ឈ្មោះកូនខ្មែរ ផ្ដើមដោយ ព
ឈ្មោះ ៦២ ផ្ដើមដោយអក្សរ ព ព្រមទាំងការសរសេរជាអក្សរឡាតាំង និងអត្ថន័យ។
ឈ្មោះផ្ដើមដោយ ព
- ពង្រ PONGRO
- ឈ្មោះឈើមួយប្រភេទ (ផ្លែរបស់វា) ប្រជាម្ជូរ, ពង្រខ្លះមិនជូរប៉ុន្មានទេ ប៉ុន្តែខ្លះជូរណាស់។ “ពង្រស្វាយជ្រុំ ជំរំបុប្ផា”។
- ពង្រីក PONGRIK កូនប្រុស
- ការធ្វើឲ្យរឹងបំបាត់ការទន់ជ្រាយ។ ឈ្មោះពិសេសចំពោះកូនប្រុសភ្លោះពីរ (គឺ រិក ហើយ រឹង ទៀត។
- ពង្ស PONG
- វង្សត្រកូល ឬថាពូជអម្បូរ ឬថាដំណើរលំអាននៃវង្សត្រកូល។ ហៅម៉្យាងទៀតថា ពាក្យសម្រាប់សន្មតហៅឆ្នាំកំណើតរបស់មនុស្ស តម្រូវនឹងពូជពង្សរបស់ៈ ទេព្តា, មនុស្ស, យក្ស តាមហោរាសាស្រ្ត។
- ពង្សាវលី PONGSAVALY
- បានន័យថា ខ្សែញាតិវង្ស ជាចំបួរវង្សត្រកូលតៗគ្នាមក។
- ពណ្ណរាយ PONNAREAY
- ដែលធ្វើសម្បុរឲ្យភ្លឺត្រចះ, ដែលមានរស្មី, ពន្លឺព្រោងព្រាយ ល្អប្រពៃ។
- ពនាល័យ PONEALEY
- ការរស់នៅក្នុងព្រៃ ឬថាលំនៅស្ថានក្នុងព្រៃ។
- ពនាស្រ័យ PONEASRAY
- ការរស់នៅក្នុងព្រៃ។
- ពនិតា PONITA កូនស្រី
- ស្រ្ដី, ភរិយា(សម្រាប់តែកូនស្រី) ច្រើនប្រើក្នុងពាក្យកាព្យៈ រីឯ ភស្ដា និង ពនិតា គូទាំងពីរប្រាណ មានទ្រព្យស្ដុកស្ដម្ភ សមជាអ្នកមាន គ្រប់គ្រងធនធាន ជាសុខរាល់ថ្ងៃ។
- ពន្យល់ PONYOL
- គឺការដែលត្រូវធ្វើឲ្យយល់។ អ្នកនាំគេឲ្យយល់មនុស្សល្អ។
- ពន្លក PONLOK
- ដើមខ្ចីដែលទើបនឹងដុះចេញពីគ្រាប់ ឬអំពីដើម។ សំដៅទៅលើការរីកលូតលាស់ជានិច្ចរបស់មនុស្ស។ ហៅម៉្យាងទៀត ចំពោះមនុស្សដែលស្រឡាញ់ ជាទីប្រតិព័ទ្ធសេ្នហា ដោយប្រៀបថា ខ្ចីល្វក់ ដូចជាពន្លកអ្វីៗ ដូច្នោះដែរ កែវពន្លក, ពៅពន្លក, មាសពន្លក, ស្ងួនពន្លក។
- ពណ៌: ព័ណ៌ POR
- សម្បុរ, ពួក, ថ្នាក់ត្រកូល, ភេទ, ឬសំដៅដល់ពាក្យសរសើរគុណ ឃើញមានច្រើនប្រើពាក្យ សុ ឬ សា ជាខាងដើមជា សុព័ណ៌, សាព័ណ៌ ជាដើម។
- ពល POL
