ឈ្មោះកូនខ្មែរ ផ្ដើមដោយ ន
ឈ្មោះ ៣៦ ផ្ដើមដោយអក្សរ ន ព្រមទាំងការសរសេរជាអក្សរឡាតាំង និងអត្ថន័យ។
ឈ្មោះផ្ដើមដោយ ន
- នគរ NOKOR
- បូរី, ក្រុង, អ្នកនគរ។ ឈ្មោះនេះបើជាន័យប្រហាក់ប្រហែលឈ្មោះ ធានី ដែរ។
- នគរជុំ NOKORCHUM
- ឈ្មោះនេះជាឈ្មោះរបស់ប្រទាលមួយប្រភេទ, អ្នកជំនួញចូលចិត្តដាំ ដើម្បីលក់ទំនិញដាច់បានច្រើន ដូច្នេះឈ្មោះនេះច្បាស់ជាមនុស្សដែលអ្នកផងចោមរោម ចូលចិត្តច្រើន។
- នទី NEAKTY
- ជាទីស្នាក់អាស្រ័យនៅត្រជាក់ត្រជុំ។
- នព្វរ័តន៍ NUPAROATN
- អ្នកមានពន្លឺ៩ប្រការដូចកែវ។ ពន្លឺទាំង៩លើលោកនេះគឺ មុក្ដា, (បុទុមរាគ) ទទឹម, បុស្សរាគ (ប៊ុត), ពេជ្រ មរកត, ពៃទុរ្យ, ប្រពាល, កណ្ដៀថ, ផលិក។
- នភា NEAPHEA
- អាកាស, មេឃ, ពពក។ មែនហើយគេគឺជាអ្នកនៅទីខ្ពស់ប្រៀបដូចមេឃដូច្នោះដែរ។
- នរៈ NOREAK
- បុរស (មនុស្សភេទប្រុស)។ ឈ្មោះនេះជាគូនឹងឈ្មោះនារី។ ចាស់បុរាណច្រើន ថែមន័យខាងចុង ឬចាងដើមដើម្បីលម្អឲ្យកាន់តែពិរោះដូចជាៈ នរជាតិ (ជាតិមនុស្ស)។ នរជេដ្ឋ (មនុស្សដែលធំជាងគេ)។ នរទេព (អ្នកដែលជាទេវតា)។
- នរាយណ៍ NEAREAY
- គឺជានាមម៉្យាងរបស់ព្រះវិស្ណុ, នាមនេះកើតឡើងដោយសារព្រះវិស្ណុបញ្ចេញអនុភាពបែងភាគ ឲ្យកើជារូបផ្សេងៗ មានរូបមនុស្សជាដើម ហៅថា ព្រះនារាយណ៍បែងភាគ។
- នរិន្ទ NORIN
- អ្នកដែលធំជាងគេ, មានអំណាចជាងគេ។
- នរិន្ទ្រពង្ស NARINDARAPONG
- ព្រះនាមព្រះរាជបុត្រមួយព្រះអង្គ, វង្សអ្នកធំ។
- នរេន្ទ្រ NOREINTR
- អ្នកដែលជាធំជាងអស់មនុស្ស។
- នរេសូរ NOREISO
- អ្នកដែលជាធំជាងគេនៅក្នុងប្រទេស។
- នរោត្តម NORODOM
- ដែលឧត្ដមជាងអស់មនុស្ស។
- នារី NEARY
- ន័យចំគេជាមនុស្សស្រីតែម្ដង។
- នារីផល NEARYPHAL
- ឈ្មោះឈើមានផ្លែម៉្យាង, មានផ្លែរូចដូចស្រីក្រមុំ (មានតែក្នុងព្រៃហេមពាន្ត)។
- នារីរ័ត្ន NEARYROATH
- ស្រី្តកែវ (អ្នកដែលមានលម្អ និងចរិយាដ៏ប្រសើរបំផុត ទុកស្មើកែវវិសេស)។
- និករ NIKOAR
- ពពួកមនុស្សលោក។
- និកាយ NIKAY
- គឺជាការប្រជុំនិមួយៗ ពួកក្រុមដែលបង្កើតឡើងដើម្បីសម្ដែងមតិទស្សនៈផ្សេងណាមួយ។
- និគម NIKUM
- កន្លែងដែលប្រជុំភូមិច្រើនបង្កើតឡើងបានទៅជាទីប្រជុំជនមួយមានផ្សារសម្រាប់ការទាក់ទងគ្នា។
- និត្យ NIT
