ឈ្មោះកូនខ្មែរ ផ្ដើមដោយ ថ ទ ធ
ឈ្មោះ ៥១ ផ្ដើមដោយអក្សរ ថ ទ ធ ព្រមទាំងការសរសេរជាអក្សរឡាតាំង និងអត្ថន័យ។
ឈ្មោះផ្ដើមដោយ ថ
- ថន THAN កូនប្រុស
- បុរស ស្រ្តី អ្នកពូកែគ្រប់គ្រង ថែរក្សាកូន(គ្រួសារ)។
- ថវិកា THAHVIKA
- សំដៅទៅលើអ្នកដែលមានថង់យាម (សម្រាប់គ្រឿងឧបភោគ បរិភោគ)។
- ថានី THANY កូនស្រី
- កូនស្រីដែលពូកែថែរក្សាកូន និងគ្រួសារ។
- ថាមពល THAMAPOL
- អ្នកដែលមានកម្លាំងដ៏លើសលប់, ខ្លាំងក្លា។
- ថាមវ័ន្ត THAMAVORNT
- ជនអ្នកមានសេចក្ដីស្វាហាប់ជាទម្លាប់
- ថារ៉ា THARA
- ជនដែលសម្ដែងវោហារជាអំណាចដ៏ក្លាហាន។
- ថាវនី THAWNY កូនស្រី
- កូនស្រី មានសេចក្ដីក្លាហាន រឹងប៉ឹង (ប្រកបដោយសេចក្ដីស្ងប់ស្ងៀម)។
- ថាវ័ន្ត THAVORNT
- ជនអ្នកមានសំដីជាទីជម្រក (ជាទីអាង)។
- ថាវរៈ THAVARAK
- មនុស្សអ្នកមាំទាំ ស្ថិតស្ថិរ។
- ថាវរិន្ទ THAWRIN
- ជនអ្នកមានសំដីជាគ្រឿងនាំមុខ។
- ថាវរី THAWRY កូនស្រី
- ជាកូនស្រីដែលមាំមួនផ្នែកស្មារតី។
- ថាវរូ THAVARO
- អ្នកដែលមានចិត្តតាំងនៅហើយយ៉ាងស្ថិតស្ថេរ។
- ថាវុធ THAVOUTH
- ជនដែលប្រើសំដីជាអាវុធ។
- ថិរាយុ THIRAYUH
- អ្នកមានអាយុយឺនយូរ។
- ថិវភាព THIRAPHEAP
- មនុស្សដែលមានជំហរតាំងនៅបានល្អហើយ។
ឈ្មោះផ្ដើមដោយ ទ
- ទក្សិណ TEKSENN
- អ្នកប្រកាន់យកខាងត្រូវជាប្រធាន (បានន័យថាទិសខាងត្បូងដែរ)។ មានសេចក្ដីពន្យល់ថា ចាស់ៗពីដើមច្រើនបបួលគ្នាដើរទក្សិណ ឬដើរប្រទក្សិណ គឺសំដៅដល់ការដើរព័ទ្ធយកអ្វីៗទាំងអស់ឲ្យនៅខាងស្ដាំដៃ។
- ទព្វសម្ភារ TOPSAMPHEA
- មនុស្សដែលសង្គមខ្វះមិនបាន។
- ទម្រង់ TUMRUANG
- មនុស្សអ្នកមានរង្វាស់រង្វាល់ច្បាស់លាស់។
- ទម្រង់ស័ក្ដិ TUMRUANGSAKD
- ជនអ្នកប្រកាន់យករបៀបលំដាប់ថ្នាក់កាំជណ្ដើរ។ អ្នកដែលនិយមតាមឋានានុក្រម។
- ទាវរី TEAVARY
- ជាស្រ្តីដែលមានចិត្តមុតដូចទឹក, មានប្រសិទ្ធភាពធ្វើឲ្យមនុស្សប្រុសដែលស្រលាញ់នាងហ៊ានស៊ូប្ដូរជីវិតជាមួយមិនចំពោះកាលៈទេសៈណាឡើយ។
- ទិនបតី TINPAHDEY
- អ្នកដែលជាម្ចាស់នៃពន្លឺទាំងអស់ប្រៀបដូចជាព្រះអាទិត្យ។
- ទិនប្រភា TINPRAPHEA
- ពន្លឺរបស់ព្រះអាទិត្យ, អ្នកដែលផ្ដល់ប្រយោជន៍ឲ្យមនុស្សមិនរើសមុខ។