- ជាកម្លាំង, សេនា ឬកងទ័ព។ សម័យពីដើមមិញ ច្រើនប្រើជាអ្នកកងការពារ ឬកម្លាំងផ្សេងៗ មាន៦ពួកៈ ពលព្រះ, ពលដំរី, ពលសេះ, ពលអង្គរ័ក្ស, ពលចែវ, ពលគុន។
- ពលស័ក្កិ POLSAK
- សន្ទុះ អំណាច កំលាំង។ បញ្ជាក់អំពីមហិទ្ធិឫទ្ធីដ៏អស្ចារ្យបំផុត។
- ពលិការ PAHLIKAR
- កិរយាធ្វើនូវពលីបូជា។ ខ្មែរយើងច្រើននិយាយស្រួលមាត់ថា ព្លីការ, ព្លិការ ច្រើនសំដៅចំពោះការបូជា, បួងសួងតាំងហោមផ្សេងៗ។
- ពលី PAHLI
- ចំណែកបុណ្យ, ការបូជា, សួយសារអារករ។
- ពសុធា POHSOTHEA
- ដាក់បានទាំងប្រុស ទាំងស្រី។ គឹដី, មហាប្រឹថពី។
- ពសុន្ធរា POHSONTHAREA
- ផែនដី, ពិភពលោក, ពសុធា, បឋវី។
- ព័ស្ដ POAS
- ទីលំនៅ, ទីតាំង, ទ្រព្យ, ឥវ៉ាន ជាដើម ឬក៏ថាជាគ្រឿងបណ្ណាការ, ជំនួន។
- ពហុមន្តី PAHUMANTEY
- អ្នកមានគំនិតច្រើន, អ្នកគិតឃើញច្រើន, អ្នកប្រឹក្សាច្រើន គឺមនុស្សដែលឧស្សាហ៍ប្រឹក្សាពិគ្រោះនឹងអ្នកដទៃច្រើន។
- ពាណិជ PEANNICH
- អ្នកជំនួញ, អ្នកលក់ដូរ។
- ពានរិន្ទ PEANARIN
- ស្ដេចស្វា (ក្នុងរឿងរាមកេរ្តិ៍) ហៅ សុគ្រីព, ហនុមាន (ពានរិន្ទ)។ អ្នកមានអំណាចមានកម្លាំង។
- ពានរេន្ទ្រ PEANAREINTR
- ស្ដេចស្វា (ក្នុងរឿងរាមកេរ្តិ៍) ហៅ សុគ្រីព, ហនុមាន (ពានរិន្ទ)។ អ្នកមានអំណាចមានកម្លាំង។
- ពាយព្យ PEAYORP
- ពាយ័ព្យ ឈ្មោះទិសតូចមួយនៅចន្លោះទិសឧត្តរ និងបស្ចឹម។
- ពាយុបុត្រ PEAYUBOT
- (កូនព្រះពាយុ) អ្នកដែលមានសន្ទុះលឿនដូចខ្យល់។ ជាឈ្មោះរបស់ស្ដេចពានរមួយក្នុងរឿងរាមកេរ្តិ៍ (គឺជាឈ្មោះមួយទៀត ដែលសំដៅចំពោះហនុមាន)។
- ពាលី PEALI
- ឈ្មោះស្ដេចស្វាក្នុងរឿងរាមកេរ្តិ៍។
- ពាលុកា PEALUKA
- ដីខ្សាច់ (អ្នកដែលមិនងាយនរណាបំបែកបាន)។
- ពាលៃ PEALEY
- សាលាមានដំបូលហើបខ្ពស់ ដាច់ឆ្ងាយពីដំបូលរបៀង ដែលប្រើជំនួសរោងឧបោសថ (ព្រះវិហារ) នៅពេលពុំទាន់សង់រួច។ គ្រឿងការពារទីដំបូងបង្អស់។
- ពាហុយុទ្ធ PEAHUHYUTH
- ការតយុទ្ធប្រយុទ្ធគ្នាដោយដៃសុទ្ធ, គឺប្រដាល់។
