាៈ “មាតាមានទ្រព្យទេ បុត្រចង់ឲ្យទានបន្តិច” យ៉ាងដូច្នេះក៏លែងចេះស្ដីរហូតទាល់ធំដឹងក្ដីដូចមនុស្សធម្មតាឯទៀតដែរ។
- វេហា VEHA
- គឺអាកាស, មេឃ (ឲ្យចំន័យៈ ប្រទេសជាទីសប្បាយរីករាយនៃពួកបក្សី)។ ជាអ្នកមានសេរីភាពគ្រប់គ្រាន់។
- វោហារ VOHAR
- ពាក្យពេចន៍, សំនួនសំដី (សម្ដី)។ អ្នកប៉ិនប្រសប់ឈ្លៀសវៃខាងសម្ដី។ អ្នកដែលស្ទាត់ជំនាញចេះនិយាយថ្លែងសេចក្ដីយ៉ាងពិរោះក្បោះក្បាយ ឥតមានរអាក់រអួល។