- ទិនមណី TINMONY
- កែវមណីនៃថ្ងៃ, គឺជាពន្លឺដែលមិនចេះសូន្យ។
- ទិនរ័ត្ន TINROATH
- កែវរបស់ព្រះអាទិត្យ (ដូចជាទិនមណីដែរ)។ ជាអ្នកដែលមានគំនិតភ្លឺចែងចាំងមិនដែលអព្ទឡើយ។
- ទិព្វ TEIP
- អ្នកដែលដូចទេវតា, របៀបរបបមានទំនងដូចទេវតា។
- ទិវ័ន TIVORN
- ជនអ្នកមានពន្លឺជាប្រយោជន៍ដូចជាពន្លឺនៃថ្ងៃ។
- ទិវា TIVEA
- ជនអ្នកមានពន្លឺជាប្រយោជន៍ដូចជាពន្លឺនៃថ្ងៃ។
- ទីឃាយុ TIKHEAYUH
- អ្នកដែលមានអាយុវែងយឺនយូរ។
- ទេពី TEPY
- ស្រ្តីដែលជាធំ, ជាចម្បងពេញលក្ខនៈច្បាប់។
- ទេវិន្ទ TEVINT
- អ្នកមាន អ្នកធំ នៅក្នុងពីរលំដាប់ថ្នាក់ (ជាន់ទី១ ជាន់ទី២)។
- ទេវី TEVI
- ស្រី្តដែលជាធំ, ជាគ្រូអ្នកផង។
- ទំនុក TUMNOUK
- ជនអ្នកចេះរៀបរយ, ក្បួនខ្នាតល្អ។
ឈ្មោះផ្ដើមដោយ ធ
- ធតរដ្ឋ THOTAROATH
- អ្នកដែលមានអំណាចលើពួកគន្ធ័ព្វ (គឺពួកយក្សនៅទិសខាងកើត)។ នៅក្នុងគម្ពី ចតុលោកបាលមានព្រះនាមស្ដេចមួយអង្គគឺ ព្រះបាទ ធតរដ្ឋ។
- ធន THOUN
- ពិតប្រាកដហើយថា ឈ្មោះនេះមានន័យថាទ្រព្យសម្បត្តិ ដូច្នេះគេប្រាកដជាអ្នកមានទ្រព្យទាំងក្នុងជាតិនេះ នឹងពីអតិតជាតិ។
- ធនធាន THOUNTHEAN
- មានអត្ថន័យៈ អ្នកទ្រទ្រង់រក្សាទ្រព្យសម្បត្តិគង់វង់ល្អ។ គេមានធនធានច្រើន។
- ធនលាភ THOUNLEAP
- អ្នកដែលទទួលបានសម្បត្តិច្រើន។ អ្នកដែលបានលាភគឹទ្រព្យចូលមករក។
- ធនិត THAHNIT
- មនុស្សហ្មត់ចត់នឹងជីវភាពរស់នៅមិនបណ្ដែតបណ្ដោយខ្លួន, ជាអ្នកប្រកាន់ខ្ចាប់នូវពាក្យបុរាណមួយឃ្លាថាៈ “ចង់ឆ្ងាញ់ឲ្យរកអន្លក់ ចង់ស្រណុកឲ្យនឿយពីក្មេង”។
- ធនិន THAHNIN
- គឺជាអ្នកដែលមានទ្រព្យសម្បត្តិច្រើន, មានខ្ញុំបម្រើស្រីប្រុសច្រើន, មានរទេះ, សេះ, ក្របី, ដំរី, មាន់, ជ្រូក, គោ ពេញផ្ទះ ពេញចម្ការ, ពីព្រោះមនុស្សឈ្មោះ ធនិន នេះលេខរបស់គេគឺជាដង្ខៅ។
- ធនុ THAHNUK
- និយាយឲ្យចំគឺបានន័យថាធ្នូ, គឺជាជតាសិទី៩ ហៅថា ធនុរាសី។ សព្វថ្ងៃខ្មែរយើងបានយករាសីនេះមកប្រើជាខែ១២ គឺខែធ្នូ។ កាលពីសម័យអង្គរ ស្ដេចខ្មែរបានតាំងទ័ពមួយក្រុមផ្នែកបាញ់ព្រួញហោថា ធនុហត្ថ ដែលស្មើនឹងពាក្យថា កងអាវុធហត្ថ ក្នុងសម័យបច្ចុប្បន្ននេះ។
- ធមនី THAHMAHNY