- នៅជាប់ជាប្រចាំ, រឿយៗ។ ទោះជាយ៉ាងណាក៏គេជាមនុស្សរវល់ មមាញឹកខ្លាំងណាស់ ពីព្រោះគេត្រូវធ្វើយ៉ាងណានៅឲ្យបានជិតស្និទ្ធជាមួយមនុស្សច្រើននាក់។
- និមល NIMOL
- ជាមនុស្សស្រីដែលឥតសៅហ្មង, ឥតមានមន្ទិល។
- និម្មិត NIMIT
- អ្នកបង្កើតឫទ្ធិ, តំណែងខ្លួន, ឬក៏ថាជាដើមហេតុ, ជាគ្រឿងសម្គាល់, ជាគោល, ជាចរឹក។
- និយម NIYUM
- អ្នកដែលមានការកំណត់, ឬថាការចូលចិត្ត។ អ្នកដែលជាទីចូលចិត្តរបស់មនុស្សទាំងឡាយ។
- និរតី NIRAHDEY
- ឈ្មោះទិសតូចនៅចន្លោះទិសទក្សិណ (ត្បូង) និងទិសបស្ចឹម (លិច)។
- និរន្តរ៍ NIRONTR
- ជានិច្ច, ឥតឈប់, ដែលមិនមានចន្លោះ។ ឈ្មោះនេះបានដល់អ្នកដែលមានសេចក្ដីព្យាយាមជាប់ជានិច្ចមិនមានការធ្វេសប្រហែសមួយពេលណាឡើយ។
- និរោធ NIROTE
- មនុស្សអាថ៌កំបាំង, អ្នកដែលមិនបញ្ចេញឲ្យអ្នកដទៃដឹងអំពីខ្លួនឡើយ។
- និល NIL
- ត្បូងកណ្ដៀង, កូនស្រី ប្រុស ដែលមានសបឲម្បុរស្រអែមរលើបរលោងគួរឲ្យចង់គន់។ នៅក្នុងសាស្រ្តារឿងមានឈ្មោះ និលពិសី, និលរ័ត្ន....។ល។
- និលពិសី NILPISEY
- ឈ្មោះប្រទាលម៉្យាងសម្រាប់ប្រើធ្វើជាថ្នាំ។ ហៅឈ្មោះកូនថា និលពិសី ក៏មានន័យថា មនុស្សដែលមិនមានរោគជាប់តាមខ្លួនឡើយ។
- និលរ័ត្ន NILROTH
- គឺត្បូងកណ្ដៀង (កែវដែលមានពណ៌ខៀវ)។
- និវត្ត NIVATH
- អ្នកដែលទៅហើយតែងត្រឡប់មកវិញជានិច្ច។
- និសាករ NISAKOAR
- ព្រះច័ន្ទ (ជាគូនឹងពាក្យ ទិវាករ ព្រះអាទិត្យ) ដូចគ្នានឹងពាក្យទិវា ជាគូនឹងរាត្រីដូច្នោះដែរ។
- និស័្សយ NISAY
- អ្នកដែលត្រូវបានអ្នកដទៃយកអាសារឲ្យនៅអាស្រ័យនិងទំនុក ឧបត្ថម្ភ។
- នី NY
- រុក្ខជាតិព្រៃភ្នំមួយប្រភេទ មានសាច់ស្រដៀងដើមស្រឡៅ, មានដើមធំខ្ពស់ (ដើមនី) ច្រើនផ្សំឈ្មោះនេះនៅពាក្យដើមដទៃទៀត។ ឧ. ដានី, សុផានី, សុភានី, វន្ថានី។ល។
- នួន NUON កូនស្រី
- ដែលផូរផង់, ត្រចះត្រចង់, ហ្មត់ហ្មង។ ទោះនៅពីមុខ ឬនៅពីក្រោយក៏អាចទាញយកភាពល្អត្រចង់របស់ខ្លួនទៅជាមួយបានដូចគ្នា។ ឧ. ស៊ីនួន, នួនល្អង, នួនស្រី (សម្រាប់កូនស្រី)។
- នួនអនង្គ NUON ANONG
- សែនស្រស់ត្រកាល។ ល្អល្អៈហ្មត់ហ្មង។ ស្រស់ល្អពីរជាន់ ដោយសារពាក្យថា (នួន = ផូរផង់) (អនង្គ = ល្អឆើតឆាយ)។
- នេត្រ NET
- គឺជារាជស័ព្ទមានន័យថា ភ្នែក។ បើហៅថា នេត្រា NETTRA. ក៏ពិរោះដែរ។
- នោរី NORY
- ជាឈ្មោះបក្សីមួយប្រភេទ រូបស្រដៀងសេកសោមមានសម្បុរក្រហម។