- ពាហុរ័ត្ន PEAHUHROTH
- ជាគ្រឿងប្រដាប់កាយធ្វើដោយរនតវត្ថុមានមាសជាដើមសម្រាប់ស្រី្ដពាក់ត្រង់កំភួនដៃ ឬត្រង់ដើមដៃ។
- ពិច័យ PICHAY
- ការជ្រើសរើសសម្អិតសម្អាត ដោយផ្ចឹតផ្ចង់ (សំដៅចំពោះអ្នកដែលស្អាតបាតជានិច្ចទាំងកាយ វាចា ចិត្ត)។
- ពិចិត្រ PICHET
- អ្នកដែលចូលចិត្តធ្វើឲ្យអ្វីៗក្នុងជីវិតមនុស្សលោកឲ្យបានល្អប្លែក មានរំលេចពណ៌ជានិច្ច។
- ពិជ័យ PICHEY
- ជាការឈ្នះដោយស្រេចបាច់ ឥតមានសង្ស័យ (រឿងបុរាណមានឈ្មោះ ពិជ័យវង្សា = ពូជពង្សអ្នកឈ្នះ)។
- ពិជិត PICHIT
- អ្នកដែលច្បាំងឈ្នះ, អ្នកដែលមិនអាចមាននរណាមកអាចផ្ចាញ់បាន។
- ពិជេដ្ឋ PICHETH
- អ្នកដែលប្រសើរ និងចម្រើនបំផុត មិនមាននរណាជាចម្បងបាន។ ពីសម័យបុរាណមានងារមន្ត្រីខាតុលាការនាម ឧកញ៉ា ពិជេដ្ឋ។
- ពិដោរ PIDOR កូនស្រី
- កូនស្រីដែលមានក្លិនក្រអូបល្អ (ក្រអូបអាកប្បកិរិយា, ចរិយាមារយាទ, កេរ្តិ៍ឈ្មោះ)។
- ពិណ PIN
- ចាប៉ី, ដេញពិណ (អ្នកដែលទាក់ទាញចំណាប់អារម្មណ៍អ្នកដទៃជានិច្ច)។
- ពិទ័គ្ធ PITEAKH
- អ្នកដែលឈ្លាសវៃ, មានចំណេះដឹង, ប៉ិនប្រសប់។ គោរម្យងារមន្ត្រីជាមេទ័ព = ព្រះពិទ័គ្ធ ឫទ្ធិក្រៃ។
- ពិទាយ PITEAY
- ឈ្មោះកែវមួយប្រភេទពណ៌ក្រហមខ្ចី (កែវពិទាយ)។
- ពិទូរ្យ PITOUR
- ពេជ្យភ្នែកឆ្មា (ត្បូងពិទូរ្យ, កែវពិទូរ្យ) ជនអ្នកមានកែវជាអំណាច។
- ពិទ្យាធរ PITYEATHOR
- អ្នកទ្រទ្រង់វិជ្ជា បានដល់ពួកអ្នកដែលនៅព្រៃហេមពាន្ត មានវិជ្ជាអាចឲ្យសម្រេចប្រយោជន៍បាន។
- ពិធូរ PITHOUR
- ឈ្មោះអ្នកប្រាជ្ញមួយរូប (ជាអង្គពោធិសត្វ ពិធូរបណ្ឌិត)។
- ពិន PIN
- ពិនពិភព (ស្ដេចចក្រព័ត្តិ ជាធំលើសស្ដេចទាំងឡាយ) អ្នកដែលជាកំពូល, ជាចម្បងលើសគេ។
- ពិនតូ PINTO
- ចានស្រាក់ (សម្រាប់ដាក់បាយ ម្ហូប, ភាជនៈធ្វើពីស្ពាន់ ឬប្រាក់ រាងមូលច្រឡោ សម្រាប់ដាក់ចានសម្លតូចៗ បានច្រើន មានគម្រប)។ អ្នកដែលមានគំនិតរកស៊ីស្រាក់គ្នា។
- ពិនិត្យ PINIT