- នៅក្នុងភាសាបាលី ឈ្មោះនេះស្មើនឹងពាក្យថា នហានុ បានន័យថា សរសៃដែលនាំរសជាតិផ្សេងៗឲ្យជ្រូតជ្រាបទៅក្នុងសព៌ាង្គកាយ ដែលហៅដោយខ្លីថា សរសៃឈាម។ ឈ្មោះនេះដោយពិតទៅ គឺគេជាប្រភេទបុគ្គលដែលនាំផលប្រយោជន៍ដល់សង្គម, ជាប៉ែកនៃទស្សនវិទូ។
- ធម្មធរ THAMATHOR
- បុគ្គលអ្នកទ្រទ្រង់ធម៌ដោយប្រពៃ។ អ្នកប្រព្រឹត្តិប្រតិប្តិតាមគន្លងធម៌ល្អ។ គេគឺជាកូនស្ដាប់ឱវាទទូន្មានរបស់មាតាបិតា និងអ្នកមានសីល។
- ធរណិន្ទ THORANIN
- មនុស្សដែលមាននាទីធំជាងគែទាំងអស់រស់នៅក្នុងចំណែកនៃផែនដីដែលខ្លួនរស់នៅ, មានន័យស្មើទៅនឹងស្ដេចទ្រង់រាជ្យ។
- ធរណី THORANY
- ប្រែចំគឺផែនដី, អ្នករកស៊ីពាក់ព័ទ្ធទៅនឹងដីធ្លី។ ពាក្យធរណីនេះមានសំដៅទៅលើភាពរឹងមាំជានិច្ច, ជាអ្នកដែលមិនចេះរុញរានឹងរាល់បញ្ហាទាំងឡាយរបស់ជីវិត។
- ធាតុ THEAT កូនប្រុស
- កូនប្រុស ឬស្រី ដែលពឹងខ្លួនឯងទាំងស្រុង (ដួលក៏ខ្លួនឯង ងើបឡើងវិញក៏ដោយខ្លួនឯង)។ ពីព្រោះឈ្មោះធាតុនេះសំដៅដល់ន័យថាៈ សភាវៈធម្មជាតិដែលទ្រទ្រង់ខ្លួនឯង។ ដី, ទឹក, ភ្លើង, ខ្យល់, អាកាស ឬហៅថា ធាតុមាស, ធាតុប្រាក់, ធាតុដែក។ល។
- ធាត្រី THEATREY
- ស្រី្តដែលជាអ្នកថែរក្សាក្មេង ឬហៅម៉្យាងទៀតថា មេដោះ (ស្ត្រីដែលជាបងរក្សា)។
- ធានា THEANEA
- ប្រាកដហើយថា គេជាអ្នកទទួលនូវកិត្តិយសនេះគឺការធានា។ ទន្ទឹមនឹងនេះក៏ត្រូវមានបន្ទុកធ្ងន់ណាស់ដែរគឺធានាឲ្យអ្នកដែលគេស្រលាញ់នោះឯង។ គឺគេជានាមផង និងជាកិរិយាស័ព្ទផង។
- ធានី THEANY
- ចាស់បុរាណខ្លះហៅកូនថា ធានី (ប្រុស-ស្រី) ដើម្បីសំដៅឲ្យដឹងថា កូនម្នាក់នេះបានប្រសូត្រនៅធានី។
- ធារា THEAREA
- និយាយឲ្យចំន័យគឺជាលក្ខណៈបុរស នារី ដែលចូលចិត្តការមូលមិត្តជួបជុំគ្នាច្រើន, ស្រលាញ់ការសើចសប្បាយ, ប៉ុន្តែមិនធុញទ្រាន់ទាល់តែសោះក្នុងការដោះស្រាយបញ្ហាឲ្យគេ។ បុគ្គលដែលមានខ្លួនតុចតែអំណាចធំ។
- ធីតា THIDA កូនស្រី
- គេជាកូនស្រីគួរឲ្យស្រលាញ់បំផុតរបស់គ្រួសារ។
- ធីរា THIREA
- ធ្វើអ្វីៗមិនអាចនៅក្រោមនរណាម្នាក់ឡើយ, ការប្រឡងប្រណាំងគឺជាស្មារតីដាច់ខាតរបស់មនុស្សឈ្មោះនេះ, លុះសម្រេចការហើយគេនឹងទ្រទ្រង់ដើម្បីកាន់កាប់។
- ធុរៈ THOUREAK
- គេច្បាស់ជាកូនដែលក្បាលចុះក្រោម ក្ដិតឡើងលើរហូត (គឺជាអ្នករវល់ជានិច្ច)។