- ជាអ្នកមានសេចក្ដីពិចារណា, មានការសង្កេតមើលដោយល្អិតល្អន។
- ពិន្ទង PINTORNG
- មច្ឆាជាតិមួយប្រភេទ ជាត្រីធំសម្បើម កើតនៅក្នុងសមុទ្រ។ ជាអ្នកមានបានដោយការរកសន្សំ។
- ពិមល PIMOL កូនស្រី
- កូនស្រីដែលស្អាតថ្លា ស្រស់បំព្រង់គ្រប់រដូវកាល។ តាមខ្មែរដើមបើកូនស្រីជា វិមល = និមល ឬនិម្មល។
- ពិមាន PIMEAN
- អ្នកមានលំនៅស្ថាន ឬយានជំនិះល្អវិសេសដូចទេវតា។ ជនដែលរស់នៅក្នុងសម្បត្តិវិសេសវិសាល។
- ពិម្ព PIMP
- កូនដែលដូចស្រដៀងបេះបិទទៅនឹងតា យាយ, ឪពុកម្ដាយ។
- ពិរាល័យ PIREALAY
- ជាលំនៅរបស់ជនក្លៀវក្លា, អ្នកអង់អាច, លំនៅរបស់អ្នកចម្បាំង។
- ពិរុណ PIRUN
- ពាក្យសម្រាប់ហៅទេវតា ជាអ្នកបណ្ដាលឲ្យមានភ្លៀង។
- ពិសា PISA
- រសឆ្ងាញ់ចាប់មាត់, បុគ្គលដែលមានសេចក្ដីសុខគ្រប់ពេល។
- ពិសាខ PISAKH
- = វិសាខ ឈ្មោះខែទី៦ នៃចន្ទគតិ និងឈ្មោះនក្ខត្តឫក្សទី១៦(ពិសាខឫក្ស)។
- ពិសាល PISAL
- = វិសាល VISAL. ទូលាយ, ជាធំ, ដែលប្រសើរ។ បុគ្គលមានចិត្តទូលាយ។
- ពិសិដ្ឋ PISETH កូនប្រុស
- = វិសិដ្ឋ VISETH. ដែលប្រសើរវិសេស, ថ្លៃថ្លា។ ពាក្យសម្រាប់ហៅបុរស ស្រ្តីជាទីស្រលាញ ដោយប្រៀបប្រដូចនឹងមាស ឬកែវដ៏ប្រសើ។
- ពិសុទ្ធ PISOTH
- = វិសុទ្ធ VISOTH. អ្នកដែលមានសេចក្ដីបរិសុទ្ធ, គឺជាសេចក្ដីស្អាតវិសេសហ្មត់ហ្មង។
- ពិសេស PISES
- = វិសេស VISES. ដែលប្លែកលើស, ដំណើរលើសលន់ (មិនមែនធម្មតា)។ អ្នកពិសេស, ពួកពិសេស។
- ពិស្ដារ PISDAR
- មានភាពទូលាយវែង។ ភាពច្បាស់លាស់មួយ។
- ពីភ័ក្តិ PIPHEAK
- ជនអ្នកជំនាញក្នុងការថ្នាក់ថ្នម, ពិភ័ក្តិរក្សា = ការរក្សាផ្លាស់វេនគ្នា ផុតពីថ្នាក់ដល់ថ្នម, ត្រឡប់ពីថ្នមមកថ្នាក់។
- ពុធ PUTH
- អ្នកមានប្រាជ្ញា, ផ្កាយព្រះពុទ្ធ។
- ពេចន៍ PECH
- អ្នកពូកែពាក្យសំដី។
- ព្រហស្បតិ៍ PROAHOAST
- ឈ្មោះថ្ងៃទី៤ ក្នុងសប្ដាហ៍។
- ព្រឹក្ស PROEUKS
- ដើមឈើ សំដៅទៅរកភាពរឹងមាំសន្សឹម។